უკრაინის პრეზიდენტი ვოლოდიმირ ზელენსკი საქართველოს ხელისუფლებას და ქართველ ხალხს მოუწოდებს “ლმობიერება გამოიჩინონ” პატიმრობაში მყოფი ყოფილი პრეზიდენტის, მიხეილ სააკაშვილის მიმართ და იგი საზღვარგარეთ სამკურნალოდ გადაყვანონ.
“მინდა ახლა მივმართო ყველა ჩვენს მეგობარს და კეთილსინდისიერ ადამიანს საქართველოში. მიხეილ სააკაშვილის ჯანმრთელობის მდგომარეობას, ალბათ, ახლა ყველა ხედავს. ამიტომ მივმართავ ქართველ ხალხს, საქართველოს ხელისუფლებას – აუცილებელია გულმოწყალება, განსაკუთრებით შობის წინ.
რაც ახლა მიხეილის თავს ხდება, სისასტიკეა. ეს საქართველოს არ შეეფერება. ეს უნდა შეწყდეს.
გთხოვთ მიიღოთ გადაწყვეტილება, რომელიც გადაარჩენს მის სიცოცხლეს- გადაიყვანეთ მიხეილ სააკაშვილი უკრაინის ერთ-ერთ კლინიკაში, ევროპის სხვა ქვეყანაში, ამერიკაში. დროა, გადაიდგას ეს კარგი ნაბიჯი“, – აღნიშნა ზელენსკიმ.
თბილისის რეაქცია
“სააკაშვილის გამოგზავნა საქართველოში იყო სპეცოპერაცია. დღეს სპეცოპერაციის ავტორებმა უზრუნველყვეს უკრაინის პრეზიდენტის განცხადებაც კი. ეს არის მარტივი შეფასება”, – ასე გამოეხმაურა ფრაქცია „ქართული ოცნების“ თავმჯდომარე მამუკა მდინარაძე უკრაინის პრეზიდენტის, ვოლოდიმირ ზელენსკის განცხადებას.
მდინარაძემ კვლავ გაიმეორა მმართველი გუნდის ბოლოდროინდელი ნარატივი “საქართველოს ომში ჩართვაზე”. მისი თქმით, სააკაშვილის საქართველოში ჩამოსვლის მიზანი სწორედ ომის გაჩაღება იყო.
“მმართველი გუნდი კონკრეტულ ფაქტებზე დაყრდნობით საუბრობს”, – განაცხადა მან.
„დიახ, მათ [უკრაინელ მაღალჩინოსნებს] აქვთ ეს მოლოდინი და სპეცოპერაციის დამგეგმავებმა ასევე უზრუნველყვეს, რომ უკრაინის პრეზიდენტიც კი გამოეხმაურა ამ ამბავს და მოუწოდა საქართველოს ხელისუფლებას ის, რაც მოუწოდა. ეს ერთმანეთთან კორელაციაში, სინთეზში უნდა განვიხილოთ. ასეთი რაღაცები შემთხვევით არ ხდება. ეს იყო სპეცოპერაცია საქართველოს ომში ჩართვის მიზნით და საქართველოს არევის მიზნით, რაც ჩავარდა და დღეს, ჩვენ ყველა განცხადებას, იმის გამო, რომ სხვა გზა არ გვაქვს, ამ კონტექსტში განვიხილავთ“, – აცხადებს მდინარაძე.
ამჟამად უკრაინის მოქლაქე საქართველოს ექს-პრეზიდენტი მიხეილ სააკაშვილი უკვე წელიწადზე მეტია საქართველოში პატიმრობაში იმყოფება. საქართველოში ის 2021 წლის სექტემბრის ბოლოს დაბრუნდა, 1 ოქტომბერს კი თბილისში დააკავეს.
2018 წელს სააკაშვილი სისხლის სამართლის ორ საქმეზე გაასამართლეს (სანდრო გირგვლიანის მკლელობაში მსჯავრდებულთა შეწყალების საქმეზე და დეპუტატ ვალერი გელაშვილის ცემის საქმეზე) და ექვსი წლით პატიმრობა მიუსაჯეს.
