თბილისის ზღვის ჰოსპიტლის 2 ექთანი კორონავირუსით დაინფიცირდა

ექთნები, რომლებსაც covid-19 დაუდასტურდათ, სამკურნალოდ თსუ-ს პირველ საუნივერსიტეტო კლინიკაში გადაიყვანეს. ისინი თავს კარგად გრძნობენ. 

6 აპრილის  10:00 საათისთვის, საქართველოში კორონავირუსით ინფიცირების 188  შემთხვევაა დადასტურებული. კარანტინის რეჟიმშია 5056 ადამიანი, ხოლო სტაციონარში მეთვალყურეობის ქვეშ – 386 პირი. კორონავირუსით ინფიცირებულთაგან 36 გამოჯანმრთელდა, 2 გარდაიცვალა.

ინფიცირებულებთან კონტაქტის გამო თბილისის ზღვის ჰოსპიტლის 5 თანამშრომელი კარანტინში გადაიყვანეს.

მას შემდეგ, რაც თბილისის ზღვის ჰოსპიტლის 2 ექთანს covid-19 დაუდასტურდა, კლინიკამ პაციენტების მიღება რამდენიმე საათით შეაჩერა, თუმცა კორონავირუსზე სამედიცინო პერსონალის შემოწმების შემდეგ მუშაობა ისევ განაახლა.

• რას ნიშნავს საგანგებო მდგომარეობა – რისი უფლება გვაქვს და რისი არა
• მარნეული და ბოლნისი დაიკეტა
• მარნეული ეპიდაფეთქების მოლოდინში. რა ხდება დახურულ ქალაქში
• საქართველოში საყოველთაო კარანტინი ცხადდება

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 23 მარტს კორონავირუსის შიდა გავრცელების გამო მარნეული და ბოლნისი დაიკეტა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა.