საქართველოში პუტინის კიდევ ერთი კრიტიკოსი არ შემოუშვეს

საქართველოში პუტინის კიდევ ერთი კრიტიკოსი არ შემოუშვეს

საქართველოში კიდევ ერთი რუსი უფლებადამცველი და პუტინის კრიტიკოსი, დარიანა გრიაზნოვა არ შემოუშვეს. ამის შესახებ მან “ფორმულასთან” განაცხადა.

გრიაზნოვა საქართველოში 2021 წლიდან ცხოვრობს და მუშაობს. ის საქართველოში სტამბულიდან ბრუნდებოდა, თუმცა საზღვარზე არ გამოატარეს. გრიაზნოვა მოქალაქეებს, რომლებიც რუსეთში იდევნებიან, მათ შორის ევროპულ სასამართლოებშიც იცავს.

როგორც გრაზნოვა ჰყვება, საზღვარზე ყოველგვარი ახსნა-განმარტებების გარეშე უთხრეს ქვეყანაში შემოსვლაზე უარი. მისი ვარაუდით, უფლებადამცველის არ შემოშვება და დეპორტაცია მის პროფესიულ საქმიანობას უკავშირდება, ვინაიდან ის პუტინის კრიტიკოსია.

გრიაზნოვას თქმით, საქართველოში პუტინის კრიტიკოს ყოველ მეორე უფლებადამცველს უარეს ეუბნებიან შესვლაზე. მისი განმარტებით, საფუძვლიანი ეჭვია, რომ რუსეთის სპეცსამსახურებსა და საქართველოს ხელისუფლებას შორის მჭიდრო თანამშრომლობაა.

“ლოგიკურად თუ ვიმსჯელებთ, არსებობს გარკვეული სია, რომელიც აქვს საქართველოს ხელისუფლებას. წლების განმავლობაში, საჯარო საქმიანობას არ ვეწეოდი, რადგან ვცხოვრობდი რუსეთში, იქ ვიდევნებოდი. ქვეყანა დავტოვე, როგორც კი პირველი ადევნება გაჩნდა. მე მაინტერესებს, საიდან აქვს საქართველოს ხელისუფლებას ინფორმაცია ჩემს შესახებ და ჩემი საქმიანობის შესახებ. არსებობს საფუძვლიანი ეჭვი, რომ რუსეთისა და საქართველოს ხელისუფლების წარმომადგენლები ერთმანეთთან მჭიდროდ თანამშრომლობენ და არასასურველი ხალხის სიებს ერთმანეთს უზიარებენ“, – ამბობს გრიაზნოვა. 

● საქართველოში 17 000-მდე რუსული კომპანიაა და მათი უმეტესობა ომის შემდეგ დარეგისტრირდა – TI
● „თუ საზღვარს ჩაკეტავენ, ერთადერთი გზა დარჩება – გზა ომში“ . რუსეთიდან გამოქცეულების ისტორიები
● გასულ წლებთან შედარებით საქართველოს რუსეთზე ეკონომიკური დამოკიდებულება იზრდება – TI

ბოლო თვეებში, რუსეთიდან და სხვა ქვეყნებიდან კრემლის ბევრ კრიტიკოსს უთხრეს უარი საქართველოში შემოშვებაზე – მიზეზების ახსნის გარეშე. 

უკანასკნელი ასეთი შემთხვევა უკრავშირდება “დოჟდის” ჟურნალისტს ალექსანდრა შევჩენკოს. ის საზღვრიდან 14 დეკემბერს გააბრუნეს.

14 თებერვალს ფონდ “არა ძალადობას” დამფუძნებელი რუსი აქტივისტი და უფლებადამცველი ანა რივინა, რომელიც საკუთარ ქვეყანაში “უცხოელ აგენტად” არის გამოცხადებული, საქართველოში არ შემოუშვეს. 

გასული წლის 5 სექტემბერს კრემლის კიდევ ერთი კრიტიკოსი, რუსი ფოტოჟურნალისტი ვასილი კრესტიანინოვი საქართველოდან უკან გააბრუნეს.

20 ივლისს ქვეყანაში არ შემოუშვეს რუსი ბლოგერი ალექსეი რომანოვი, რომელმაც განაცხადა, რომ ის სომხეთის გავლით საქართველოში მოდიოდა, თუმცა სადახლოს გამშვებ პუნქტზე, მას ქვეყანაში შესვლაზე უარი უთხრეს.

აღსანიშნავია, რომ 16 ივნისს საქართველომ არ შემოუშვა საზღვარზე ყაბარდო-ბალყარელი ბლოგერი, ინსა ლანდერი, რომლის წინააღმდეგ რუსეთში სისხლისსამართლებრივი დევნა მიმდინარეობს.

როდესაც ლანდერმა საზღვრის გადაკვეთა სცადა, ქართველმა მესაზღვრეებმა ის დააკავეს, კაბინეტში შეიყვანეს და ორი საათის განმავლობაში კითხავდნენ. საბოლოოდ მას მისცეს დოკუმენტი, სადაც ეწერა, რომ საზღვრის გადაკვეთაზე უარს ეუბნებოდნენ “სხვა მიზეზების გამო”.

რუსული ოპოზიციური ტელეკომპანია „დოჟდის“ ჟურნალისტმა მიხაილ ფიშმანმა 5 მარტს, საქართველოში თავისი წარუმატებელი მოგზაურობის დეტალების შესახებ ისაუბრა. ის ქვეყანაში არ შემოუშვეს და თბილისის საერთაშორისო აეროპორტიდან უკან გააბრუნეს. საზღვარზე ფიშმანს უარის მიზეზები არ განუმარტეს. 

31 იანვარს, საქართველოში არ შემოუშვეს რუსი ოპოზიციონერი დმიტრი გუდკოვი. მანამდე საქართველოში არ შემოუშვეს რუსი პოლიტიკოსი ლუბოვ სობოლი და ჟურნალისტი ილია აზარი, ასევე, უკრაინელი ჟურნალისტი დმიტრი გორდონი. 

საქართველოს საზღვრიდან უკან გააბრუნეს რუსული დამოუკიდებელი აქტივისტური მედიაჯგუფის, “მედიაზონის” ჟურნალისტი დევიდ ფრენკელიც.

გარდა ამისა, ასევე მიზეზების ყოველგვარი ახსნის გარეშე საქართველოში არ შემოუშვეს რამდენიმე რუსული ოპოზიციური პარტიის წარმომადგენელი, რომლებიც საჯარო საქმიანობას არ ეწევიან და მათი სახელები უცნობია ფართო საზოგადოებისთვის. ამასთან დაკავშირებით არანაირ კომენტარს არ აკეთებენ არც სამართალდამცავ სტრუქტურებში და არც საქართველოს მთავრობაში. 

უკანასკნელი გახმაურებული შემთხვევა კი პუტინის რეჟიმის მოწინააღმდეგე რუს მწერალს და დისიდენტს, დმიტრი ბიკოვს ეხება, რომელიც რამდენიმესაათიანი დაყოვნების შემდეგ შემოუშვეს საქართველოში. როგორც მან ტელეკომპანია “ფორმულას” უთხრა, მესაზღვრეებმა საბუთები ჩამოართვეს და 4 საათის განმავლობაში ბათუმის სასაზღვრო გამშვებ პუნქტში იმყოფებოდა.