“ზოგავ დროს, ენერგიას, ფინანსებს” - ასოციაცია HERA XXI-ს ციფრული სერვისები ქალებისთვის
HERA XXI-ს სერვისები
კვლევები და ანგარიშები მიუთითებენ, რომ საქართველოში ქალთა რეპროდუქციული ჯანმრთელობისა და სექსუალური უფლებები ხშირად და სხვადასხვა ფორმით ირღვევა. მათ შორის: უსაფრთხო აბორტის სერვისებზე ხელმისაწვდომობის შეზღუდვით, სელექციური აბორტით, კონტრაცეპტივების გამოყენების წესებსა და მათზე ხელმისაწვდომობის უფლებების დარღვევით. ხშირია ქალებზე ოჯახში ძალადობის შემთხვევები.
საქართველოში ახალგაზრდებისთვის ჯანმრთელობის შესახებ ინფორმაციაზე წვდომის და ხარისხიანი მომსახურების ხელმისაწვდომობის დაბალი დონე, მნიშვნელოვან გამოწვევადაა დასახელებული 2023-2026 წლების სახელმწიფო ახალგაზრდულ სტრატეგიაშიც, რომლის ამოცანებია:
- მოზარდ-ახალგაზრდებისთვის მათი უფლებების, ჯანმრთელობისა და სხვა საკითხების შესახებ მტკიცებულებებზე დაფუძნებული, ასაკის შესაბამისი ინფორმაციის მიღების შესაძლებლობების არსებობა;
- ახალგაზრდებისადმი კეთილგანწყობილი ჯანდაცვის (განსაკუთრებით – სქესობრივი და რეპროდუქციული ჯანმრთელობის) სერვისებზე ხელმისაწვდომობა და სოციალიზაციის განვითარებისთვის საჭირო ალტერნატიული სივრცეების შექმნა.
ამ გამოწვევის საპასუხოდ, ასოციაცია “HERA XXI”-მა საქართველოში ციფრული ჯანდაცვის სერვისების განვითარება დაიწყო.
ამ სტატიაში გიყვებით, რატომ არის ციფრული ჯანდაცვის სერვისები ეფექტიანი 21-ე საუკუნეში; როგორ ამარტივებს ის ქალებისთვის, განსაკუთრებით, ახალგაზრდებისა და მოწყვლადი (სოციალურად დაუცველი, სოფლად მცხოვრები, სპეციალური საჭიროების, ახალგაზრდების, ოჯახში ძალადობის მსხვერპლი) ჯგუფებისათვის სხვადასხვა, მათთვის სასიცოცხლო სერვისებზე ხელმისაწვდომობას.
და ასევე, ზოგადად, რა ტიპის სერვისების მიღებაა შესაძლებელი ორგანიზაციაში და როგორ მუშაობს სისტემა.
ასოციაცია HERA XXI-ს სერვისები
მადლენა ხუციშვილი ასოციაცია“HERA XXI-დან”, უკვე წლებია, სისტემატურად იღებს კონტრაცეპტივებს. პერიოდულად, თუ დასჭირდება, ორგანიზაციის გინეკოლოგთან კონსულტაციებსაც გადის. ამ სერვისებში თანხას არ იხდის.
ორგანიზაცია მადლენამ 2013 წელს აღმოაჩინა, როცა, მათ ერთ-ერთ ტრენინგზე მოხვდა. მას მერე, ასოციაცია “HERA XXI-ში”, სხვადასხვა სერვისის მისაღებად, არაერთი ადამიანი მიიყვანა: ოჯახის წევრები, მეგობრები და ახლობლები.
“დღემდე ვავრცელებ ინფორმაციას, რომ მათი სერვისები არის სრულიად უფასო და ხელმისაწვდომი”, – გვიყვება მადლენა.
ასოციაცია „HERA XXI“, 1998 წლიდან, სექსუალური და რეპროდუქციული ჯანმრთელობისა და უფლებების სფეროში მუშაობს.
ორგანიზაციის ბევრ სამუშაო მიმართულებას შორის, ერთ-ერთი, გენდერულად მგრძნობიარე, ადამიანის უფლებებზე დაფუძნებული მაღალხარისხიანი სექსუალური და რეპროდუქციული სერვისების ხელმისაწვდომობის უზრუნველყოფაა.
