საქართველოს საგარეო საქმეთა სამინისტროს ცნობით, უკრაინის 6 მოქალაქე, რომლებიც 17 აგვისტოდან ლარსის სასაზღვრო პუნქტთან, ბუფერულ ზონაში იყვნენ, ქვეყანაში შემოუშვეს.
საგარეო საქმეთა სამინისტროს განცხადებით, ერთ-ერთის ჯანმრთელობის მდგომარეობა გართულდა და მათი ქვეყანაში შემოშვება ამიტომ გადაწყვიტეს.
“ნოვაია გაზეტა ევროპას” ცნობით, 16-17 აგვისტოს ღამეს ქართველმა მესაზღვრეებმა ექვსი უკრაინელი არ შეუშვეს საქართველოში. თითოეულ მათგანს ქვეყანაში შესვლაზე ოფიციალური უარი ეთქვა და ეს „სხვა მიზეზებით“ აეხსნათ.
ექვსიდან ხუთი ყოფილი პატიმარია ხერსონის ოლქიდან, რომლებიც რუსეთის უსაფრთხოების ძალებმა უკანდახევის დროს რუსეთში წაიყვანეს სასჯელის მოსახდელად. და ერთიც უკრაინელია, რომელიც რუსეთში შევიდა და ფილტრაციის ბანაკში აღმოჩნდა, ახლა კი გაათავისუფლეს და ქვეყნიდან გასვლას ცდილობს.
როგორც “ნოვაია გაზეტა ევროპა” წერს, მაშინ როდესაც უფლებადამცველები ცდილობენ ორი ქვეყნის საზღვრებს შორის, ბუფერულ ზონაში ჩარჩენილი მამაკაცები გაათავისუფლონ, რუსეთის უსაფრთხოების ძალები ამ უკრაინელების გატაცებას ცდილობენ.
2022 წლის შემოდგომაზე, რუსეთმა, რომელიც ოკუპირებული ხერსონიდან უკან იხევდა, ოლქიდან ათასზე მეტი მსჯავრდებული გაიყვანა. უმეტეს შემთხვევაში, ეს ადამიანები შემდეგ იგზავნებოდნენ კრასნოდარის ტერიტორიის კოლონიებში, როსტოვისა და ვოლგოგრადის რეგიონებში, სადაც უკრაინის სასამართლოს მიერ მისჯილი ვადის მოხდა უნდა გაეგრძელებინათ. უკრაინა ამ ფაქტს ადამიანების გატაცებად და უკანონო დეპორტაციად მიიჩნევს.
საგარეო საქმეთა სამინისტროს განცხადება:
“როგორც ცნობილია, საქართველოს საზღვართან მყოფი უკრაინის მოქალაქეებთან დაკავშირებით ქართულმა მხარემ დაუყოვნებლივ შეატყობინა საქართველოში უკრაინის მისიას, რომელმაც განმარტა, რომ უკრაინის მხრიდან საკითხის გადასაჭრელად საჭირო არის შესაბამისი ხანგრძლივი პროცედურები.
ქართული მხარე ამ ხნის განმავლობაში ელოდებოდა უკრაინის მხრიდან შესაბამის გადაწყვეტილებას.
იმის გათვალისწინებით, რომ საზღვართან მყოფი უკრაინის მოქალაქეებიდან ერთ-ერთის ჯანმრთელობის მდგომარეობა გართულდა, ქართულმა მხარემ მიიღო გადაწყვეტილება მათი საქართველოს ტერიტორიაზე შემოშვების შესახებ, რომლებიც უკვე აქ დაელოდებიან შესაბამის პროცედურების დასრულებას.”
