კომენტარი: "სამშობლოს ღალატის“ მუხლით მთავარ დარტყმას მივიღებთ ჩვენ, წინააღმდეგობის მოძრაობის წევრები
“სამშობლოს ღალატის“ მუხლი
მმართველ პარტიას დღეს ჩვენ უფრო დიდ საფრთხეს ვუქმნით, რომლებიც წინააღმდეგობის მოძრაობაში ვართ, ვიდრე ის პოლიტიკური ოპონენტები, რომლებსაც ოპოზიციას ვუწოდებთ, ამიტომ მთავარ დარტყმას მიიღებენ ის ადამიანები [სამოქალაქო სექტორის წარმომადგენლები], რომლებიც „ქართულ ოცნებას“ როგორც რეჟიმს, ყველაზე დიდ საფრთხეს უქმნის – ასე ეხმაურება ახალდაფუძნებული მოძრაობა “სოციალური დემოკრატიისთვის“ წევრი და კონსტიტუციონალისტმა ვახუშტი მენაბდე ოცნების მიერ დაანონსებულ ახალ საკანონმდებლო ინიციატივას იმასთან დაკავშირებით, რომ სისხლის სამართლის კოდექსს “სამშობლოს ღალატის“ მუხლი დაემატება.
ვახუშტი მენაბდის შეფასებით, ეს არის სტიგმატიზაციის მცდელობა, რომ ადამიანები გარკვეული სახელის ქვეშ მოაქციონ და გააშავონ. ამასთან, მისივე თქმით, “ქართული ოცნების“ მიერ შემოღებული კანონები აჩვენებს იმას, რომ მმართველი პარტია პროტესტს ძველი კანონებით ვეღარ უმკლავდება.
“ქართული ოცნების“ გადაწყვეტილებით, სისხლის სამართლის კოდექსს დაემატება “სამშობლოს ღალატის“ მუხლი. შესაბამისი გადაწყვეტილების შესახებ განცხადება “ქართული ოცნების“ აღმასრულებელმა მდივანმა მამუკა მდინარაძემ უმრავლესობის სხდომის დასრულების შემდეგ ბრიფინგზე გააკეთა.
მდინარაძის თქმით, მუხლი თავის დროზე “ნაციონალურმა მოძრაობამ“ ამოიღო კოდექსიდან.
ვახუშტი მენაბდე:
“დღეს ქვეყანაში სამართალი არ მოქმედებს, მხოლოდ პოლიტიკური დაპირისპირებაა წინააღმდეგობის მოძრაობასა და რეჟიმს შორის. მმართველი პარტიის ამ ინიციატივას სამართლებრივი მიზნები არ აქვს, არამედ ეს პროპაგანდაა.
სამშობლოს ღალატისთვის ადამიანის მსჯავრდადების შემოღება „ქართულ ოცნებას“ ერთადერთი მიზნით დასჭირდა, რომ პროპაგანდა გააძლიეროს. ეს სტიგმატიზაციის მცდელობაა, რომ ადამიანები გარკვეული სახელის ქვეშ მოაქციონ და გააშავონ. მმართველ პარტიას დღეს ჩვენ უფრო დიდ საფრთხეს ვუქმნით, რომლებიც წინააღმდეგობის მოძრაობაში ვართ, ვიდრე ის პოლიტიკური ოპონენტები, რომლებსაც ოპოზიციას ვუწოდებთ.
ზოგიერთ შემთხვევაში მმართველი პარტიისთვის ასეთი ოპოზიცია საჩუქარიც კი არის, იმდენად სუსტები არიან. დღეს 50 პოლიტპატიმარია ქვეყანაში და ამ ადამიანებს არავითარი პოლიტიკური აფილიაცია არ გააჩნიათ. ამიტომ ამ კანონის შემდეგ, მთავარ დარტყმას მიიღებენ ის ადამიანები, რომლებიც “ქართულ ოცნებას“ როგორც რეჟიმს ყველაზე დიდ საფრთხეს უქმნის.
დღეს ისე არავინ არის დაცული, როგორც პოლიტიკური პარტიები, ამიტომ “ქართული ოცნება“ ეცდება ყველანაირი საშუალების გამოყენებით, მიმდინარე პროტესტი ჩაახშოს. “ქართული ოცნება“ ძველი კანონებით ვერ უმკლავდება ამ პროტესტს, ამიტომ ახალი უსამართლო კანონები შემოაქვთ.”
ვახუშტი მენაბდემ, ასევე, ყურადღება გაამახვილა 17 თებერვალს დაფუძნებული მოძრაობის – “სოციალური დემოკრატიისთვის“ გეგმებსა და მიზნებზე. მისი თქმით, მოძრაობის მთავარი მიზანია, რომ ქვეყანაში მიმდინარე პროტესტის კერები გაძლიერდეს და პროტესტი პატარა ჯგუფების ალიანსად იქცეს.
საქართველოს მოქალაქეებმა ახალი მემარცხენე პოლიტიკური მოძრაობა, “სოციალური დემოკრატიისთვის” 17 თებერვალს დააფუძნეს. ამ დროისთვის მოძრაობას 100-ზე მეტი წევრი ჰყავს. მოძრაობის წევრები ძირითადად პროევროპული აქციების მონაწილეები არიან.
ვახუშტი მენაბდე:
“ჩვენი მოძრაობა დაფუძნდა ისეთ თანაბარ საწყისებზე, წვერებს შორის, როგორი თანასწორიც გვინდა ეს ქვეყანა იყოს, რომ ყველას მიუწვდებოდეს ხელი ეკონომიკურ, პოლიტიკურ, კულტურულ და სოციალურ სიკეთეებზე, სწორედ ამიტომ არ გვყავს ხელმძღვანელები.
მოძრაობის მიზანია, რომ ხელი შევუწყოთ და გავაძლიეროთ არსებული წინააღმდეგობის მოძრაობა, რომელიც დღეს ამ რეჟიმის დასამარცხებლად იბრძვის. ჩვენ ვხედავთ, რომ ამ წინააღმდეგობიდან ახალი საქართველო იბადება. ჩვენ გვინდა, ჩვენი მთელი ეს გამოცდილება და კავშირები გამოვიყენოთ, რომ დამატებითი მოტივაცია შევქმნათ ამ წინააღმდეგობაში ჩართულობისათვის. ვცდილობთ, რომ კონკრეტული თემების გარშემო საზოგადოებრივი ჯგუფები მოვაბილიზოთ.
ამ პროტესტმა აჩვენა, რომ კონკრეტულ საკითხებთან დაკავშირებით ერთიანობაა საჭიროა. ჩვენ გვაქვს მყარი კავშირები სხვადასხვა საპროტესტო კერებთან საქართველოში და გვინდა მხარი დავუჭიროთ და გავაძლიეროთ. პროტესტი უნდა იქცეს პატარა ჯგუფების ალიანსად. აქამდე პროტესტი ემყარებოდა ინდივიდუალურ ძალისხმევას, ახლა ადამიანებმა უნდა იპოვონ საკუთარი თავი და გაერთიანდნენ ჯგუფებად თავიანთი ინტერესებიდან გამომდინარე.“