სერვისების ჩამონათვალი ვრცელია. მათ შორის, კონსულტაციები კვალიფიციურ იურისტთან, ექიმ-რეპროდუქტოლოგთან, გინეკოლოგთან და ოჯახის ექიმთან.
განსაკუთრებით მნიშვნელოვანია ისეთი სერვისები ახალგაზრდებისთვის, როგორიცაა:
- სექსუალური მომწიფების/ პუბერტაციის შესახებ ინფორმაცია;
- ინფორმირებული არჩევანი და გააზრებული თანხმობა სექსუალურ
ურთიერთობებზე; - ადრეული ქორწინების და არასასურველი ორსულობის თავიდან აცილება;
- კონტრაცეფციის თანამედროვე მეთოდები და მისი გამოყენება, როგორც
დაუგეგმავი ორსულობის თავიდან აცილება; - ორსულობის უსაფრთხო ხელოვნური შეწყვეტა და ქალის არჩევანი;
- სექსუალური ძალადობის თავიდან აცილების შესახებ რჩევები;
- ძალადობის მსხვერპლის რჩევა-დახმარება და სანდო სერვისებზე რეფერირება და მომხმარებელთან მუდმივი უკუკავშირი;
- კიბერუსაფრთხოება ანუ ინფორმაციული უსაფრთხოება და ბულინგის პრევენცია და ა.შ.
ამ მომსახურებების მიღება მსურველებს რამდენიმე გზით შეუძლიათ. ასოციაცია “HERA XXI-ის” დისტანციური სერვისები მოიცავს: ცხელ ხაზს, ვიდეო კონსულტაციას და ონლაინ ჩატებს. ასოციაციის გინეკოლოგ-რეპროდუქტოლოგის დანიშნულების შესაბამისად, ბენეფიციარს შეუძლია ოფისიდან სრულიად უსასყიდლოდ წაიღოს კონტრაცეფცია.
როგორც ორგანიზაციაში განმარტავენ, ინფორმაციის გაფილტვრასთან დაკავშირებული სირთულეების გათვალისწინებით, ასოციაცია “HERA XXI” ბენეფიციარებს სთავაზობს სანდო ინფორმაციას რეპროდუქციული ჯანმრთელობისა და უფლებების შესახებ.
ორგანიზაციას გააჩნია საკუთარი ციფრული პლატფორმები – სექსუალური კონსულტირების კაბინეტი და გვერდი – ქალების სექსუალური და რეპროდუქციული ჯანმრთელობა და უფლებები, სადაც დაინტერესებულ პირებს შეუძლიათ გაეცნონ თემატურ სტატიებს, დაესწრონ LIVE ჩართვებსა და დასვან შეკითხვები სრულიად ანონიმურად;
ციფრული ჯანდაცვის სერვისები და მისი უპირატესობები
უკვე დიდი ხანია, ციფრული ტექნოლოგიები ყოველდღიური ცხოვრების განუყოფელ ნაწილად იქცა. ტექნოლოგიურმა პროგრესმა თანამედროვე ადამიანს ბევრი რამ გაუმარტივა. მათ შორის, სხვადასხვა სერვისის სწრაფად, იაფად და ხარისხიანად მიღების შესაძლებლობაც.
ეს შესაძლებლობა ადამიანებმა მაშინაც კი შეიძლება გამოიყენონ, როცა საქმე მათ სიცოცხლეს, ჯანმრთელობას, ცხოვრების ხარისხს ეხება.
• სექსუალურ განათლებაზე ვიდეოგაკვეთილების ავტორს გაუპატიურებით ემუქრებიან
• სექსუალური განათლება – რატომ არ ისწავლება ეს საგანი სკოლებში
ციფრული სერვისების უპირატესობა, განსაკუთრებით მაშინ გამოჩნდა, როცა მსოფლიოში კოვიდის პანდემია დაიწყო და ადამიანები, მსოფლიოს ყველა კუთხეში, დიდი ხნით სახლებში გამოიკეტნენ.
კვლევები, რომელიც მაშინ ტარდებოდა, აჩვენებდა, რომ ბევრ ადამიანს შეუწყდა ჯანდაცვის სერვისებზე ხელმისაწვდომობა. იმატა ოჯახში ძალადობის შემთხვევებმა. ბევრი ქალი, მოულოდნელად, მოძალადესთან ერთ ჭერქვეშ გამოკეტილი აღმოჩნდა, არავის დახმარების იმედად.
