WSJ: კონგრესმა, შესაძლოა, რუსული კანონის ინიციატორთა სანქცირებაზე კანონი მიიღოს
სანქციები რუსული კანონის გამო
აშშ-ის კონგრესის საგარეო ურთიერთობათა კომიტეტის წევრი და ჰელსინკის კომისიის თავმჯდომარე ჯო უილსონი, საქართველოში მომხდარი მოვლენების საპასუხოდ კანონპროექტის ინიციირებას გეგმავს, რომლის მიხედვით, სანქციები დაუწესდებათ იმ პირებს, ვინც რუსული კანონის მიღებაზეა პასუხისმგებელი, ამის შესახებ ინფორმაცია თავდაპირველად The Wall Street Journal-მა გაავრცელა, შემდეგ კი ჰელსინკის კომისიამ დაადასტურა.
კანონპროექტის მიხედვით, პასუხს აგებენ ის პირებიც, ვინც სხვა უკანონობებზეა პასუხისმგებელი, მაგალითად ელიტური კორუფცია, რუსეთის სანქციების თავიდან არიდება და სხვა დანაშაულებრივი ქმედებები.
ამავდროულად, კანონპროექტის თანახმად, საქართველოსთან გაძლიერდება სავაჭრო, კულტურული და სამხედრო თანამშრომლობა ქვეყნის პრორუსული კურსის შეცვლის შემდეგ.
“ეს შეიძლება იყოს გადამწყვეტი მომენტი საქართველოს დემოკრატიული მომავლისთვის, რადგან მისი მოქალაქეები ცდილობენ შეაჩერონ ავტორიტარული კონტროლის ინსტრუმენტი.” – აღნიშნულია WSJ-ის სტატიაში.
● რუსული კანონი საბოლოო ვერსიით, ფიზიკურ პირებსაც შეეხება
● “ჩვენ ძალიან მძიმე ფაზაში შევდივართ” – ანალიტიკოსები ო’ბრაიენის ვიზიტს აფასებენ
● „საქართველოს რუსიფიკაცია გაართულებს სომხეთის რუსეთისგან დაშორებას” – მოსაზრება ერევნიდან
დღესვე ჰელსინკის კომისიამ გაავრცელა ინფორმაცია, რომლის მიხედვით “საქართველოს სუვერენიტეტისა და დემოკრატიის დასაცავად” 4 ივნისს მოსმენა გაიმართება.
განცხადებიდან ვიგებთ, რომ მოსმენაზე კითხვებს უპასუხებენ დარგის ექსპერტები, საქართველოში აშშ-ს ყოფილი ელჩი, უილიამ კორტნი, საქართველოს ყოფილი ელჩი ევროკავშირში, ნატალია საბანაძე და ფონდი ღია საზოგადოება – საქართველოს ევროინტეგრაციის პროგრამის მენეჯერი, ვანო ჩხიკვაძე.
“ევროკავშირის ოფიციალურმა პირებმა უკვე ნათლად განაცხადეს, რომ ასეთი კანონმდებლობის სრული ამოქმედება ქვეყნის ევროკავშირში გაწევრიანების მისწრაფებებს მოსპობს. ევროპარლამენტმა მიანიშნა, რომ გარკვეული პრივილეგიები, რომლითაც საქართველო სარგებლობს ევროკავშირთან, მათ შორის ვიზალიბერალიზაცია, შეიძლება რისკის ქვეშ დადგეს. შეერთებულ შტატებში, კონგრესმა და სახელმწიფო დეპარტამენტმა პირობა დადეს, რომ დაიცავენ და მხარს დაუჭერენ ქართველი ხალხის ძლიერ და ხანგრძლივ დემოკრატიულ და ევროატლანტიკურ არჩევანს, მათ შორის პოტენციურად ინდივიდუალური ვიზების აკრძალვის, ფინანსური სანქციების, დახმარების პაკეტების გადახედვისა და სხვა ზომების მეშვეობით. მიუხედავად ყველაფრისა, ქართული ოცნების ხელისუფლება პროდემოკრატიულ და პროდასავლურ მოსახლეობას მათი ნების საწინააღმდეგოდ მიათრევს მოსკოვისკენ და მზადაა ამ გზაზე დიდი ზიანი მიაყენოს ქვეყანას”. – წერს ჰელსინკის კომისია.
