საქართველო გმობს ცხინვალში ჩატარებულ ე.წ. საპრეზიდენტო არჩევნების მეორე ტურს
საქართველო გმობს ცხინვალში ჩატარებულ ე.წ. საპრეზიდენტო არჩევნების მეორე ტურს
საქართველოს საგარეო სამინისტრო სპეციალურ განცხადებას ავრცელებს, სადაც გმობს 8 მაისს რუსეთის მიერ ოკუპირებულ ცხინვალის რეგიონში ჩატარებულ ე.წ. საპრეზიდენტო არჩევნების მეორე ტურს.
როგორც უწყებაში აცხადებენ, მსგავსი უკანონო ქმედებები ეწინააღმდეგება საერთაშორისო სამართლის ფუნდამენტურ პრინციპებს, ნორმებს და უხეშად არღვევს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში.
“რუსეთის ოკუპაციისა და ადგილზე ეფექტური კონტროლის პირობებში, ვერავითარ არჩევნებს ვერ ექნება რაიმე სამართლებრივი შედეგი, როდესაც აფხაზეთისა და ცხინვალის რეგიონიდან ქართველთა ეთნიკური წმენდის შედეგად გამოდევნილი ასობით ათასი ლტოლვილი და იძულებით გადაადგილებული პირი ჯერ კიდევ მოკლებულია საკუთარ სახლში უსაფრთხო და ღირსეული დაბრუნების შესაძლებლობას, ხოლო ადგილზე მცხოვრები ადამიანების ფუნდამენტური უფლებები და თავისუფლებები უხეშად ირღვევა. საქართველოს ოკუპირებულ რეგიონებზე რუსეთის ეფექტური კონტროლი და მისი პასუხისმგებლობა ადამიანის უფლებების დარღვევებზე მკაფიოდაა დადასტურებული ადამიანის უფლებათა ევროპული სასამართლოს 2021 წლის 21 იანვრის გადაწყვეტილებით.” – ნათქვამია სამინისტროს განცხადებაში.
სამინისტრო ასევე მოუწოდებს რუსეთის ფედერაციას, პატივი სცეს საქართველოს სუვერენიტეტსა და ტერიტორიულ მთლიანობას და შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება.
ოკუპირებული ცხინვალის რეგიონში საპრეზიდენტო არჩევნებზე დათვლილია ხმათა 85%. ლიდერობს პარტია “ნიხასის” ლიდერი, ალან გაგლოევი. გაგლოევს დათვლილი ხმების 53.67% (14 505 ხმა) აქვს აღებული, ხოლო ოკუპირებული რეგიონის მოქმედ ლიდერს, ანატოლი ბიბილოვს – 41.3% (11 099).
ბიბილოვმა ე.წ. არჩევნებში დამარცხება უკვე აღიარა და ალან გაგლოევს გამარჯვება მიულოცა.
“ვთვლი, რომ არჩევნები შედგა, რეზულტატი ყველამ იცით. ალან ედუარდოვიჩს, სამხრეთ ოსეთის რესპუბლიკის ხალხის საკეთილდღეოდ, წარმატებულ მუშაობას ვუსურვებ და ვიმედოვნებ, რომ მას ყველაფერი გამოუვა.” – განაცხადა ბიბილოვმა.
ცხინვალის ე.წ. საპრეზიდენტო არჩევნების მეორე ტურზე თითქმის ყველა ოპოზიციური პარტია მხარს ალან გაგლოევს უჭერდა. არჩევნების შემდეგ ანატოლი ბიბილოვი ოკუპირებული ცხინვალის რუსეთთან შეერთების საკითხთან დაკავშირებით ე.წ. რეფერენდუმის ჩატარებას აპირებდა.
ალან გაგლოევი 41 წლისაა. ოპოზიციური პარტია „ნიხასის“ ლიდერი იგი 2020 წელს გახდა. ცხინვალის კგბ-ს იქამდე უცნობი ოფიცერი, პოლიტიკაში 2017 წელს, საპრეზიდენტო საარჩევნო კამპანიის დროს გამოჩნდა. მაშინ მან ამომრჩეველთა ხმების 11 პროცენტი მოიპოვა.