სწორედ მაშინ, ასოციაცია “HERA XXI-მა”, რომელსაც ფიზიკურ სივრცეში სხვადასხვა სერვისის პრაქტიკა უკვე კარგად ჰქონდა დანერგილი, ციფრული სერვისების ამუშავებაზე დაიწყო ფიქრი.
“სხვადასხვა არასამთავრობო ორგანიზაციის მიერ მომზადებულ ანგარიშებში ჩანდა, რომ პანდემია მძიმედ აისახა ადამიანის უფლებებზე, გაიზარდა ოჯახში ძალადობის შემთხვევები. დავიწყეთ ალტერნატიული გზების ძიება, რომ მოსახლეობისთვის იზოლაციის პირობებშიც შესაძლებელი ყოფილიყო ჩვენი სერვისებით სარგებლობა”, – ამბობს ასოციაცია“HERA XXI-ს” დირექტორი ნინო წულეისკირი.
იგი ამბობს, რომ პანდემიის დროს დაწესებული შეზღუდვების, ტრანსპორტის არარსებობისა და გაუარესებული ეკონომიკური მდგომარეობის პირობებში, ციფრული სერვისების არსებობას, ბევრი ქალისთვის, გადამწყვეტი მნიშვნელობა ჰქონდა.
გადაწყდა, რომ ყველა ის სერვისი, რომელიც ორგანიზაციაში არსებობდა, ციფრული გზებისა და პლატფორმებისთვისაც ადაპტირებულიყო.
ასე ამუშავდა ასოციაცია “HERA XXI-ში” ცხელი ხაზი და ონლაინ კონსულტაციების სისტემა როგორც საიტზე, ასევე, ორგანიზაციის სოციალური პლატფორმების გამოყენებით.
როგორ მუშაობს ციფრული სერვისების სისტემა?
ნებისმიერმა ადამიანმა, რომელსაც ორგანიზაციაში რომელიმე სერვისის მიღება სურს, ასოციაცია “HERA XXI”-ეს ცხელ ხაზზე უნდა დარეკოს, ნომერზე – 032 201 12 21. ზარი, ცხადია, უფასოა. სურვილის შემთხვევაში, ბენეფიციარს შეუძლია ანონიმურად დარჩეს. ეს სავსებით შესაძლებელია.
ასევე, შესაძლებელია დაკავშირება საიტზე, კომუნიკაციების ფანჯრის, ან, ორგანიზაციის ციფრული პლატფორმების გამოყენებით. როგორიცაა, მაგალითად, ორგანიზაციის Facebook გვერდი.
ოპერატორები, რომლებიც ამ საკომუნიკაციო არხებით ადამიანებს პასუხობენ, მათი საჭიროებიდან გამომდინარე, ბენეფიციარებს სპეციალისტებთან აკავშირებენ, შემდეგ კი თვალს ადევნებენ სრულ პროცესს.
“მონიტორინგის შედეგად ოპერატორი ყოველთვიურ ანგარიშსაც ამზადებს, რომ გავარკვიოთ, რამდენად ეფქტიანი იყო კონსულტაცია. ასე უზრუნველვყოფთ როგორც ხარისხს, ასევე ანონიმურობას”, – ამბობს ორგანიზაციის დირექტორი.
ამ გზით, 2021 წლიდან დღემდე, ასოციაცია “HERA XXI-ს” სხვადასხვა სერვისით, ჯამში, ორი ათასზე მეტმა ბენეფიციარმა ისარგებლა.
საჭიროებები განსხვავებული იყო: ზოგი იურისტს მიმართავდა ოჯახში ძალადობისა და არასრულწლოვანთა ქორწინების შესახებ კითხვებით, ზოგს კი უსაფრთხო სამედიცინო სერვისს მოძიება სურდა.
სექსუალური და რეპროდუქციული უფლებების შესახებ ინფორმაციის მისაღებად, “ასოციაცია HERA XXI-ის” სერვისებით სარგებლობენ, როგორც ახალგაზრდა გოგოები (18-25 წლამდე ), ისე ფერტილური ასაკის მქონე ქალები.
როგორც ასოციაციაში ამბობენ, ძირითადი მოთხოვნა სერვისის მიმართ 17-დან 45 წლამდე ასაკის ქალების მხრიდან ფიქსირდება.
