საქართველოში ნარკოდანაშაულის ბრალდებით ავტობუსების თურქი მაგნატი, გალიფ ოზთურქი დააკავეს
ვინ არის გალიფ ოზთურქი
31 მაისს საღამოს, ბათუმში, სასტუმრო “ეიფორიაში” ჩატარებული სპეცოპერაციის შედეგად დააკავეს თურქი ბიზნესმენი გალიფ ოზთურქი. მანამდე მთელი დღის განმავლობაში სასტუმროს შენობაში ფინანსთა სამინისტროს საგამოძიებო სამსახური წარმომადგენლები მუშაობდნენ.
შსს-ს მიერ იმავე დღეს გავრცელებულ განცხადებაში ეწერა, რომ სამართალდამცავები იძიებდნენ განსაკუთრებით დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის საქმეს, რის გამოც ოზთურქის კომპანიებში, (მათ შორის სასტუმრო “ეიფორიაში”) შევიდნენ და ჩხრეკა ჩაატარეს.
● თურქული სკოლები საქართველოში – პოლიტიკური ზეწოლის მსხვერპლნი?
● როგორ ცხოვრობს ერთადერთი მუნიციპალიტეტი, სადაც არჩევნები ოპოზიციამ მოიგო. რეპორტაჟი წალენჯიხიდან
● როგორ ვსწავლობთ საქართველოს ისტორიას? სკანდალი სკოლის სახელმძღვანელოების გამო
თუმცა, მიუხედავად ამ ზემოთჩამოთვლილი საქმეებისა, 2 ივნისს გამოქვეყნებული განცხადებით ირკვევა, რომ საბოლოოდ, ოზთურქს, ბრალი არა ფინანსური თაღლითობების, არამედ ნარკოდანაშაულის მუხლით წარუდგინეს. სამართალდამცავთა განცხადებით, ჩხრეკისას ბიზნესმენის საცხოვრებელ ბინაში 7,2159 გრამი კოკაინი იპოვეს.
საქართველოს სისხლის სამართლის კოდექსის 260-ე და 261-ე მუხლების პირველი ნაწილებით გათვალისწინებული ეს დანაშაული 6 წლამდე ვადით თავისუფლების აღკვეთას ითვალისწინებს.
რატომ აღმოჩნდა ქართველი სამართალდამცავების სამიზნე თურქი ბიზნესმენი, რომელიც წლების განმავლობაში აჭარაში განსაკუთრებული პრივილეგიებით სარგებლობდა? რომლის საეჭვო ბიზნესებზე წლების განმავლობაში წერდნენ ადგილობრივი ჟურნალისტები და თვალს ხუჭავდნენ ხელისუფლების წარმომადგენლები.
ვინ არის გალიფ ოზთურქი
გალიფ ოზთურქი სკანდალურად ცნობილი თურქი ბიზნესმენია, რომელიც წლებია აჭარაში ცხოვრობს და საქართველოს მოქალაქეობა აქვს. სამშობლოში ჩასვლა მას არ შეუძლია, რადგან მკვლელობის საქმეზე სამუდამო პატიმრობა აქვს მისჯილი.
ოზთურქს რუსი ცოლი ჰყავს – კრისტინა გაგარკინა.
მედიაში გავრცელებული ინფორმაციით, 2021 წლის ივნისში გალიფ ოზთურქსა და მის მეუღლეს ბათუმში 21-ე შვილი გაუჩნდათ. შვილები მათ სუროგატი დედების დახმარებით გააჩინეს და როგორც მედია წერს, გეგმაში აქვთ 105 შვილის ყოლა. როგორც “რადიო თავისუფლება” წერს, ბათუმში ეჭვობენ, რომ წყვილს სუროგატი დედების დახმარებით გაცილებით მეტი შვილი ჰყავს უკვე გაჩენილი.
ბრიტანულ მედიაში გავრცელებული ინფორმაციით, სუროგატ დედებს ოჯახმა, ჯამში, 160 ათასი ევრო გადაუხადა და 21 ბავშვის მოვლისთვის წელიწადში 96 000 დოლარს ხარჯავდნენ.
ერთ-ერთ ინტერვიუში ბავშვების დედა ამბობს, რომ პირველადი დანიშნულების პროდუქტებზე კვირაში მათ 5000-6000 დოლარი ესაჭიროებოდათ.
გარდა საერთო შვილებისა, პირველი ქორწინებიდან ოზთურქს ექვსი შვილი ჰყავს, კრისტინას – ერთი.
