ნინო ზაუტაშვილი და ვასილ ივანოვ-ჩიქოვანი საზოგადოებრივი მაუწყებლიდან გაათავისუფლეს
საზოგადოებრივი მაუწყებელი
ჟურნალისტები და ტელეწამყვანები, ვასილ ივანოვ-ჩიქოვანი და ნინო ზაუტაშვილი, რომლებიც საზოგადოებრივი მაუწყებლის ხელისუფლებისადმი მიკერძოებულ სარედაქციო პოლიტიკას ღიად აკრიტიკებდნენ, საზოგადოებრივი მაუწყებლიდან გაათავისუფლეს.
ჟურნალისტების განცხადებით, ტელეკომპანიაში მათ განუმარტეს, რომ გათავისუფლების საფუძველი არხის შიდა მოკვლევის დასკვნაა. ორივე ჟურნალისტი გეგმავს, რომ მაუწყებლის ეს გადაწყვეტილება სასამართლოში გაასაჩივროს.
ივანოვ-ჩიქოვანის და ზაუტაშვილის ვიდეოებს და კომენტარს “საზოგადოებრივი მაუწყებლის მცველები” სოციალურ ქსელში ავრცელებენ.
“დღეს დირექტორთა საბჭომ იმსჯელა და მიიღო გადაწყვეტილება, რომ მე გავეთავისუფლებინე სამსახურიდან. ამ გადაწყვეტილების შესახებ მე რამდენიმე წუთის წინ გამაცნო თინათინ ბერძენიშვილმა. ეს იყო სიტყვიერი შეხვედრა და ამ გადაწყვეტილების ოფიციალური ნაწილი უშუალოდ იურისტისგან და ადამიანური რესურსებისგან მე უნდა ჩამბარდეს”, – ამბობს ვასილ ივანოვ-ჩიქოვანი.
“40 წელი ვიმუშავე საზოგადოებრივ მაუწყებელში, ზუსტად 2 წუთის წინ საზოგადოებრივი მაუწყებლის დირექტორმა თინათინ ბერძენიშვილმა, ელენე მიხაილოვმა და თამარ შუბლაძემ მითხრეს, რომ ჩვენი თანამშრომლობის რესურსი ამოიწურა და სამწუხაროდ უნდა გაგიშვათო, რა თქმა უნდა ეს საქმე წავა სასამართლოში”, – ამბობს ნინო ზაუტაშვილი.
ნინო ზაუტაშვილი და ვასილ ივანოვ-ჩიქოვანი არხის სარედაქციო პოლიტიკას საჯაროდ აკრიტიკებდნენ და სახელისუფლებო გავლენებზე საუბრობდნენ. თებერვლიდან ივანოვ-ჩიქოვანს მაუწყებლის გადაწყვეტილებით 18:00-საათიანი მოამბე აღარ მიჰყავდა.
ვასილ ივანოვ-ჩიქოვანი და ნინო ზაუტაშვილი ტელეარხის ის იშვიათი ჟურნალისტები იყვნენ, რომლებიც საჯაროდ ამბობდნენ, რომ “პირველი არხის“ სარედაქციო პოლიტიკა “ვერ პასუხობს იმ მოთხოვნას, რომელიც არის საზოგადოებაში“.
“ის, რაც ახლა მაუწყებელში ხდება,ძირითადად და არსებითად, ერთი პიროვნების ბრალია“, – დაწერა ივანოვ-ჩიქოვანმა 5 თებერვალს მაუწყებლის სამეურვეო საბჭოს თავმჯდომარეზე, ვასილ მაღლაფერიძეზე, რომელიც “ქართული ოცნების“ თავმჯდომარის ყოფილი მოადგილეა.
მისი ეთერს ჩამოშორება მედიის თავისუფლებისა და ადამიანის უფლებებზე მომუშავე ორგანიზაციებმა შეაფასეს, როგორც რეპრესია თავისუფალი სიტყვის წინააღმდეგ.
