სკანდალი სომხეთში, ახალ და ძველ ხელისუფლებებს შორის
სომხეთში, ძალას იკრეფს ყოფილი და მოქმედი ხელისუფლებების წარმომადგენლებს შორის სკანდალი. კერძოდ, საუბარია სომხეთის ყოფილ ელჩზე ვატიკანში, მიკაელ მინასიანზე, რომელიც სომხეთის ექსპრეზიდენტის, სერჟ სარგსიანის სიძეა და დეპუტატ გრაჩია აკოფიანზე, რომელიც მოქმედი პრემიერ-მინისტრის, ნიკოლ ფაშინიანის ცოლის ძმაა.
სკანდალი მას შემდეგ დაიწყო, რაც მიკაელ მინასიანმა ფაშინიანის მეუღლე ანა აკოფიანი და მისი ძმა სიგარეტის კონტრაბანდის საქმესთან კავშირში დაადანაშაულა. მინასიანის თქმით, აპრილის ბოლოს, ერევნიდან გაფრინდა საგანგებო სიტუაციების სამინისტროს თვითმფრინავი, რომელსაც 40 ტონა სომხური წარმოების სიგარეტი გადაჰქონდა. ბორტი რუსეთის ქალაქ კრასნოდარში დააკავეს.
თავდაპირველად, ამ ბრალდებების საპასუხოდ, და-ძმა აკოფიანებმა მინასიანის წინააღმდეგ სასამართლოში შეიტანეს სარჩელი.
ახლა კი გრაჩია აკოფიანმა Facebook-ის საკუთარ გვერდზე დაწერა, რომ მინასიანის წინააღმდეგ მიმდინარე ერთ-ერთი სისხლის სამართლის საქმის ფარგლებში ჩატარებული ჩხრეკისას, აღმოაჩინეს მისი ძველი კომპიუტერი, რომელშიც სომეხმა პროგრამისტებმა მისი „შავი საქმეების“ დამადასტურებელი ათასობით ფაილის აღდგება მოახერხეს.
ყველა დეტალი: მხარეთა ბრალდებები და უარყოფა
- სასამართლომ სომხეთის ექსპრეზიდენტის სიძის დაპატიმრების გადაწყვეტილება მიიღო
- სასამართლომ სომხეთის ექსპრეზიდენტის სიძის დაპატიმრების გადაწყვეტილება მიიღო
სიგარეტის კონტრაბანდის ისტორია
აპრილის ბოლოს გაჩნდა ინფორმაცია, კრასნოდარში, საგანგებო სიტუაციების სამინისტროს თვითმფრინავის დაკავების შესახებ, რომლითაც ერევნიდან ავღანეთში, კრასნოდარსა და დუშანბეში გაჩერებებით, 40 ტონა სიგარეტი უნდა ჩაეტანათ.
თვითმფრინავში აღმოაჩინეს სომხური აქციზური მარკების მქონე 2 700 ყუთი სხვადასხვა ბრენდის სიგარეტი. დოკუმენტებიდან ამოიღეს, სავარაუდოდ ყალბი ინვოისი და დეკლარაცია.
თემა სომხურ მედიაში იმდენად განხილვადი გახდა, რომ განმარტების გაკეთება მოუწია სახელმწიფო შემოსავლების კომიტეტს. განაცხადეს, რომ სიგარეტის პარტია კანონიერად იყო გატანილი.
«ელექტრონული დეკლარაციის გაფორმება ნიშნავს, რომ მისი გაყალბება შეუძლებელია, იქ მითითებული მონაცემები კი არსებული თანამშრომლობის ფარგლებში, ხელმისაწვდომია ევრაზიის ეკონომიკური კავშირის ქვეყნებისთვის, მათ შორის, რუსეთის საბაჟო ორგანოებისთვის», – ნათქვამია სახელმწიფო შემოსავლების კომიტეტის განცხადებაში.
ამის შემდეგ, სოციალურ ქსელებში გაჩნდა ინფორმაცია იმის შესახებ, რომ ეს პარტია ეკუთვნის გრაჩია აკოფიანს, პრემიერ-მინისტრის ცოლის ძმას.
ამ ინფორმაციის ავტორი გახდა სომხეთის ექსპრეზიდენტის სიძე, მიკაელ მინასიანი, რომელიც ძებნაში იყო.
