ვინ გახდა აზერბაიჯანის საგარეო საქმეთა მინისტრი, რომელსაც დიპლომატიური გამოცდილება არ აქვს
აზერბაიჯანის ახალ ფინანსთა მინისტრს, ჯეიჰუნ ბაირამოვს არანაირი დიპლომატიური გამოცდილება არ გააჩნია, ცნობილია იურიდიულ კომპანიებში მუშაობით და ამ თანამდებობაზე, 2020 წლის 16 ივლისს, ქვეყნის მოსახლეობისა და ექსპერტების უმრავლესობისთვის მოულოდნელად დაინიშნა.
მისი დანიშვნის თაობაზე თითქმის იმავდროულად გამოცხადდა, როდესაც ასევე მოულოდნელად ცნობილი გახდა ელმარ მამედიაროვის თანამდებობიდან გათავისუფლების შესახებ, რომელიც აზერბაიჯანის საგარეო საქმეთა მინისტრად 15 წლის განმავლობაში მუშაობდა და ქვეყანაში გავლენიან ფიგურად მიიჩნეოდა.
გათავისუფლებას წინ უძღოდა პრეზიდენტ ილჰამ ალიევის გაბრაზებული განცხადება იმის შესახებ, რომ 12 ივლისს, სომხეთ-აზერბაიჯანის საზღვარზე საბრძოლო მოქმედებების დროს, ყველა სამსახურში იყო, საგარეო საქმეთა მინისტრის გარდა.
ახალ მინისტრს, ჯეიჰუნ ბაირამოვს ორი უმაღლესი განათლება აქვს – ის იურისტი და ეკონომისტია. ბოლო ორი წელი, განათლების მინისტრად მუშაობდა – 2018 წლის 23 აპრილიდან.
![](https://jam-news.net/app/uploads/2020/07/416163835-300x162.jpg)
როგორც რადიო „აზადლიგი“ იტყობინება, ჯეიჰუნ ბაირამოვს უკეთესად იცნობენ არა როგორც განათლების მინისტრს, არამედ, როგორც იურიდიული კომპანია OMNİ-ის ხელმძღვანელს. ის ამ ორგანიზაციაში დირექტორი იყო მანამ, სანამ მთავრობაში აღმოჩნდებოდა.
ეკონომისტმა თოგრულ მაშალიმ JAMnews-ს განუცხადა, რომ კომპანია OMNİ 2019 წელს საერთაშორისო იურიდიულ შეფასებას ითხოვდა აზერბაიჯანის ოკუპირებულ ტერიტორიებზე ფერადი ლითონების უკანონო მოპოვებასთან დაკავშირებით (ყარაბაღსა და შვიდ მიმდებარე რაიონში, რომლებიც 1990-იანი წლების დასაწყისში მომხდარი ომის შემდეგ, არაღიარებული მთიანი ყარაბაღის რესპუბლიკის კონტროლქვეშაა – JAMnews).
ამისათვის კომპანია OMNİ-მ დამკვეთისგან, სააქციო საზოგადოება „Azərqold“-ისგან 195.5 ათასი მანათი (დაახლოებით, 115 ათასი დოლარი) მიიღო, განაცხადა მაშალიმ.
კომენტ30არი
პოლიტიკური მიმომხილველი შაჰინ გაჯიევის ინტერვიუ JAMnews-ს:
„საგარეო საქმეთა მინისტრად ისეთი ადამიანის დანიშვნა, რომელსაც არასოდეს უმუშავია დიპლომატად, კითხვებს აჩენს.
სამინისტროს მთავარი საქმე – ყარაბაღის საკითხზე მოლაპარაკებების წარმოებაა. რამდენად რეალურია, რომ ადამიანმა, რომელსაც არანაირი ინფორმაცია არ აქვს, არ იცნობს „სამზარეულოს“, მონაწილეობა მიიღოს ამ პროცესში – ვერ ვიტყვი“.
2020 წლის ზაფხულის დასაწყისში, აზერბაიჯანის საგარეო საქმეთა სამინისტრო სკანდალური მოვლენების ეპიცენტრში აღმოჩნდა.
ივნისში, რამდენიმე აზერბაიჯანულ მედიასაშუალებაში გავრცელდა ინფორმაცია იმის შესახებ, რომ იმდროინდელი საგარეო საქმეთა მინისტრის, ელმარ მამედიაროვის ოჯახი აშშ-ში ძვირადღირებულ ქონებას ფლობს.
საგარეო საქმეთა სამინისტრომ მაშინ სახელმწიფო უსაფრთხოების სამსახურს მიმართა წინადადებით, „გამოიძიონ ელმარ მამედიაროვის წინააღმდეგ აგორებული „გაშავების“ კამპანია“.
2020 წლის ივლისში, საგარეო საქმეთა სამინისტროში, სკანდალური დაკავებები განხორციელდა – ქრთამის აღებისთვის, რამდენიმე მაღალჩინოსანი დააპატიმრეს.