ვაკის პარკის საქმეზე, შსს-მ ცხრა პირი დააკავა

ვაკის პარკის საქმეზე შსს-მ ცხრა პირი დააკავა

ვაკის პარკის შადრევანში დენის დარტყმის შედეგად დაღუპული მოზარდის საქმეზე ცხრა პირი დააკავეს. ინფორმაცია შსს-ში გამართულ სპეციალურ ბრიფინგზე გახდა ცნობილი. დაკავებულებს შორისაა მერიის გარემოს დაცვის საქალაქო სამსახურის უფროსის მოადგილე, “გრინსერვისის” და “მშენექსპერტის” დირექტორები და თანამშრომლები. ასევე, შპს “ნიუ მეტალ დიზაინის” წარმომადგენელი და მათ მიერ დაქირავებული ორი ელექტროშემდუღებელი. უწყების განმარტებით, შესაძლებელია გაფართოვდეს ბრალდებულთა წრე.

გამოძიების მტკიცებით, მერიის გარემოს დაცვის საქალაქო სამსახურის უფროსის მოადგილემ “გრინსერვისის” მენეჯერს სთხოვა, შადრევანში მდებარე ელექტროძრავიდან გამომავალი შავი ფერის წყლის მილები შეეფუთათ უჟანგავი, თეთრი ფერის კონსტრუქციით. “გრინსერვისის” დირექტორის, ლაშა ფურცხვანიძის გადაწყვეტილებით, ამ სამუშაოს შესრულება დაუკვეთეს მათივე ქვეკონტრაქტორ “ნიუ მეტალ დიზაინს.” 

შსს-ს ცნობით, “ნიუ მეტალ დიზაინის” დაქირავებულმა ელექტროშემდუღებლებმა სამუშაოს წარმოების დროს დაარღვიეს უსაფრთხოების ნორმები, რაშიც იგულისხმება შემდეგი: წყლის მილებზე, უჟანგავი ლითონის კონსტრუქციის მორგების მიზნით, მოხსნეს ელექტროძრავის შესაფუთი ლითონის ცხაური, რომლის კვლავ დამაგრებისას, ბეტონის ზედაპირსა და ცხაურს შორის მოაყოლეს ელექტროსადენი, რის შედეგადაც დაზიანდა სადენის იზოლაცია. სამუშაოები გრინსერვისის დირექტორმა შესაბამისი ინსპექტირების ჩატარების გარეშე წარუდგინა მერიის საქალაქო სამსახურს, ხოლო მერიის გარემოს დაცვის სამსახურის უფროსის მოადგილემ ჩაიბარა ასევე ინსპექტირების გარეშე.

“ხსენებულ პირთა მიერ თავიანთი მოვალეობის ჯეროვნად შესრულების შემთხვევაში, გამოვლენილი იქნებოდა ელექტროსადენის დაზიანების ფაქტი და თავიდან იქნებოდა აცილებული დამდგარი შედეგი.

გამოძიებით ასევე დადგინდა, გრინსერვის +-მა, თბილისის მერიის გარემოს დაცვის საქალაქო სამსახურთან მიღება-ჩაბარების აქტის გაფორმებისთვის სავალდებულო, შესაბამისი დასკვნის მომზადების მიზნით, ხელშეკრულება გააფორმა მშენექსპერტთან.” – ვკითხულობთ შსს-ს განცხადებაში.

● რა ვიცით კომპანიაზე, რომელმაც ვაკის პარკის შადრევნის რეაბილიტაცია ჩაატარა

შემთხვევა 13 ოქტომბერს მოხდა – ვაკის პარკში დენმა დაარტყა ორ მოზარდს, რომლებიც შადრევანში ჩავარდნილი ბურთის ამოსაღებად ჩავიდნენ. 13 წლის გოგონას გადარჩენა ვერ მოხერხდა, მას გული გაუჩერდა. მეორე მოზარდის მდგომარეობა კი სტაბილურად მძიმეა, იგი მართვით სუნთქვაზეა გადაყვანილი.

როგორც მოგვიანებით გახდა ცნობილი, კომპანია, რომელმაც შადრევნის რეაბილიტაცია ჩაატარა, 2013 წელს ე.წ. შავ სიაში იყო შეყვანილი, მისი დამფუძნებლები კი ხელისუფლების შეცვლის შემდეგ დააპატიმრეს.

გამოძიება წინა ხელისუფლების დროს ჩადენილ კორუფციულ დანაშაულს იძიებდა. საქმეში იკვეთებოდა, რომ ყოფილმა ჩინოვნიკებმა – ფურცხვანიძემ და ხარშილაძემ 2007 წელს თავიანთი ნაცნობების სახელზე ფიქტიურად დააფუძნეს შპს “გრინსერვისი“, სინამდვილეში კი კომპანიის რეალური მფლობელები და ხელმძღვანელები თავად იყვნენ.

ბრალის წარდგენიდან ერთ წელიწადში ფურცხვანიძემ გამოძიებასთან ითანამშრომლა და მთელი ამ სქემის ნამდვილობა აღიარა. იგი ჯარიმის სანაცვლოდ გაათავისუფლეს, ხარშილაძეს კი ორი წლით პატიმრობა და ჯარიმის გადახდა მიესაჯა.

იმის ნაცვლად, რომ კორუფციაში მხილებული კომპანიისთვის სახელმწიფო შესყიდვებში მონაწილეობა აეკრძალა, “ქართულმა ოცნებამ” ფურცხვანიძესთან ურთიერთობა აღადგინა. ოღონდ ამჯერად სახელმწიფო შესყიდვებში მონაწილეობდა არა “გრინსერვისი”, რომლის წინააღმდეგ იყო საქმე აღძრული, არამედ “გრინსერვის+” (იგივე კომპანია შეცვლილი სახელით).

2013 წლის იანვრიდან “გრინსერვის +” მონაწილეობს სახელმწიფო შესყიდვებში და ამ წლების განმავლობაში რამდენიმე მილიონი აქვს მიღებული სახელმწიფოსგან.