თუმცა საინფორმაციო საკომუნიკაციო ტექნოლოგიებზე მაღალი ხელმისაწვდომობის მიუხედავად, (მოსახლეობის 90% მოიხმარს ინტერნეტს), საქსტატის ინფორმაციით, ჯანმრთელობის საკითხებზე ინფორმაციის მოსაძიებლად ინტერნეტს მხოლოდ – 50.5% იყენებს, აქედან ქალი – 61.3%, კაცი – 37.7%; ხოლო 48.9% – ახალგაზრდა ასაკზე მოდის
“ზოგავ დროს, ფინანსებს” – რატომ ციფრული ჯანდაცვა?
ჩვენი რესპონდენტი – მადლენა აფრიკის დასახლებაში ცხოვრობს. დისტანციურ სერვისის მნიშვნელობაზე საუბრისას ყურადღებას დროისაა და ფინანსების დაზოგვის შესაძლებლობაზე ამახვილებს:
“ძალიან მოქნილია დისტანციურად მომსახურების მიღება. ზოგავ დროს, ენერგიას, ფინანსებს. თანხაა საჭირო ქალაქის ერთი ბოლოდან ცენტრში გახვიდე, ექიმთან ვიზიტი დაჯავშნო, მიხვიდე კლინიკაში, რიგის ნომერი აიღო. აქ კი შეთანხმებულად შეგიძლია დრო დანიშნო და სახლში ყოფნის დროს მიიღო იგივე სერვისი”.
მადლენას მსგავსად ასოციაცია“HERA XXI-ს” სერვისით სარგებლობს თამარიც [სახელი რესპონდენტის თხოვნით შეცვლილია]. იგი გვიყვება, რომ ორგანიზაციიდან პერიოდულად გინეკოლოგი უკავშირდება და დისტანციურ კონსულტაციას უნიშნავს. ექიმი მის ზოგად მდგომარეობას ამოწმებს და საჭიროების შემთხვევაში შესაბამის სამედიცინო დაწესებულებაში ამისამართებს.
“აბორტის შემდეგ ჯანმრთელობის პრობლემები შემექმნა, ძალიან ცუდად ვიყავი, ამიტომ გადავწყვიტე კონტრაცეპტივების მიღება. არის შედარებით დაბალფასიანი პრეპარატიც, მაგრამ ჯანმრთელობაზე უარყოფითად მოქმედებს. ყველას არ აქვს ფინანსური შესაძლებლობა, რომ ყოველთვის მაღალი ხარისხის პრეპარატი შეიძინოს. სწორედ ამიტომ არის მნიშვნელოვანი ასოციაცია”HERA XXI-ს” არსებობა. მე ძალიან დიდ შეღავათს მაძლევს “.
რა სერვისებისთვის მიმართავენ ორგანიზაციას?
ფატი პაიჭაძე “HERA XXI-ში ასოციაციის დაარსების წლიდან მუშაობს გინეკოლოგისაა და რეპროდუქტოლოგიის მიმართულებით.
გამოცდილებაზე დაყრდნობით გვიყვება, რომ ონლაინ კონსულტაციებისას ბენეფიციარების პრობლემების უმეტესობას (65 პროცენტს) მხოლოდ ონლაინ კონსულტაციაც ჰყოფნის. პრობლემა გვარდება.
დანარჩენ შემთხვევებში, ექიმთან ვიზიტი ხდება საჭირო.
ელექტრონული სერვისების პოზიტიურ გავლენაზე საუბრისას, ფატი ხაზს უსვამს, როგორ მოქმედებს ეს კონსულტაციები სხვადასხვა მიმართულებით ცნობიერების ამაღლებაზე:
“ონლაინ სერვისით ძალიან ბევრმა ადამიანმა ჩვენგან მიიღო სანდო ინფორმაცია პაპილომა ვირუსის საწინააღმდეგო ვაქცინის (HPV) შესახებ. შესაბამისად, ჩვენ გავფანტეთ ზოგადად ვაქცინაციასთან დაკავშირებული ნეგატიური მითები”.
როგორ შეუძლიათ სერვისის მიმღებ პირებს ანონიმურობის დაცვა – ამ კითხვაზე ფატი პაიჭაძე გვპასუხობს:
“როგორც ექიმ-რეპროდუქტოლოგს, მაქვს ანონიმური და კონფიდენციალური კავშირი მომხმარებელთან. ვიზიტორის არჩევანია, დარჩება ის ანონიმურად, თუ არა. ექიმთან უფასო კონსულტაციის მისაღებად არ არის საჭირო ბენეფიციარმა დააფიქსიროს მისი პირადი მონაცემები მაგ. სახელი, გვარი, ასაკი,მისამართი და ა.შ.”
