გაერთიანებული სამეფოს ელჩი: პირველად 10 წლის განმავლობაში, გადავწყვიტეთ გაგვეყინა "უორდროპის დიალოგი"
უორდროპის დიალოგის გაყინვა
გაერთიანებული სამეფოს ელჩმა, გარეტ უორდმა “ინტერპრესნიუსთან” განაცხადა, რომ “ქართული ოცნების” ქმედებების გამო ბრიტანულმა მხარემ გადაწყვიტა ყოველწლიური ე.წ. უორდროპის დიალოგი გაეუქმებინა. ამასთან, გაუქმდა თავდაცვის ძალებს შორის მაღალი რანგის მოლაპარაკებები და შეჩერდა კიბერუსაფრთხოების პროგრამა.
უორდროპის სტრატეგიული დიალოგი საქართველოსა და გაერთიანებულ სამეფოს შორის ურთიერთობების მთავარი პლატფორმაა, რომელიც მოიცავს თანამშრომლობის პრაქტიკულად ყველა მიმართულებას: პოლიტიკურ დიალოგს, საგარეო პოლიტიკის, თავდაცვისა და უსაფრთხოების საკითხებს, სავაჭრო-ეკონომიკურ კავშირებს, განათლებისა და კულტურის სფეროს, ხალხთა შორის კონტაქტებს.
2014 წლიდან მოყოლებული, ორი ქვეყნის დელეგაციები ურთიერთობათა პროგრესზე საუბრობენ და მომავალი თანამშრომლობის სფეროებს ყოველწლიურად განიხილავენ.
როგორც ელჩმა ინტერვიუში აღნიშნა, საქართველოს მთავრობის მხრიდან მიმდინარე წელს გადადგმულმა ნაბიჯებმა დასავლელი პარტნიორებთან ურთიერთობა გააფუჭა:
“ჩვენ შეშფოთებული ვიყავით, როდესაც პარლამენტმა მიიღო სამოქალაქო საზოგადოების საქმიანობის შემზღუდველი კანონი, მიუხედავად იმისა, რომ დაინახა საზოგადოების მხრიდან დიდი წინააღმდეგობა და აიღო ვალდებულება, ეს კანონი აღარ დაებრუნებინა დღის წესრიგში.
ჩვენ იმედგაცრუებული დავრჩით, როდესაც ქართული ოცნების ლიდერებმა დაიწყეს შეთქმულების თეორიების პროპაგანდა და გამოთქვამენ ვარაუდებს, რომ დასავლელი პარტნიორები ძირს უთხრიან საქართველოს. ჩვენ შოკირებული ვიყავით, როდესაც ქართულმა ოცნებამ საარჩევნო პროგრამის დაპირებად ოპოზიციური პარტიების აკრძალვა დასახელდა
ჩამოთვლილი მიზეზების გამო, პირველად 10 წლის განმავლობაში, ჩვენ, ბრიტანულმა მხარემ, გადავწყვიტეთ გაგვეყინა ყოველწლიური, მაღალი რანგის “უორდროპის დიალოგი” მინისტრებს შორის. ასეთი რამ პირველად მოხდა დიალოგის ფორმატის დაარსებიდან. ჩვენ ასევე გავაუქმეთ თავდაცვის შტაბებს შორის დაგეგმილი მაღალი რანგის მოლაპარაკებები და შევაჩერეთ ახალი კიბერუსაფრთხოების პროგრამა. არჩევნების შემდეგ, მიუხედავად იმისა თუ ვინ იქნება მთავრობაში, ვიმედოვნებთ, რომ ვიხილავთ ევროატლანტიკურ გზაზე დაბრუნების მკაფიო მტკიცებულებებს, რათა აღვადგინოთ ნდობა და დავუბრუნდეთ მჭიდრო პარტნიორობა.”
14 ოქტომბერს, Reuters-მა გამოაქვეყნა სტატია, რომლის მიხედვით, ევროკავშირის ლიდერები აპირებენ საქართველო არჩევნებამდე გააფრთხილონ, რომ მისი ხელისუფლება ევროკავშირისკენ ქვეყნის გზას საფრთხის ქვეშ აყენებს.
დასკვნის პროექტის ტექსტის მიხედვით, ბლოკი კვლავ ადასტურებს ევროკავშირის მზადყოფნას მხარი დაუჭიროს “ქართველ ხალხს მათ ევროპულ გზაზე”, მაგრამ, ასევე “ადასტურებს თავის სერიოზულ შეშფოთებას” საქართველოს ხელისუფლების მიერ განხორციელებული ქმედებების მიმართ.
აღსანიშნავია, რომ 14 ოქტომბერს, ევროკავშირის საგარეო საქმეთა მინისტრების შეხვედრა გაიმართა, რომლის დასრულების შემდეგ პრესკონფერენცია გამართა ევროკავშირის უმაღლესმა წარმომადგენელმა ჯოზეფ ბორელმა. მან სხვა საკითხებთან ერთად საქართველოზეც ისაუბრა და თქვა, რომ საქართველოში მოლდოვასთან შედარებით შავი სურათია.