ეს გალიფ ოზთურქის ტვიტერია. მთავარ ფოტოდ თურქეთის პრემიერ-მინისტრის რეჯეპ ტაიპ ერდოღანის ფოტოა დაყენებული. გვერდზე ბევრ ოჯახურ ვიდეოსაც შეხვდებით.
— Galip Öztürk (@Galip_Ozturk) May 3, 2022
ოზთურქი საქართველოში 2018 წლიდან ცხოვრობს, მას შემდეგ რაც თურქეთის უზენაესმა სასამართლომ სამუდამო პატიმრობა მიუსაჯა მკვლელობისთვის.
2018 წლიდან დღემდე ოზთურქმა საქართველოში, კერძოდ კი აჭარაში დიდი ბიზნესიმპერიის აშენება მოასწრო.
თურქი ბიზნესმენი ათობით კომპანიას ფლობს. მის საკუთრებაშია ასევე ბათუმის დიდი და ცნობილი სასტუმროები “ინტურისტი”, „ეიფორია“, „მეტრო სქაი თაუერი” და „ბიზნეს ლეჯენდი”. ასევე ბათუმის უმსხვილესი სავაჭრო ცენტრი „მეტრო სითი”.
როგორც ადგილობრივი მედია აღნიშნავს, თურქი ბიზნესმენი, რომელმაც საქართველოს მოქალაქეობა მიიღო, აჭარაში წლების განმავლობაში განსაკუთრებული პრივილეგიებით სარგებლობდა. გაზეთი “ბათუმელები” არაერთხელ წერდა, რომ ოზთურქმა ბათუმში უნებართვოდ ააშენა მრავალსართულიანი კორპუსები და ქალაქში დიდი მიწის ნაკვეთები შეისყიდა.
2021 წელს ბათუმში, გოგოლის ქუჩაზე, ოზთურქის კომპანიამ ოთხი ექვსსართულიანი და ორი რვასართულიანი შენობა ააშენა. ეს შენობები ისე აშენდა, რომ მათზე ნებართვა არ ყოფილა გაცემული. ამის შესახებ წერდნენ მედიაში, აპროტესტებდნენ ბათუმელები, თუმცა ამ მშენებლობების შეჩერება ვერავინ მოახერხა.
“აი ფაქტის” ინფორმაციით, 2016 წელს, ბათუმში, ახალი ბულვარის ტერიტორიაზე, ოზთურქმა თურქული სკოლა ისე გახსნა, რომ „არც შენობის მშენებლობის ნებართვა ჰქონდა და არც სასწავლო დაწესებულებას გაუვლია ავტორიზაცია“. აჭარის განათლებისა და კულტურის მინისტრი, “ბათუმელებთან” საუბრისას ადასტურებდა, რომ სკოლის გახსნის შესახებ საერთოდაც არ ყოფილა ინფორმირებული.
ოზთურქმა ბათუმელებს თავი შარტავას ქუჩაზე, გზის სავალ ნაწილზე დადგმული ჯიხურითაც დაამახსოვრა – იმ ადგილას, სადაც გალიფ ოზთურქის კუთვნილი კიდევ ერთი კომპანია ჩინელ პარტნიორებთან ერთად, 242 მეტრის სიმაღლის სასტუმროს – „ვესთ თაუერსის“ აშენებას გეგმავდა, პირდაპირ შუა სამანქანო გზაზე, ჯიხური დადგეს. ბათუმელები ამ ჯიხურის აღებას რამდენიმე თვე უშედეგოდ ითხოვდნენ ადგილობრივი ხელისუფლებისგან.
გალიფ ოზთურქის მიერ დაფუძნებული „მეტრო ჰოლდინგი“ დღეისათვის ორმოცდაათამდე კომპანიას აერთიანებს. ოზთურქის მფლობელობაშია ასევე უმსხვილესი ტურისტული გადამზიდავი, ავტობუსების კომპანია “მეტრო”. როგორც ამ ჰოლდინგში აღნიშნავენ, საქართველოში 500 მილიონ ლარზე მეტი ინვესტიცია განხორციელდა.
ჩინელების დასახლება
დღემდე გაურკვეველია, რა მიზნით და ფუნქციით აშენდა ბათუმის ცენტრში, გოგოლის ქუჩაზე რამდენიმე მაღალსართულიანი შენობა, რომელთა ასაშენებლად ოზთურქის კომპანიას ნებართვა არც აუღია.
მიმდინარე წლის დასაწყისში, პარტია ლელოს წევრმა, ირაკლი კუპრაძემ გაავრცელა ინფორმაცია, რომ გალიფ ოზთურქმა ბათუმის ცენტრში 12 კორპუსი უნებართვოდ ააშენა.
