საქართველოს ეკონომიკა 2020 წელს 4-ის ნაცვლად 5%-ით შემცირდება

საქართველოს ეროვნული ბანკის პროგნოზით, 2020 წელს საქართველოს ეკონომიკა 5%-ით შემცირდება. აქამდე ეროვნული ბანკი 4%-იან ვარდნას პროგნოზირებდა.

“წლის პირველ ნახევარში საქართველოში ეკონომიკა 5,8%-ით შემცირდა. ამ ეტაპზე ჩვენ ვფიქრობთ, რომ განახლებული პროგნოზით 2020 წლისათვის ეკონომიკური ვარდნა საქართველოში -5 პროცენტი იქნება, წინა პროგნოზი 4 პროცენტი იყო,” – განაცხადა ეროვნული ბანკის პრეზიდენტმა. 

• კორონავირუსი ლილოში. ფოტორეპორტაჟი

• როგორ ცხოვრობს 800 კაციანი ქორწილების გარეშე დარჩენილი მარნეული

კობა გვენეტაძე ეკონომიკის ვარდნის პროგნოზის გაუარესებას კორონავირუსის შედეგად შექმნილ რთულ სიტუაციას უკავშირებს, რომელმაც მსოფლიო ეკონომიკებზე დიდი გავლენა იქონია. 

სტატისტიკის ეროვნული სამსახურის ცნობით, 2020 წლის ივნისში საქართველოს მთლიანი შიდა პროდუქტი (მშპ) წინა წლის იმავე პერიოდთან შედარებით 7.7%-ით შემცირდა. პირველი ექვსი თვის ეკონომიკური ზრდის საშუალო მაჩვენებელი მინუს 5.8%-ს აღწევს, წლის მეორე კვარტალში კი საქართველოს ეკონომიკა 12.6%-ით არის შემცირებული.

კლება განსაკუთრებით მკვეთრი იყო აპრილში, როცა მშპ 16.6%-ით შემცირდა.

მაისში ეკონომიკური ზრდა მინუს 13.5% იყო.