მან ბოლო პერიოდში, Facebook-ის საკუთარ გვერდზე, დაიწყო ვიდეორგოლების სერიის გამოქვეყნება, სახელწოდებით „სიცრუის დასასრული“. ერთ-ერთ ასეთ ვიდეოში მან განაცხადა, რომ გრაჩია და ანა აკოფიანები დაკავშირებული არიან სიგარეტის კონტრაბანდის საქმესთან.
![ახალი ხელისუფლება, ძველი ხელისუფლება, სომხეთის ყოფილი პრეზიდენტის სიძე, მოქმედი პრემიერ-მინისტრის ცოლის ძმა, ანა აკოფიანის ძმა, გრაჩია აკოფიანი, მიკაელ მინასიანი](https://jam-news.net/app/uploads/2020/06/103583961_262780104804114_8530407578104106936_n.jpg)
ამის საპასუხოდ, და-ძმამ მინასიანის წინააღმდეგ სასამართლოში შეიტანა სარჩელი. ეს მათ 1 ივნისს გააკეთეს. მასში ნათქვამია, რომ ანა და გრაჩია აკოფიანები მიკაელ მინასიანისგან საჯაროდ ბოდიშის მოხდასა და განცხადების უარყოფას მოითხოვენ, რომელსაც ისინი ცილისწამებად აფასებენ. ამასთან, ისინი ზარალის ანაზღაურებასაც მოითხოვენ, რომელიც მათ პატივს, ღირსებასა და საქმიან რეპუტაციას მიადგა.
კომპრომატი მინასიანზე
გრაჩია აკოფიანმა სოციალურ ქსელში, საკუთარ გვერდზე დაწერა, რომ პროგრამისტებმა მინასიანის ძველ კომპიუტერში, დაახლოებით, 9 ათასი ფაილის აღდგენა მოახერხეს.
დეპუტატის თქმით, ამ ფაილებში ინახებოდა ინფორმაცია იმის შესახებ, «ვის და რამდენი ფული მისცა მინასიანმა, ვისგან, რამდენი ფული მიიღო, ვის, რა და რამდენი წაართვა, როგორ გააყალბა არჩევნების შედეგები, ვისი დახმარებით და რა ხრიკებით, ვინ და როგორ მოისყიდა».
![ახალი ხელისუფლება, ძველი ხელისუფლება, სომხეთის ყოფილი პრეზიდენტის სიძე, მოქმედი პრემიერ-მინისტრის ცოლის ძმა, ანა აკოფიანის ძმა, გრაჩია აკოფიანი, მიკაელ მინასიანი](https://jam-news.net/app/uploads/2020/06/103539769_875467756272911_957657328358716312_n.jpg)
ამავდროულად, პრემიერის ცოლის ძმა არ აზუსტებს, საიდან აქვს ინფორმაცია იმის შესახებ, რომ გამოძიებამ მოახერხა ძველი კომპიუტერიდან ინფორმაციის აღდგენა:
«როგორ გახდა ეს ცნობილი? ნება მომეცით, არ ვისაუბრო ამის შესახებ».
მიკაელ მინასიანზე ძებნაა გამოცხადებული. სომხეთში, ბევრი ფიქრობს, რომ ის იტალიაში იმყოფება.
მაგრამ გრაჩია აკოფიანმა განსხვავებული ვარაუდი გამოთქვა:
«საკუთარი ინფორმაცია მაქვს იმის შესახებ, თუ სად იმყოფება ის ახლა. ჩემი მონაცემებით, ის სოჩაშია და დიახ, არ გამოვრიცხავ, რომ ამის შესახებ, სამართალდამცავი ორგანოებისთვისაც იყოს ცნობილი».
აკოფიანის თქმით, მინასიანი სომხეთში უნდა დააბრუნონ, რადგან ეს უკვე „საზოგადოების მოთხოვნაა“.
![ახალი ხელისუფლება, ძველი ხელისუფლება, სომხეთის ყოფილი პრეზიდენტის სიძე, მოქმედი პრემიერ-მინისტრის ცოლის ძმა, ანა აკოფიანის ძმა, გრაჩია აკოფიანი, მიკაელ მინასიანი](https://jam-news.net/app/uploads/2020/06/103533205_569077564040948_5619241608945615611_n.png)