საქართველო თხილის ექსპორტიდან 100 მლნ დოლარის შემოსავალს ელოდება
10 სექტემბრის მონაცემებით, საქართველოდან ექსპორტზე 2 648 ტონა თხილი გავიდა. წელს საქართველოში 50 000 ტონა თხილის მოსავალს ელიან.
თხილის მოსავლის აღება უკვე დასრულდა სამეგრელოში, გურიასა და კახეთში.
საქართველოს თხილის მწარმოებელთა ასოციაციის თავმჯდომარე, მერაბ ჭითანავა აცხადებს, რომ საქართველო წელს თხილის ექსპორტიდან 100 მლნ აშშ დოლარის შემოსავალს მიიღებს.
“ძალიან კარგი მოსავალი მივიღეთ გასულ წლებთან შედარებით. შარშან და შარშანწინ ფაროსანას და სხვა მავნებელების გამო თხილის მოსავალიც ცოტა იყო და ხარისხიც დაბალი. ფაქტობრივად, კოლაფსი გვქონდა თხილის ინდუსტრიაში. 2019 წელს ხარისხის ვარდნა შევაჩერეთ. წელს თხილის მოსავლის რაოდენობა 50 000 ტონას აჭარბებს და ველოდებით 100 მლნ დოლარის შემოსავალს,” – ამბობს ჭითანავა.
• აზიური ფაროსანა ხალხის წინააღმდეგ. რეპორტაჟი სამეგრელოდან, სადაც თხილს ნაგავში ყრიან
ქართული თხილი ექსპორტზე ძირითადად, ევროკავშირში გადის.
წელს ქართული თხილი გაიყიდა:
● გერმანიაში – 789 ტონა
● იტალიაში – 511 ტონა
● ჩეხეთში – 198 ტონა
● ესპანეთში – 127 ტონა
● პოლონეთში – 88 ტონა
● საფრანგეთში – 81 ტონა
● ლიეტუვაში – 62 ტონა
ქართული თხილი ექსპორტზე გადის ასევე ისეთ ქვეყნებში, როგორიცაა:
● სომხეთი – 202 ტონა,
● რუსეთი – 109 ტონა
● უკრაინა – 61 ტონა
● ბელარუსი – 43 ტონა
● ბრაზილია – 38 ტონა
ამჟამად 1 კგ თხილის შესასყიდი ფასი ადგილობრივ ბაზარზე 6 ლარია.
მეთხილეობა საქართველოში საბჭოთა კავშირის დაშლის შემდეგ, დამოუკიდებლობის პერიოდში განვითარდა, თანაც სახელმწიფოს დაფინანსებული პროგრამების და ყოველგვარი ხელშეწყობის გარეშე.
ამჟამად საქართველოში თხილი დაახლოებით 70 ათას ჰექტარზეა გაშენებული. პლანტაციების ძირითადი ნაწილი დასავლეთ საქართველოზე – სამეგრელოზე და ასევე გურიაზე მოდის.
თხილი შედის საქართველოს უმსხვილესი საექსპორტო საქონლის ათეულში.
2018 წელს საქართველოდან ექსპორტზე 69,5 მლნ აშშ დოლარის ღირებულების ( 12 923.7 ტონა) თხილი გავიდა, ხოლო 2019 წელს 66,7 მლნ აშშ დოლარის ღირებულების (13 355.8 ტონა).
![](https://jam-news.net/app/uploads/2020/09/Screen-Shot-2020-09-11-at-15.43.39-1024x703.png)