საქართველოში ხბოების შესახებ ტექნიკური რეგლამენტი 2028 წლიდან ამოქმედდება
საქართველოში ხბოების შესახებ ტექნიკური რეგლამენტი ამოქმედდება
სურსათის ეროვნული სააგენტოს უფროსის მოადგილის, ვასილ ბასილაძის თქმით, ხბოების შესახებ ტექნიკური რეგლამენტი 2028 წლის პირველი იანვრიდან ამოქმედდება. ამის შესახებ ბასილაძემ სპეციალურ ბრიფინგზე განაცხადა.
მისივე განმარტებით, ეს არის ერთგვარი რეკომენდაცია, რომლის მიხედვითაც, ფერმერებმა უნდა მოაწყონ ცხოველების შენახვის პირობები იმგვარად, რომ მოხდეს მისი პროდუქტიულობის გაზრდა. როგორც ბასილაძე აღნიშნავს, დადგენილება ითვალისწინებს ინდუსტრიულ ფერმებს და არა საოჯახო წარმოების ფერმებს:
“ინდუსტრიულ ფერმებზეა საუბარი, სადაც დიდი რაოდენობით ცხოველია. დოკუმენტი ეხება ინდუსტრიულ ფერმებში ცხოველების შენახვის წესის გაუმჯობესებას, რათა მოხდეს პროდუქტიულობის გაზრდა და უვნებელი სურსათის წარმოება.”
სეს-ის უფროსის მოადგილე ასევე აღნიშნავს, რომ ხბოების შესახებ ტექნიკური რეგლამენტის დამტკიცება “გარკვეული მედიასაშუალებების მიერ სრულიად არაადეკვატურად იქნა აღქმული და გააზრებული”. მისივე შეფასებით, ეს საზოგადოებაში “ევროკავშირთან დაახლოების მიზნით მიმდინარე უმნიშვნელოვანეს საქმიანობას ჩრდილს აყენებს და ნეგატიური განწყობის ჩამოყალიბებას უწყობს ხელს”.
საქართველოს მთავრობამ ხბოს დაცვის რეგლამენტი 30 აგვისტოს დაამტკიცა. დოკუმენტში დეტალურად გაწერილია, რა პირობებში უნდა ჰყავდეთ ფერმერებს ხბოები – როგორ უნდა იყოს მოწყობილი სადგომი და როგორ უნდა დასუფთავდეს ის, რა აღჭურვილობაა საჭირო ხბოების ჯანმრთელობისა და კეთილდღეობისთვის, რა პირობები სჭირდებათ ქცევითი და ფიზიოლოგიური საჭიროებების დასაკმაყოფილებლად, ასევე, როგორ უნდა იკვებებოდნენ ისინი და ა.შ.
სურსათის ეროვნული სააგენტოს განცხადებით, ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) ფარგლებში, საქართველოს მხარეს აღებული აქვს ვალდებულება, ეროვნული კანონმდებლობა ევროკავშირის კანონმდებლობას დაუახლოოს.