გარდა ამისა, ასოციაცია ,,HERA XXI“ ბენეფიციარებს სექსუალურ და რეპროდუქციულ უფლებებსა და ოჯახში ძალადობაზე იურისტის უფასო, ონლაინ კონსულტაციას სთავაზობს.
ორგანიზაციის იურისტები, რომელთაც მაღალი გენდერული მგრძნობელობა აქვთ, ძალიან სენსიტიურად უდგებიან რჩევების მიცემას ისეთ საკითხებზე, როგორიცაა მაგალითად: ოჯახში ძალადობა, სექსუალური ძალადობა, ან გენდერული ნიშნით დისკრიმინაცია თუ ძალადობა.
ასოციაციის იურიდიულ კონსულტანტს უმეტესად შემდეგ საკითხებზე მიმართავენ:
- არასრულწლოვანთა ქორწინება
- შვილად აყვანა
- ქალთა შრომით უფლებები
- უსაფრთხო აბორტი
- არასრულწლოვანთა სექსუალური და რეპროდუქციული ჯანმრთელობის უფლებები
- სამედიცინო სერვისის მიმწოდებელთა მხრიდან კონფიდენციალურობის დარღვევა.
ორგანიზაციის კონსულტანტი და იურისტი ანნა თვარაძე იხსენებს ერთი არასრულწლოვანის შემთხვევას, რომელიც კლინიკიდან მშობლის თანხმობის გარეშე საკუთარი სამედიცინო ისტორიის მიღებას ვერ ახერხებდა:
“არასრულწლოვანი ვერ იღებდა სამედიცინო სერვის, რადგან კლინიკაში მშობლის ნებართვას სთხოვდნენ. ასევე, არ ჰქონდა წვდომა პირად სამედიცინო დოკუმენტებზე, რადგან აქაც მშობლის თანხმობას ითხოვდნენ . კონსულტაციის ფარგლებში ბენეფიციარს მივაწოდე ინფორმაცია რომელ კანონსა და ნორმაზე დაყრდნობით რისი მოთხოვნის უფლება ჰქონდა და როგორ შეეძლო თავის უფლებების დაცვით მისთვის სასურველ სერვისსა და საბუთებზე წვდომა. მოგვიანებით, კვლავ ონლაინ სერვისის გამოყენებით დამიკავშირდა და მადლობა გადამიხადა” .
მედიაკომპასი
მედკომპასი არის სწრაფი, ეკონომიური, მიუკერძოებელი, სანდო სამედიცინო საინფორმაციო გზამკვლევი, სადაც შეგიძლიათ მიიღოთ მიუკერძოებელი ონლაინ მომსახურება მაღალკვალიფიციური სპეციალისტებისგან და ისარგებლოთ ასოციაცია HERA XXI-ის დისტანციური სერვისებით.
აპლიკაციის გადმოწერა შესაძლებელია Android მოწყობილობებზე.
გადმოსაწერად დააჭირეთ ლინკს: https://play.google.com/store/apps/details…
თემის წარმომადგენლების გადამზადება ცნობიერების ასამაღლებლად
„მიუხედავად იმისა, რომ ძალიან ბევრი საიტი არსებობს ამასთან დაკავშირებით, ვერავინ ვერ მოგვცემს იმის გარანტიას, რომ ეს ყველაფერი მართალია, ხშირად შეცდომაში შევყავართ ხოლმე ამ საიტებს“ – ეს ციტატა 2021 წელს ჩატარებული კვლევიდანაა – “ახალგაზრდებში სექსუალური და რეპროდუქციული ჯანმრთელობის სერვისების ხელმისაწვდომობა”, რომელიც ასოციაცია HERA XXI-ის დაკვეთით მომზადდა.
კვლევაში, ახალგაზრდები არასწორი ინფორმაციის მიღების მაღალ რისკზე მიუთითებენ და აღნიშნავენ იმასაც, რომ სექსუალური და რეპროდუქციული ჯანმრთელობის შესახებ ძირითადად თანატოლებთან საუბრობენ.
