გაერთიანებულმა სამეფომ მოსამართლეთა კლანის წევრებს, ლევან მურუსიძეს და მიხეილ ჩინჩალაძეს ფინანსური სანქციები დაუწესა
სანქციები ლევან მურუსიძეს და მიხეილ ჩინჩალაძეს
გაერთიანებულმა სამეფომ მოსამართლეთა კლანის წევრებს, მიხეილ ჩინჩალაძესა და ლევან მურუსიძეს სანქციები დაუწესა. დოკუმენტის მიხედვით, სანქცირებულ მოსამართლეებს გაეყინებათ ბრიტანეთის ტერიტორიაზე, მათ კუთვნილებაში არსებული ყველა სახის ქონება, მათ შორის, ფინანსური ანგარიშები.
დოკუმენტში ჩინჩალაძისა და მურუსიძის მიერ რეჟიმის სასურველ გადაწყვეტილებებზეა საუბარი. ასევე, გამახვილებულია ყურადღება მათ კორუფციულ შესაძლო კავშირებზე.
გაერთიანებული სამეფოს მთავრობის მიერ გავრცელებულ დოკუმენტში ნათქვამია, რომ გადაწყვეტილება მიღებულია “2018 წლის სანქციებისა და ფულის გათეთრების საწინააღმდეგო აქტის” საფუძველზე და ითვალისწინებს ფინანსური სანქციების დაკისრებას.
აღნიშნული სანქციები გულისხმობს ფინანსური სახსრებისა და ეკონომიკური რესურსების გაყინვას იმ პირებისთვის, რომლებიც მონაწილეობდნენ ან მონაწილეობენ სერიოზულ კორუფციაში.
დოკუმენტი მოუწოდებს თავი შეიკავონ იმ სახსრებთან ან ეკონომიკურ რესურსებთან ურთიერთობისგან, რომლებიც სიაში მყოფ პირებს ეკუთვნით, თუ არ არსებობს ფინანსური სანქციების განხორციელების ოფისის (OFSI) ნებართვა ან სხვა სახის გამონაკლისი.
“გაერთიანებული სამეფოს ფინანსური სანქციების შეუსრულებლობა ან მისი დადგენილების გვერდის ავლის მცდელობა შეიძლება იყოს სისხლის სამართლის დანაშაული”. – წერია დოკუმენტში.
მიხეილ ჩინჩალაძის სანქციები
დოკუმენტის მიხედვით, არსებობს საფუძვლიანი ეჭვი, რომ მიხეილ ჩინჩალაძე “2021 წლის გლობალური ანტიკორუფციული სანქციების შესახებ რეგულაციის” ფარგლებში შემდეგი მიზეზების გამო ექცევა:
“თბილისის სააპელაციო სასამართლოს თავმჯდომარის რანგში მან [მიხეილ ჩინჩალაძემ] მიიღო ფინანსური სარგებელი, როგორც ჯილდო საკუთარი საჯარო ფუნქციების არასათანადოდ შესრულებისთვის. კერძოდ, მან არამართლზომიერად გამოიყენა თავისი გავლენა, რათა სასამართლოს გადაწყვეტილებები და მოსამართლეების დანიშვნები მმართველი პარტია ქართული ოცნების სასარგებლოდ წარმართულიყო.
მან მიიღო უპირატესობა თბილისის სააპელაციო სასამართლოში უვადო დანიშვნის სახით, რაც მიზნად ისახავდა მისი საჯარო ფუნქციების გაგრძელებას ისე, რომ სასამართლოს გადაწყვეტილებები კვლავ ქართული ოცნების სასარგებლოდ ყოფილიყო”. – ნათქვამია დოკუმენტში.
ლევან მურუსიძის სანქციები
ლევან მურუსიძესთან დაკავშირებით დოკუმენტში წერია: “საქართველოს იუსტიციის უმაღლესი საბჭოს წევრის რანგში მან ასვე მიიღო ფინანსური სარგებელი, როგორც ჯილდო საკუთარი საჯარო ფუნქციების არასათანადოდ შესრულებისთვის, რისთვისაც გლობალური ანტიკორუფციული სანქციების რეგულაციის 2021-ის ფარგლებში მოხვდა.
კერძოდ, მან არამართლზომიერად გამოიყენა თავისი გავლენა, რათა სასამართლოს გადაწყვეტილებები და მოსამართლეების დანიშვნები მმართველი პარტია ქართული ოცნების სასარგებლოდ წარმართულიყო.
საქართველოს იუსტიციის უმაღლესი საბჭოს წევრის რანგში მან მიიღო უპირატესობა, თბილისის სააპელაციო სასამართლოში უვადო დანიშვნის სახით, რაც მიზნად ისახავდა სასამართლო სისტემის მართვას ისე, რომ მოსამართლეების დანიშვნა და სასამართლოს გადაწყვეტილებები მმართველი პარტია ქართული ოცნების ინტერესებს მომსახურებოდა”.
დიდი ბრიტანეთისა და ჩრდილოეთ ირლანდიის გაერთიანებულმა სამეფომ, 2024 წლის 19 დეკემბერს, ხუთ ქართველ მაღალჩინოსანს სანქციები დაუწესა. დასანქცირებულთა შორის არიან, საქართველოს შინაგან საქმეთა მინისტრი ვახტანგ გომელაური და მისი მოადგილე, განსაკუთრებულ დავალებათა დეპარტამენტის უფროსი “ხარება” და მისი მოადგილე და თბილისის პოლიციის უფროსი.
ბრიტანეთის მთავრობის განმარტებით, ეს ხუთი ქართველი მაღალჩინოსანი პასუხისმგებელია ჟურნალისტებსა და მშვიდობიან მომიტინგეებზე ძალადობრივ თავდასხმებზე.
სანქციები მოჰყვა დიდი ბრიტანეთის გადაწყვეტილებას, შეაჩეროს საქართველოს მთავრობის მხარდაჭერის ყველა პროგრამა, მათ შორის, თავდაცვის სექტორში. ასევე, შეზღუდოს თანამშრომლობა “ქართულ ოცნებასთან”.
