რუსმა ნობელის პრემიის ლაურეატმა თავისი პრემია მოკლულ ჟურნალისტებს მიუძღვნა

„ნოვაია გაზეტას“ რედაქტორი ნობელის პრემიის ლაურეატია 

რუსული „ნოვაია გაზეტას“ რედაქტორმა დმიტრი მურატოვმა, რომელიც ნობელის მშვიდობის პრემიის ლაურეატი გახდა, განაცხადა, რომ ჯილდოს გაზეთის მოკლულ ჟურნალისტებს უძღვნის. 

“იგორ დომნიკოვი, იური შჩეკოჩიხინი, ანა პოლიტკოვსკაია, სტას მარკელოვი, ანასტასია ბაბუროვა, ნატაშა ესტემიროვა – აი, ამ ადამიანებმა მიიღეს დღეს ნობელის მშვიდობის პრემია“, – განაცხადა მურატოვმა. 

ნობელის კომიტეტის გადაწყვეტილებით, „ნოვაია გაზეტას“ მთავარი რედაქტორი ნობელის მშვიდობის პრემიის 2021 წლის ლაურეატი გახდა ფილიპინელ ჟურნალისტ მარია რესასთან ერთად. ორივე ჟურნალისტმა პრემია მიიღო „ძალისხმევისთვის აზრის თავისუფლების შესანარჩუნებლად, როგორც აუცილებელი პირობის დემოკრატიისა და მშვიდობისათვის“.

მურატოვმა განაცხადა, რომ ნობელის პრემიის ნაწილის „სიკეთის წრეში“ გადარიცხვას გეგმავს, რომელიც მძიმე და იშვიათი დაავადებების მქონე ბავშვებს ეხმარება.

დმიტრი მურატოვი 1993 წელს „ნოვაია გაზეტას“ (თავდაპირველად – „ახალი ყოველდღიური გაზეთის“) ერთ-ერთი თანადამფუძნებელი გახდა.  

ის მრავალი წელია სათავეში უდგას გამოცემას, მისი ხელმძღვანელობით გაზეთი აშუქებდა ჩეჩნეთის ომის, გლობალური და რუსული კორუფციის, ადამიანების დევნისა და უფლებების დარღვევის თემებს. გამოცემის ჟურნალისტები 60-ზე მეტი პროფესიული პრემიის ლაურიატები გახდნენ, პულიცერის პრემიის ჩათვლით. 

გაზეთის ექვსი თანამშრომელი მოკლეს თავისი პროფესიული საქმიანობის გამო. ესენი არიან: იგორ დომნიკოვი (2000 წ.), იური შჩეკოჩიხინი (2003 წ.), ანა პოლიტკოვსკაია (2006 წ.), ანასტასია ბაბუროვა (2009 წ.), ასევე, რედაქციასთან ერთად მომუშავე ადვოკატი სტანისლავ მარკელოვი (2009 წ.) და უფლებადამცველი ნატალია ესტემიროვა (2009 წ.).

მურატოვი – ნობელის პრემიის პირველი ლაურეატია რუსეთიდან საბჭოთა კავშირის დაშლის შემდეგ.