- დედა-შვილობა სკაიპით. ათასობით ემიგრანტი ქალი ვერ ხედავს, როგორ იზრდებიან მათი შვილები
- გაიგე, რამდენად დიდია შანსი რომ მოგკლან. ანიმაციური ვიდეო ფემიციდის შესახებ
- ფემიციდი საქართველოში: გამოცხადებული სიკვდილების ქრონიკა გრძელდება
ამ რისკების საპირწონედ და ინფორმაციული ვაკუუმის ამოსავსებად, ასოციაცია“HERA XXI” სხვადასხვა აქტივობას აორგანიზებს.
ესენია: საინფორმაციო-საგანმანათლებლო შეხვედრები ველზე, ტრენინგები. ასევე, ამზადებს სათემო ლიდერებს.
” საგანმანათლებლო კომპონენტის ფარგლებში, ყოველწლიურად 12-15 ახალგაზრდას ვამზადებთ. ვასწავლით როგორ უნდა იმუშაონ თემში, რათა ცოდნა, რომელიც მიიღეს თავიანთ თანატოლებსაც გაუზიარონ”, – გვეუბნება ორგანიზაციის დირექტორი ნინო წულეისკირი.
ასოციაცია “HERA XXI”, ამ საგანმანათლებლო პროგრამაში ჩასართავად, განაცხადს ელექტრონულად აქვეყნებს. მონაწილეობს მიღება მსურველებს კი საქართველოს მასშტაბით შეუძლიათ.
“ეს არის შესაძლებლობა ახალგაზრდებისთვის, მათთვის საჭირო ინფორმაცია მათივე თანატოლისგან მიიღოს, რომელიც გადამზადებულია და სანდო ინფორმაცია აქვს”, – დასძენს ნინო წულეისკირი.
ანიმაციური ვიდეოები რეპროდუქციულ ჯანმრთელობასა და ცხოვრების ჯანსაღ წესზე
2022 წელს, ასოციაცია “HERA XXI-მ”, როგორც AMAZE-ს საერთაშორისო ჯილდოს მფლობელმა, AMAZE-ს ანიმაციურ ვიდეოებზე მოიპოვა წვდომა.
ეს ნიშნავს, რომ ორგანიზაციას მიეცა შესაძლებლობა რეპროდუქციულ ჯანმრთელობასა და ცხოვრების ჯანსაღ წესთან დაკავშირებული რესურსების ადაპტირება მოეხდინა საქართველოში.
ვიდეოები პროექტ AMAZE-სთან პარტნიორობის ფარგლებში მზადდება და ეხება ისეთ თემებს, როგორიცაა: სქესობრივი გზით გადამდები დაავადებები, არასრულწლოვანთა სექსუალური და რეპროდუქციული ჯანმრთელობის დაცვა, უსაფრთხოება ინტერნეტ სივრცეში/კიბერ უსაფრთხოება ექიმის კონფიდენციალურობა, ჰიგიენური საშუალებების სწორად გამოყენება, და სხვა.
მათი მიზანია ახალგაზრდებისათვის სანდო და დადასტურებული, ასაკის შესაბამისი და სარწმუნო სექსუალური განათლების ხელმისაწვდომობის გაზრდა.
იმისათვის, რომ ვიდეორგოლები დიდ აუდიტორიას მისწვდეს, ამასთან ხელმისაწვდომი იყოს საქართველოში მცხოვრები ეთნიკური ჯგუფებისა და სმენადაქვეითებული ჯგუფებისთვის, ისინი ქართულად, სომხურად და აზერბაიჯანულად არის ადაპტირებული. ხელმისაწვდომია ჟესტურ ენაზეც.
——-
სასარგებლო ბმულები:
- ოჯახის ექიმის კონსულტაცია: https://heraxxi.my3cx.eu:5001/callus/#chat
- ექიმ გინეკოლოგ-რეპროდუქტოლოგის კონსულტაცია: http://live.hera-youth.ge/livezila/chat.php?ptl=ka&hfk=MQ__
- იურისტის კონსულტაცია: https://chat.hera-youth.ge/chat?locale=ka
- ასოციაცია ,,HERA XXI”-ის ვებგვერდი: https://hera-youth.ge/
- სერვისის facebook გვერდი: https://www.facebook.com/profile.php?id=100063542829577
- სერვისის facebook ჯგუფი: ttps://www.facebook.com/groups/4418288714890720
HERA XXI-ს სერვისები
