ერდოღანი დასავლეთის წინააღმდეგ: "ისინი პრობლემას ვერ წყვეტენ"
2020 წლის 27 სექტემბრის დილას, მთიან ყარაბაღში დაწყებული საბრძოლო მოქმედებების თემაზე კომენტირებისას, 28 სექტემბერს, თურქეთის პრეზიდენტმა რეჯეფ თაიფ ერდოღანმა მკაცრად გააკრიტიკა დასავლეთი და „ოკუპანტი სომხეთისთვის პასუხისმგებლობის დაკისრება“ მოითხოვა.
რამდენიმე ძირითადი ფრაგმენტი მისი ნახევარსაათიანი გამოსვლიდან:
„ეუთოს მინსკის ჯგუფის თანათავმჯდომარეები – აშშ, რუსეთი და საფრანგეთი – უკვე, თითქმის 30 წელია ვერ ახერხებენ კონფლიქტის გადაჭრას. პირიქით, ისინი ყველაფერს აკეთებენ იმისათვის, რომ პრობლემა გაჭიანურდეს. ახლა კი იგივე ქვეყნები ცდილობენ ასწავლონ კონფლიქტის მხარეებს და პერიოდულად ემუქრებიან კიდეც.
აზერბაიჯანში, უკვე 30 წელია გისმენდნენ თქვენ და სწრაფი დარეგულირების იმედი ჰქონდათ. მაგრამ ვისი მიწებია ოკუპირებული? აზერბაიჯანის მიწები! ამ ფაქტს თანათავმჯდომარე ქვეყნებიც აღიარებენ.
მონაწილეობს თურქეთი კონფლიქტში? არიან თურქი სამხედროები კონფლიქტის ზონაში (ყარაბაღში)? ამ კითხვებს სვამენ ისინი, ვინც იარაღით დატვირთული ათასობით სატვირთო დააყენა ჩრდილოეთ სირიაში.
მათ სექტორებად დაყვეს ჩრდილოეთ სირია და იქ სამხედრო ბაზები შექმნეს (…) ახლა, იგივე ადამიანები სვამენ კითხვას კავკასიაში თურქი სამხედროების ყოფნისა და თურქული იარაღის მიწოდების შესახებ. რა დამახინჯებული წარმოდგენებია? თითქოს, პრეზიდენტი ილჰამ ალიევი ვალდებული იყოს, მათ ანგარიში ჩააბაროს.
აზერბაიჯანში, მშობლიური სახლიდან მოშორებით მილიონზე მეტი დევნილი და იძულებით გადაადგილებული პირი ცხოვრობს. ამასთან, არავინ სთხოვს პასუხს ოკუპანტს – სომხეთის სახით. აზერბაიჯანმა განაცხადა, „საკმარისია! დრო მოვიდა პასუხი მოვთხოვოთ“ და პრობლემას საკუთარი ძალებით ჭრის.
მოვიდა დრო, დამთავრდეს რეგიონში კრიზისი, რომელიც სომხეთის მიერ მთიანი ყარაბაღისა და მიმდებარე აზერბაიჯანული რაიონების ოკუპაციით დაიწყო.
ოკუპირებული აზერბაიჯანული მიწების დაუყოვნებლივი გათავისუფლება გზას გაუხსნის მშვიდობასა და სტაბილურობას რეგიონში. ნებისმიერი სხვა ინიციატივა ან მცდელობა, აიძულონ მხარეები ვითარების დარეგულირება, უკანონო და უსამართლოა და მხოლოდ სომხეთის ინტერესებს შეესაბამება“.
• კომენტარი ბაქოდან: რა კავშირშია რუსეთი ყარაბაღში ვითარების გამწვავებასთან
• მოსაზრება ერევნიდან: რატომ დაიწყო საბრძოლო მოქმედებები ყარაბაღში ახლა
• ქართველი პოლიტიკოსები და ექსპერტები ყარაბაღის კონფლიქტზე. კომენტარები
აშშ-ის სახელმწიფო დეპარტამენტი „კონფლიქტის დარეგულირების შესახებ“
27 სექტემბერს, აშშ-ის სახელმწიფო დეპარტამენტი განცხადებით გამოვიდა, რომლითაც ორივე მხარეს ძალადობის დაუყოვნებლივი შეწყვეტისკენ მოუწოდა.
სახელმწიფო მდივნის მოადგილე სტივენ ბიგანი, რომელიც ხელს აწერს განცხადებას, ამბობს, რომ სომხეთისა და აზერბაიჯანის საგარეო საქმეთა მინისტრებს სატელეფონო საუბრისას მოუწოდა, „გამოიყენონ მათ შორის არსებული კავშირის პირდაპირი ხაზები, რათა თავიდან აირიდონ სამომავლო ესკალაცია და უსარგებლო რიტორიკა, ასევე ქმედებები, რომლებიც კიდევ უფრო გააძლიერებს დაძაბულობას ადგილზე“.
„ძალადობის ესკალაციაში გარე მხარეების ჩართულობა უკიდურესად უშედეგო იქნება და მხოლოდ გააღრმავებს რეგიონალურ დაძაბულობას“, – ნათქვამია განცხადებაში.
აშშ, როგორც ეუთოს მინსკის ჯგუფის თანათავმჯდომარე ქვეყანა, მზად არის, კვლავინდებურად დაეხმაროს მხარეებს მდგრადი მშვიდობის მიღწევაში.
სომხეთის პრემიერ-მინისტრი მოუწოდებს მსოფლიოს „შეაჩერონ თურქეთის ჩარევა“, მაგრამ მზად არის განიხილოს ყარაბაღის აღიარება
ასევე, 27 სექტემბერს, სომხეთის პრემიერ-მინისტრმა საერთაშორისო სტრუქტურებს მოუწოდა, შეაჩერონ თურქეთის ჩარევა ყარაბაღის კონფლიქტში, რადგან ეს „საბოლოოდ შეარყევს ვითარებას რეგიონში“.
„ფართომასშტაბიან ომს სამხრეთ კავკასიაში, რომლის ზღვარზეც ჩვენ ახლა ვდგავართ, შეიძლება ჰქონდეს ყველაზე არაპროგნოზირებადი შედეგები. ის შეიძლება რეგიონის ფარგლებს გაცდეს და (…) საფრთხის წინაშე დააყენოს საერთაშორისო უსაფრთხოება და სტაბილურობა“, – განაცხადა პრემიერმა.
ამავდროულად, ნიკოლ ფაშინიანმა განაცხადა, რომ მზად არის განიხილოს ყარაბაღის დამოუკიდებლობის აღიარების საკითხი, როგორც აზერბაიჯანის აგრესიაზე პასუხი.
„მნიშვნელოვანია საზოგადოების აზრისა და ყველა არგუმენტის გათვალისწინება, როგორც „მომხრეების“, ისე „მოწინააღმდეგეების“, – განაცხადა მან.
