სოფელი ხაშურში, სადაც მგლებს კეტით იგერიებენ. ფერადი ხინკალი თელავიდან. რეგიონული ამბების დაიჯესტი
რეგიონული მედიის დაიჯესტი
იმერეთის სოფელ სორმონში სახანძრო ვერ მიდის
იმერეთში, წყალტუბოს მუნიციპალიტეტის სოფელ სორმონში მცხოვრებლები სოფლის გზების შეკეთებას ითხოვენ. სოფლის გზა დანგრეული და ორმოებით სავსეა. ადგილობრივები გამოცემა „ქუთაისიპოსტთან“ იხსენებენ, რომ გზა იმდენად დაზიანებულია, ზოგჯერ სასწრაფო და სახანძრო მანქანები სოფელში ვერ მიდიან:
“სახანძრო გამოიძახა მეზობელმა და მანქანა ტალახში ჩავარდა, ხანძარიც ჩვენ ჩავაქრეთ და მანქანაც ჩვენ ამოვიყვანეთ“, – ამბობენ სოფლის მცხოვრებლები გამოცემასთან.
წყალტუბოს მერიაში გამოცემას უთხრეს, რომ წელს ამ გზის შეკეთებას არ გეგმავენ.
ვრცლად: kutaisipost.ge
ხუთკომლიანი სოფელი ხაშურში, სადაც მგლებს კომბლით იგერიებენ
ხაშურში, სოფელ ყელეთში, მხოლოდ ხუთი ოჯახია შემორჩენილი. გამოცემა Qartli.ge წერს, რომ სოფელს მხოლოდ ის ოჯახები შემორჩნენ, ვისაც ბევრი ძროხა და ცხვარი ჰყავს. ერთ-ერთი ასეთი ნოდარ ლომიძეა.
„ათ მეტრში მოვარდა მგელი, ჩემ თვალწინ გაიტაცა ცხვარი” , – ნოდარი გამოცემას სოფლის პრობლემებზე უყვება და იხსენებს, როგორ უწევს ხანდახან მგლების კეტით მოგერიება.
ვრცლად: qartli.ge
თემაზე – რა პრობლემები აქვთ სოფლებს, ნახეთ „ჯემნიუსის“ ვრცელი პროექტი:
ქუთაისის მერია 16 ათას ლარად კლიპს გააკეთებს, რომლითაც ხალხს მოუყვება რა გააკეთა გასულ წელს
გასულ, 2022 წელს გაწეულ სამუშაოებზე მერიას არც მედიისთვის და არც ხალხისთვის ანგარიში არ ჩაუბარებია. და, როგორც ჩანს, ამას არც აპირებს, რადგან გადაწყვიტა, გასული წელი კლიპით შეაჯამოს. ეს კლიპი 16 ათასი ლარი დაჯდება.
ამ ვიდეორგოლის გადასაღებად მერიამ უკვე გამოაცხადა ტენდერი და ითხოვს, რომ კლიპი განსაკუთრებით მაღალი რეზოლუციის კადრებით მომზადდეს.
ვრცლად: kutaisipost.ge
მარნეულის მერია წელს 5 მილიონ ლარამდე თანხას დახარჯავს გზების შესაკეთებლად
მარნეულის მუნიციპალიტეტის ადგილობრივი თვითმმართველობა, 2023 წელს, გზების შესაკეთებლად 4, 5 მილიონ ლარს დახარჯავს. რადიო “მარნეულის” ინფორმაციით, მარნეულში გზების ნახევარზე მეტი შესაკეთებელია.
ვრცლად: marneulifm.ge
სამცხე-ჯავახეთში ცხვრებს აცრიან
სურსათის ეროვნულმა სააგენტომ, სამცხე-ჯავახეთის რეგიონში, ცხვრის და თხის ყვავილის საწინააღმდეგო პროფილაქტიკური ვაქცინაცია დაიწყო. რეგიონში 40 ათასი ცხვრის აცრაა დაგეგმილი.
უწყების ინფორმაციით, ცხვრისა და თხის ყვავილის შემთხვევა საქართველოში 1997 წლის შემდეგ აღარ დაფიქსირებულა, თუმცა, ბოლო წლებში (მათ შორის 2022 წელს) გამოვლინდა მეზობელ რეგიონებში, რაც ზრდის ქვეყანაში დაავადების შემოჭრა-გავრცელების რისკს.
ვრცლად: sknews.ge
ფერადი ხინკალი თელავიდან
თელავში მცხოვრები, 27 წლის ია ლაგაზაშვილი, ფერად ხინკლებსა და პელმენებს ამზადებს და ყიდის. ია პროფესიით მედდაა და თელავის საავადმყოფოში მუშაობს, ხინკლებს კი თავისუფალ დროს, ან საღამოს საათებში, სამსახურის შემდეგ აკეთებს.
ფერადი ხინკლების იდეა მაშინ გაუჩნდა, როცა, მისი უჭმელი შვილებისთვის საკვების გამრავალფეროვნებაზე ფიქრობდა. ასე აღმოაჩინა, რომ ბოსტნეულის – ჭარხლის, სტაფილოსა და ისპანახის წვენში მოზელილი ცომით ფერადი ხინკლები გამოდიოდა, მერე, მოგვიანებით, ეს აღმოჩენა ბიზნესად აქცია.
ახლა უკვე იას წითელ-ყვითელ ხინკლებსა და პელმენებს, თელავში ყველა იცნობს.
ვრცლად: knews.ge
ბებნისის სკოლის მოსწავლეებს კორეულ ენას შეასწავლიან
ქარელის მუნიციპალიტეტის სოფელ ბებნისის სკოლის მოსწავლეები კორეულ ენას შეისწავლიან. ეს ერთადერთი სკოლა მუნიციპალიტეტის მასშტაბით, სადაც კორეული ენის სწავლება იგეგმება. პროექტი ერთ წელიწადს გაგრძელდება.
ვრცლად: mozaikanews.ge
ნათლისღების რიტუალი გაყინულ ტბაში – ფოტორეპორტაჟი ჯავახეთიდან
19 იანვარს, ნათლისღების დღესასწაულზე, ჯავახეთში, ფარავნის გაყინულ ტბაზე ტრადიციული განბანვის რიტუალი შეასრულეს. ამ რიტუალის შესასრულებლად, გაყინულ ტბაში ჯვრის ფორმის ყინულს ჭრიან და მოქალაქეები გაყინულ წყალში შედიან.
ნახეთ ამ რიტუალის ამსახველი ფოტორეპორტაჟი, რომელის ნინოწმინდის რადიო „ნორის“ ფოტოგრაფმა გადაიღო: nor.ge
რეგიონული მედიის დაიჯესტი