პარალელურად მის წინააღმდეგ კიდევ სამი სისხლის სამართლის საქმეა აღძრული – 2007 წლის ნოემბრის აქციის დარბევა და ტელეკომპანია “იმედში” შეჭრა, ე.წ. პიჯაკების საქმე, რაც საბიუჯეტო თანხების გაფლანგვას გულისხმობს და ასევე სახელმწიფო საზღვრის უკანონო კვეთა (ეს ბოლო საქმე მის წინააღმდეგ საქართველოს პროკურატურამ 2021 წელს აღძრა. გამოძიების თანახმად, სააკაშვილი უკრაინიდან ფოთის პორტში ფარულად, გემით ჩამოვიდა. იგი რძის პროდუქტებით სავსე ტრაილერში იმალებოდა).
მიხეილ სააკაშვილი მის წინააღმდეგ აღძრულ ყველა საქმეს პოლიტიკურად მოტივირებულად მიიჩნევს, რის გამოც მან დაპატიმრებისთანავე, 2021 წლის ოქტომბერში, შიმშილობა დაიწყო. ექს-პრეზიდენტმა 50 დღე იშიმშილა, რამაც მნიშვნელოვნად შეარყია მისი ჯანმრთელობა.
2022 წლის 12 მაისს სააკაშვილი ჯანმრთელობის მდგომარეობის გაუარესების გამო კლინიკა ვივამედში გადაიყვანეს. თუმცა, მდგომარეობის გაუმჯობესების ნაცვლად, კლინიკაში ყოფნის პერიოდში ის კიდევ უფრო დამძიმდა. მისი მეგობრები და ოჯახის წევრები, რომლებიც ექს-პრეზიდენტს ამ ხნის განმავლობაში ნახულობენ, ამბობენ, რომ მისი მდგომარეობა ყოველდღიურად და თვალშისაცემად უარესდება.
სახალხო დამცველის ეგიდით შექმნილი ექიმთა კონსოლიუმის წევრები მიუთითებენ, რომ სააკაშვილმა ვივამედში ყოფნის დროს 40 კილოგრამზე მეტი დაკარგა და ეს პროცესი გრძელდება. აქვს დაუდგენელი ეტიმოლოგიის ცხელება, ანორექსია, კახექსია, კუნთების, სახსრების ძვლების ტკივილი, კუნთების განლევა, რომელიც შესაძლოა წარმოადგენდეს დაუდგენელი ინფექციური პროცესის ან/და შესაძლო ინტოქსიკაციის შედეგს.
2 დეკემბერს ამერიკელმა პროფესორმა, ტოქსიკოლოგმა დევიდ სმიტმა გაასაჯაროვა 2022 წლის 28 ნოემბრით დათარიღებული დასკვნა, სადაც აღნიშნულია, რომ მესამე პრეზიდენტი მძიმე მეტალებითაა მოწამლული. სმიტის დასკვნაში ვკითხულობთ, რომ სააკაშვილის თმისა და ფრჩხილის ექსპერტიზის შედეგად, მის ორგანიზმში ვერცხლისწყლის და დარიშხანის კვალია აღმოჩენილი. დასკვნაში წერია, რომ ამ ნივთიერებების ეს დოზები ორგანიზმში სამედიცინო მკურნალობის შედეგად ვერ მოხვდებოდა.
მანამდე, 1 დეკემბერს, მიხეილ სააკაშვილის ჯანმრთელობის მდგომარეობის შესახებ ჩატარებული ექსპერტიზის დასკვნა გამოაქვეყნა ცენტრმა “ემპათიამ”. ამ დოკუმენტში წერია, რომ დაპატიმრების მომენტისთვის სააკაშვილი “პრაქტიკულად ჯანმრთელი” იყო, დღეს კი, იგი სიკვდილის საფრთხის წინაშეა.
14 დეკემბერს სპეციალურმა პენიტენციურმა სამსახურმა საქართველოს მესამე პრეზიდენტის, მიხეილ სააკაშვილის კადრები გამოაქვეყნა. უწყების ცნობით, ეს კადრები ასახავს სხვადასხვა პერიოდში “პატიმარ მიხეილ სააკაშვილის მდგომარეობას”. კადრების დიდი ნაწილი ოქტომბერშია გადაღებული და ჩანს პალატაში მწოლიარე სააკაშვილი, რომელსაც რამდენჯერმე აქვს ნერვული შეტევა. ამ კადრების გასაჯაროებით “ქართული ოცნება” ცდილობს დაარწმუნოს საზოგადოება, რომ სააკაშვილი სიმულიანტობს და მას ფსიქიკური და არა ფიზიოლოგიური პრობლემები აქვს. ბოლო კადრი დეკემბრით თარიღდება, აქ სააკაშვილი არის გამხდარი და დამოუკიდებლად გადაადგილება უჭირს.
