შატილის გზაზე მიკროავტუბუსი ხევში გადავარდა. 17 ადამიანი დაიღუპა, 3 მძიმედ დაშავდა

დუშეთში, შატილის გზაზე, მიკროავტობუსი, სადაც 20 ადამიანი იმყოფებოდა, ხევში გადავარდა. ავარიის შედეგად 17 ადამიანი გარდაიცვალა, 3 კი მძიმედ დაშავდა.

პრემიერ-მინისტრის განკარგულებით, 25 აგვისტო საქართველოში გლოვის დღედ გამოცხადდა.

ავარია დუშეთის მუნიციპალიტეტში, ხევსურეთში, შატილის გზაზე, სოფელ ბისოს სიახლოვეს მოხდა. სამგზავრო მიკროავტობუსი, რომელიც ხევსურეთიდან თბილისში ბრუნდებოდა, გზაზე ჯერ საგზაო დეპარტამენტის კუთვნილ, გაჩერებულ მანქანას დაეჯახა, შემდეგ კი 80 მეტრის სიმაღლიდან, ხევში გადავარდა.  

დაღუპულთა უმრავლესობა ერთი კომპანიის წარმომადგენლები არიან. ისინი ხევსურეთში კორპორატიულ ექსკურსიაზე იმყოფებოდნენ. 

მათი საექსკურსიო ტური და ტრანსპორტირება ტურისტულმა კომპანიამ  – traveler.ge-მ უზრუნველყო.

მიკროავტობუსში მყოფი 20 ადამიანიდან 17 ახალგაზრდა, 30 წლამდე ასაკის ქალი იყო და 3  მამაკაცი. 

გარდაცვლილებს შორის არის ერთი უცხოელი ტურისტიც. 

• როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება

დაშავებულია სამი ქალი. მათ მრავლობითი ტრავმები აქვთ. სამივე მათგანი თბილისის პირველ საუნივერსიტეტო საავადმყოფოში გადაიყვანეს. მათი მდგომარეობა მძიმეა. 

შატილის გზაზე მომხდარი ტრაგედიის გამო “ქართულმა ოცნებამ” 24 და 25 აგვისტოს დაგეგმილი ყველა ღონისძიება გადადო.