სუსი ადასტურებს, რომ შეკვეთილი მკვლელობის საქმეზე დაკავებულია რუსეთის მოქალაქე

სახელმწიფო უსაფრთხოების სამსახურის (სუს) განცხადებით, შეკვეთით განზრახ მკვლელობის მომზადების საქმეზე დაკავებულია რუსეთის მოქალაქე.  თუმცა, უწყება არ აკონკრეტებს, ვის ლიკვიდაციას გეგმავდა დაკავებული.  სუს-ის ოფიციალურ განცხადებამდე რამდენიმე საათით ადრე, “მთავარი არხის” დირექტორმა, ნიკა გვარამიამ განაცხადა,  რომ რუსეთის მოქალაქე ვასამბეკ ბოკოვი, რომელიც თბილისში,  ქავთარაძის ქუჩაზე სპეცოპერაციის დროს დააკავეს, ჩეჩნეთის ლიდერის, რამზან კადიროვის დაკვეთით ტელეკომპანია მთავარის ჟურნალისტის, გიორგი გაბუნიას მკვლელობას გეგმავდა.

“ბრალდებული ვ.ბ.-ს დაკავება განხორციელდა შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში, რომელსაც სახელმწიფო უსაფრთხოების სამსახურის კონტრტერორისტული ცენტრი, შესაბამისი ოპერატიული ინფორმაციის საფუძველზე აწარმოებდა,” – აღნიშნულია სუსის განცხადებაში. 

• რამზან კადიროვის დაკვეთით გიორგი გაბუნიას მკვლელობა იგეგმებოდა – ნიკა გვარამია

როგორც უსაფრთხოების სამსახურში განმარტავენ,  რუსეთის მოქალაქეს ბრალი წაუყენეს  საქართველოს სისხლის სამართლის კოდექსის 362-ე მუხლის პირველი ნაწილით, რაც ყალბი დოკუმენტის შეძენა-შენახვას და გამოყენებას გულისხმობს. 

სუსის ინფორმაციით, გამოძიება ისევ გრძელდება, მიმდინარეობს მოწმეთა გამოკითხვა, დანიშნულია არაერთი ექსპერტიზა და საერთაშორისო თანამშრომლობის ფარგლებში, ინტერპოლის არხებით გამოთხოვილია დამატებითი ინფორმაცია. 

მთავარი არხის დირექტორის, ნიკა გვარამიას ინფორმაციით, მკვლელობის დაკვეთის მიზეზი ტელეკომპანია “რუსთავი 2”-ის ეთერში გასული წლის 7 ივლისს გასული ის გადაცემაა, სადაც ჟურნალისტმა გიორგი გაბუნიამ რუსეთის პრეზიდენტს ვლადიმერ პუტინს პირდაპირ ეთერში დედა შეაგინა.