რუსთაველის გამზირზე საპროტესტო აქცია გრძელდება

რუსთაველის გამზირზე მრავალათასიანი საპროტესტო აქცია კვლავ გრძელდება. ისინი აპროტესტებენ უცხოური გავლენის აგენტების შესახებ კანონპროექტებს და ითხოვენ დაკავებული მომიტინგეების უპირობო გათავისუფლებას. მიუხედავად ორივე მიმართულებით ხელისუფლების მიერ თითქოს უკან დამხევი ნაბიჯებისა, აქციის მონაწილეები არ ენდობიან მმართველი ძალის დაპირებებს.

ერთი მხრივ, ხელისუფლებამ გააკეთა განცხადება კანონპროექტის უკან გაწვევის შესახებ, თუმცა ამავდროულად განაცხადა, რომ გაწვევის შემდეგაც გააგრძელებს ამ კანონპროექტზე მსჯელობას. მეორე მხრივ, კი შინაგან საქმეთა სამინისტრომ გაათავისუფლა ადმინისტრაციულ საქმეებზე დაკავებული 130-ზე მეტი პირი, მაგრამ სამართალწარმოება მათ საქმეებზე არ შეწყვეტილა. ასევე, კვლავ დაკავებულია რამდენიმე მომიტინგე სისხლის სამართლის საქმეებზე. მომიტინგეები ითხოვენ საქმის წარმოების შეწყვეტას ყველა ტიპის საქმეზე და დარჩენილი დაკავებული პირების გათავისუფლებასაც.

თბილისის აქციის პარალელურად მიმდინარეობს მრავალრიცხოვანი საპროტესტო აქცია ბათუმშიც. გთავაზობთ გაზეთ “ბათუმელების” პირდაპირ ჩართვას ფეისბუქ გვერდიდან.

აქციის დაწყებამდე ქართული ოცნების ცენტრალურ ოფისში უმრავლესობის სხდომა გაიმართა. ამის შესახებ ინფორმაცია და ფოტოები “ქართულმა ოცნებამ” თავად გაავრცელა. “ქართული ოცნებისა” და “ხალხის ძალის” დეპუტატებმა განიხილეს უცხოური გავლენის გამჭვირვალობის შესახებ კანონპროექტის უკან გაწვევა. ამ გადაწყვეტილებას უმრავლესობამ ერთხმად დაუჭირა მხარი.