საქართველოში ჩამოსულ ბიზნესვიზიტორებს მთავრობა 2 ალტერნატივას სთავაზობს: 2-კვირიანი კარანტინი ან PCR-ტესტირება
ხელისუფლების გადაწყვეტილებით, ბიზნესვიზიტორები საქართველოში ნებისმიერი ქვეყნიდან შეუფერხებლად შემოვლენ. საქართველოში საქმიანი ვიზიტით ჩამომსვლელებს საქართველოს მთავრობა 2 სავალდებულო მოთხოვნას უყენებს: ქვეყანაში ჩამოსვლის შემდეგ მათ 2-კვირიანი სავალდებულო კარანტინი უნდა გაიარონ და ხარჯი თვითონ დაფარონ, ან ჩამოსვლიდან პირველი ორი კვირის განმავლობაში რეგულარულად, ყოველ 72 საათში ერთხელ საკუთარი სახსრებით PCR-ტესტი გაიკეთონ. ბიზნესვიზიტორებს კიდევ 2 პირობის დაკმაყოფილება მოუწევთ: მათ stopcov.ge-ზე სპეციალური ფორმა უნდა შეავსონ და ვიზიტი შესაბამის დარგობრივ უწყებას წინასწარ შეუთანხმონ.
ეს მოთხოვნა არ ეხებათ ევროკავშირის წევრი იმ 5 ქვეყნის ( გერმანია, საფრანგეთი, ლატვია, ლიეტუვა და ესტონეთი) მოქალაქეებს, რომლებსაც საქართველომ საზღვრები უპირობოდ გაუხსნა.
„ქვეყნებს შორის შეუფერხებელი მიმოსვლა ბიზნესვიზიტორებისთვის ძალიან მნიშვნელოვანია. ბიზნესვიზიტორებს ვთავაზობთ ორ ალტერნატივას: თუ ხანგრძლივი დროით ჩამოდიან, შესაძლოა, არჩიონ ორკვირიანი კარანტინი თავისი ხარჯით. შესანიშნავ მომსახურებას ვთავაზობთ საქართველოს სხვადასხვა წერტილში. თუ უფრო მოკლევადიანი ვიზიტია, შეიძლება, აირჩიონ რეგულარული „პისიარ“ ტესტირება. როგორც წესი, უფრო ნაკლები დროით ჩამოდის ბიზნესვიზიტორი, რადგან დრო ძალიან ძვირად ფასობს. აქედან გამომდინარე, ალბათ ამ მეორე ოფციას აირჩევს,” – ამბობს ეკონომიკის მინისტრი, ნათია თურნავა.
საქართველოს მთავრობაში არ აკონკრეტებენ, როგორ შემოვლენ საქმიანი ვიზიტით ბიზმესმენები საქართველოში, მაშინ, როცა საერთაშორისო ფრენები აღდგენილი არ არის.
დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, PCR-ტესტის ფასი საქართველოს ლაბორატორიებში 150-250 ლარის ფარგლებში მერყეობს.