უკრაინის კრიზისის ფონზე აშშ ჯარებს ევროპაში აგზავნის
აშშ ჯარებს ევროპაში აგზავნის
პენტაგონის განცხადებაში ნათქვამია, რომ აშშ-ის პრეზიდენტმა ჯო ბაიდენმა დაამტკიცა 3 ათასი ამერიკელი ჯარისკაცის პოლონეთში, გერმანიასა და რუმინეთში გაგზავნა. ეს გადაწყვეტილება უკრაინის საზღვრის გასწვრივ რუსული ჯარების კონცენტრაციის ფონზე, აღმოსავლეთ ევროპაში ნატოს წევრი ქვეყნების მხარდასაჭერად მიიღეს. ამის შესახებ CNN იტყობინება.
დასავლური ქვეყნების ლიდერები და უკრაინის ხელისუფლება აცხადებენ, რომ რუსეთმა უკრაინის საზღვრებთან 100 ათასზე მეტ ჯარისკაცს მოუყარა თავი და უკრაინაში რუსეთის შეჭრა უკვე უახლოეს მომავალშია შესაძლებელი.
რუსეთი უკრაინაში შეჭრის განზრახვას უარყოფს, თუმცა აშშ-სა და ნატოს ქვეყნებისგან ოფიციალურ „უსაფრთხოების გარანტიებს“ ითხოვს, მათ შორის გარანტიებს იმის შესახებ, რომ უკრაინა და საქართველო არასოდეს გახდებიან ნატოს წევრები.
ვაშინგტონსა და ბრიუსელში რუსეთის მოთხოვნების შესრულებაზე უარი თქვეს, თუმცა დიალოგის გაგრძელება მაინც შესთავაზეს.
მოლაპარაკებებისა და წერილობითი შეტყობინებების გაცვლის შედეგად, ერთის მხრივ რუსეთი და მეორეს მხრივ აშშ და ნატო ჯერ კიდევ ვერ მივიდნენ შეთანხმებამდე.
პენტაგონის პრესმდივანმა, ჯონ კირბიმ განაცხადა, რომ ორი ათასი სამხედრო მოსამსახურე აშშ-დან პოლონეთსა და გერმანიაში გაიგზავნება, კიდევ, დაახლოებით, 1000 ჯარისკაცი კი, რომლებიც ამ დროისთვის გერმანიაში არიან დისლოცირებული, რუმინეთში გადავა.
ეს გადაადგილება დროებითი ზომაა, აღნიშნა კირბიმ და იქვე ხაზი გაუსვა: „ეს ძალები უკრაინაში ბრძოლას არ აპირებენ“.
- საქართველოს პარლამენტმა “უკრაინის მხარდამჭერი” რეზოლუცია მიიღო. რუსეთი ნახსენები არ არის
- სერგეი ლავროვი: საქართველოს NATO-ში ძალით შეყვანას ცდილობენ
კირბი ასევე ირწმუნება, რომ ეს ჯარების დამატებითი გადასროლა არ ნიშნავს იმას, თითქოს აშშ-ს მიაჩნია, რომ პუტინმა უკრაინაში ან რომელიმე სხვა ქვეყანაში შეჭრა გადაწყვიტა, მაგრამ „თუკი ის შეიჭრება უკრაინაში, ნათელია, რომ ამას შესაბამისი შედეგები მოჰყვება“.
„გვინდა დავრწმუნდეთ, რომ მან იცის, რომ ნატოს წინააღმდეგ ნებისმიერ მოქმედებას მოჰყვება წინააღმდეგობა, ეს მეხუთე მუხლის ამოქმედებას გამოიწვევს და მზად ვიქნებით, დავიცვათ ჩვენი მოკავშირეები“, – განაცხადა კირბიმ.
ამას გარდა, კიდევ 8 500 სამხედრო მოსამსახურე აშშ-ში მზადყოფნაშია მოყვანილი იმ შემთხვევისთვის, თუკი გამოიძახებენ ნატოს სწრაფი რეაგირების ძალებს.
![ამერიკელი საზღვაო ქვეითები და მეზღვაურები. 19 თებერვალი, 2021 წ. ფოტო: Joel Rivera-Camacho, Unsplash.com](https://jam-news.net/app/uploads/2022/02/joel-rivera-camacho-pcUSid_NEpQ-unsplash.jpg)
აშშ-სა და ნატოს პასუხი რუსეთს
2 თებერვალს, ესპანურმა გაზეთმა El Pais-მა ორი კონფიდენციალური დოკუმენტი გამოაქვეყნა, რომლებიც, გამოცემის თანახმად, შეიცავს აშშ-სა და ნატოს პასუხების სრულ ტექსტებს რუსეთის მოთხოვნებზე, ევროპაში უსაფრთხოების გარანტიების შესახებ.
დასავლეთმა უარყო ნატოს არგაფართოების იდეა, მაგრამ მზად არის თავი შეიკავოს აღმოსავლეთ ევროპაში ბირთვული შეიარაღების განთავსებისგან.
ასევე, იმ დოკუმენტებიდან, რომელსაც დამოუკიდებელი რუსული გამოცემა „Спектр“ ციტირებს, ჩანს, რომ ვაშინგტონი მზად არის დაელაპარაკოს მოსკოვს უკრაინაში სარაკეტო სისტემების განლაგების ორმხრივ შეზღუდვებზე.
აშშ-ს შესაძლებლად მიაჩნია შეთანხმების მიღწევა რუსეთთან უსაფრთხოების საკითხებზე, რომლებიც ორმხრივ ინტერესებს წარმოადგენს. კერძოდ, დოკუმენტში ნათქვამია, რომ აშშ მზადაა რუსეთთან ისაუბროს საშუალო და მცირე რადიუსის რაკეტების კონტროლის შესახებ.
ამავდროულად, ვაშინგტონი მოუწოდებს მოსკოვს, გაიყვანოს ჯარები უკრაინის, საქართველოსა და მოლდოვის ტერიტორიებიდან.
ჩრდილოატლანტიკური ალიანსის პასუხში ნათქვამია: ნატოს არ სურს კონფრონტაცია, მაგრამ არ წავა კომპრომისზე მისთვის პრინციპულ საკითხებთან დაკავშირებით, კერძოდ, არ იტყვის უარს „ღია კარის“ პოლიტიკაზე, რაც არ გამორიცხავს მომავალში ალიანსში უკრაინისა და საქართველოს გაწევრიანებას. ანალოგიური პოზიცია აქვთ ამერიკელებსაც.