რუსული კანონი საბოლოო ვერსიით, ფიზიკურ პირებსაც შეეხება
რუსული კანონი
რუსული კანონის საბოლოო ვერსიით, იუსტიციის სამინისტროს უფლებამოსილ ჩინოვნიკს ფიზიკური პირების პერსონალური მონაცემების, მათ შორის საიდუმლოებებისა და “განსაკუთრებული კატეგორიის მონაცემების” – სქესობრივი ცხოვრების, ფილოსოფიური და სხვაგვარი მრწამსის, პოლიტიკური შეხედულებების, პროფესიული კავშირის წევრობის შესახებ ინფორმაციისა და სხვა ცნობების მოძიების უფლება ექნება.
კანონის თავდაპირველ ვერსიაში ფიზიკურ პირებზე არაფერი ეწერა, თუმცა “ქართულმა ოცნებამ” აღნიშნული ჩანაწერი მესამე მოსმენის დროს ჩაამატა, რომელსაც ოპოზიცია არ ესწრებოდა.
კანონის საბოლოო ვარიანტის მე-8 მუხლის მე-3 პუნქტში წერია:
„ყველა ის პირი, ორგანო, ორგანიზაცია, დაწესებულება, რომელსაც საქართველოს იუსტიციის სამინისტროს მიერ უფლებამოსილი პირი მოსთხოვს ამ ინფორმაციის წარდგენას, ვალდებულია დაუყოვნებლივ წარუდგინოს მას თავის ხელთ არსებული აღნიშნული ინფორმაცია“.
„ახლა კანონის საბოლოო რედაქციაში უკვე ღიად, აშკარად წერია, რომ ულიმიტო და შეუზღუდავი დაჯარიმებების მექანიზმი ინფორმაციის და საიდუმლოს, ულიმიტოდ და შეუზღუდავად გაცემის ვალდებულება ფიზიკურ პირებზეც ვრცელდება“, – ეუბნება იურისტი საბა ბრაჭველი “რადიო თავისუფლებას”.
საქართველოს იუსტიციის სამინისტროს მიერ უფლებამოსილი პირისთვის მის მიერ ამ კანონის შესაბამისად მოთხოვნილი ინფორმაციის წარუდგენლობა − გამოიწვევს დაჯარიმებას 5 000 ლარის ოდენობით.
ის, რომ კანონი ეხება არა მხოლოდ ორგანიზაციებს, დაადასტურა პარლამენტის თავმჯდომარემ შალვა პაპუაშვილმაც.
„ტყუილია, თითქოს, ამ ჩანაწერებით ფიზიკური პირების რეგისტრაციაზეა საუბარი, აბსოლუტური ტყუილია, – თქვა პარლამენტის სპიკერმა, თუმცა, დაამატა, რომ ორგანიზაციის შესწავლისას “ყველა ვალდებულია, როგორც ორგანიზაცია, ისე ფიზიკური პირი, მიაწოდოს ინფორმაცია [სახელმწიფოს].“