კუპრაძე აღნიშნავდა, რომ ეს საცხოვრებელი კორპუსები კი არა, არამედ დახურული IT სივრცე იყო, სადაც ე.წ. ფიშინგის ქოლცენტრი და ონლაინ კაზინოები განთავსდებოდა. კუპრაძე მიუთითებდა, რომ აქ პირადად ბიძინა ივანიშვილის ინტერესი იკვეთებოდა. პოლიტიკოსის თქმით, ამ პროექტის ასამუშავებლად იგეგმებოდა 15 000-მდე ჩინეთის მოქალაქის ჩამოსახლება.
15 თებერვალს იგივე თემაზე ისაუბრა ასევე კიდევ ერთი ოპოზიციური პარტიის, “ერთიანი ნაციონალური მოძრაობის” წევრმა, დავით ხაჯიშვილმაც. ხაჯიშვილმაც თქვა, რომ ბათუმში “უკანონო ქალაქი” შენდება, სადაც 15 000-მა ჩინელმა უნდა იცხოვროს. ხაჯიშვილი ამბობდა, რომ იქ იქნებოდა ფიშინგ ცენტრი, ხოლო ოზთურქის მფარველობაში კი საქართველოს პრემიერმინისტრი, ირაკლი ღარიბაშვილი დაადანაშაულა.
თავად „მეტრო ჰოლდინგმა“ განაცხადა, რომ ამ ადგილას ტექნოპარკის ამოქმედებას გეგმავდა, ხოლო უკანონო მშენებლობა იმიტომ დაიწყო, რომ საქართველოს არ დაეკარგა 250 მილიონი დოლარის ინვესტიცია.
თუკი თავიდან ადგილობრივი ხელისუფლება ნებართვის გარეშე კორპუსების მშენებლობაზე აშკარად თვალს ხუჭავდა, უკვე მოგვიანებით, ოზთურქის კომპანიის დაჯარიმება აქტიურად დაიწყეს სწორედაც უნებართვო მშენებლობის გამო.
როგორც “რადიო თავისუფლებას” ბათუმის მუნიციპალურ ინსპექციაში უთხრეს, უნებართვო მშენებლობის გაგრძელების ფაქტზე, ოზთურქის კომპანიები 56-ჯერ დაჯარიმდა. ამ დროისთვის გოგოლის 11ბ-ში მშენებლობა საერთოდაც შეჩერებულია.
რატომ დააკავეს ოზთურქი? ვერსიები
ბათუმელი უფლებადამცველი, სამოქალაქო აქტივისტი თამაზ ბაკურიძე “რადიო თავისუფლების” ჟურნალისტს უყვება, რომ ერთ-ერთი ვერსიით ოზთურქს უთანხმოება მოუვიდა აჭარის მთავრობის თავმჯდომარესთან, თორნიკე რიჟვაძესთან.
რადიო თავისუფლებასთან საუბარში „ნაციონალური მოძრაობის“ დეპუტატი ბათუმის საკრებულოში, რეზო ხარაზი ამბობს, რომ ოზთურქის “დასჯას” ვერავინ გაბედავდა ბიძინა ივანიშვილის თანხმობის გარეშე.
ხარაზის აზრით, წლების განმავლობაში „ხელისუფლების მფარველობის ქვეშ მყოფი, პრივილეგირებული“ თურქი ბიზნესმენი საქართველოს ხელისუფლებას უკვე აღარ სჭირდება და მის „ჩამოშორებას“ ცდილობს.
მისი თქმით, ის რაც ოზთურქის თავს ხდება, პირდაპირ ბიძინა ივანიშვილის გადაწყვეტილებაა და მიზნად ისახავს ოზთურქის უკანონო საქმიანობასთან კავშირის კვალის წაშლას.
„სხვადასხვა პერიოდში ბათუმში წამოწეულა არაერთი თემა, რომელიც მის [ოზთურქის] უკანონო საქმიანობას უკავშირდებოდა… გოგოლის ქუჩაზე ეს უკანონო „ქალაქი“ ისე ააშენა, რომ ვერცერთი სახელმწიფო სტრუქტურა მას ვერ მიეკარა… ბიძინა ივანიშვილის გარეშე რიჟვაძე [აჭარის მთავრობის თავმჯდომარე] ვისი შემავიწროებელი იყო?!“, – გვეუბნება რეზო ხარაზი.
ვინ არის გალიფ ოზთურქი
