თელავის საკრებულოს წევრი ოჯახის წევრებზე ძალადობის ბრალდებით დააკავეს
თელავის საკრებულოს დეპუტატი, მიხეილ გრემელაშვილი, რომელიც მისმა ახლობელმა და სუროგაციის ცენტრ „ნიუ ლაიფის“ ხელმძღვანელმა, მარიამ კუკუნაშვილმა ოჯახის წევრებზე ძალადობაში ამხილა, დააკავეს. ოჯახური ძალადობის გარდა მას გამოძიება მუქარას და ცეცხლსასროლი იარაღის და საბრძოლო მასალის უკანონო შეძენა- შენახვას ედავება.
გამოძიებით დადგინდა, რომ მიხეილ გრემელაშვილი თავის სახელზე რეგისტრირებული, „ტეტეს“ სისტემის ცეცხლსასროლი იარაღით, სიცოცხლის მოსპობით დაემუქრა მეუღლესა და შვილებს და მათზე ფიზიკურად იძალადა.
შსს-ს ინფორმაციით, სამართალდამცველებმა დეპუტატის საცხოვრებელი ბინის ჩხრეკისას კალაშნიკოვის სისტემის უკანონოდ შენახული ცეცხლსასროლი იარაღი ამოიღეს.
გამოძიება ოჯახის წევრების მიმართ განხორციელებული მუქარის, ოჯახში ძალადობის, ასევე, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვის ფაქტზე, საქართველოს სისხლის სამართლის კოდექსის 11 პრიმა-151-ე მუხლის 1-ლი ნაწილით, 126-ე პრიმა მუხლის მე-2 ნაწილის „ა“ ქვეპუნქტითა და 236-ე მუხლის მე-3 ნაწილით მიმდინარეობს, რაც 4-დან 6 წლამდე ვადით თავისუფლების აღკვეთას გულისხმობს.
მიხეილ გრემელაშვილი ოჯახის წევრებზე ძალადობაში მარიამ კუკუნაშვილმა 8 ივლისს ამხილა. მან ფეისბუკში დაწერა, რომ მისმა ბიძაშვილმა შვილებს წყლის დაგვიანებით მიტანის გამო სცემა. კუკუნაშვილის განცხადებით, საკრებულოს დეპუტატი წლებია ცოლ-შვილზე ძალადობს.
ოჯახური ძალადობის ფაქტზე გამოძიება შსს-მ მარიამ კუკუნაშვილის ფეისბუკპოსტის გამოქვეყნების შემდეგ დაიწყო.
დაკავებამდე ცოტა ხნით ადრე, მიხეილ გრემელაშვილი მის შესახებ მარიამ კუკუნაშვილის დაწერილ პოსტს გამოეხმაურა.
„მოგესალმებით მეგობრებო. მოკრძალებით გთხოვთ, მიუტევოთ ჩემს ნაც დაიკოს რომ სულმთლად გაგიჟდა. ძალიან მიყვარს მაინც და მის მაგივრად მე გიხდით ბოდიშს”, – დაწერა მან.
მიხეილ გრემელაშვილი თელავის საკრებულოში შალაურის ადმინისტრაციული ერთეულის მაჟორიტარ დეპუტატია. დეპუტატად ის 2017 წლის ადგილობრივი თვითმმართველობის არჩევნებზე აირჩიეს.
თავდაპირველად გრემელაშვილი „ქართული ოცნების“ კანდიდატი იყო. თუმცა, საკრებულოში ყოფნის პერიოდში მმართველი პარტია დატოვა და „პატრიოტთა ალიანსში“ გადავიდა.
