რატომ უწოდა კირიენკომ აფხაზეთის ომის მონაწილე ქართველებს “ნეონაცისტები”?
კირიენკომ ქართველებს ნეონაცისტები უწოდა
აფხაზეთის დე-ფაქტო პრეზიდენტის ბადრა გუნბას ინაუგურაციაზე რუსეთის პრეზიდენტის ადმინისტრაციის ხელმძღვანელის მოადგილემ, სერგეი კირიენკომ, რომელიც სოხუმისა და ცხინვალის მიმართულების ახალი კურატორია, აფხაზების ომი ქართველებთან “ნეონაციზმთან” ბრძოლად მოიხსენია.
“აფხაზეთი იყო პირველი რესპუბლიკა პოსტსაბჭოთა სივრცეში, რომელიც ნეონაციზმს შეეჩეხა,” – განაცხადა კირიენკომ ინაუგურაციაზე.
“უკვე მაშინ ნეონაცისტური დაჯგუფებების წარმომადგენლები, რომელთაც დღეს “სპეციალური სამხედრო ოპერაციით” ჩვენ ვებრძვით, აფხაზეთის წინააღმდეგ იბრძოდნენ”, – თქვა კირიენკომ.
საინტერესოა, რომ ტერმინი “ნეონაციზმი”, რომელიც დღეს რუსულ პოლიტიკურ დისკურსსა და პროპაგანდაში უკრაინელებისა და უკრაინელების მხარდამხარ მებრძოლ უცხოელების მიმართ აქტიურად გამოიყენება, 90-იანების კონფლიქტების კუთხით პირველად ითქვა.
რატომ გამოიყენა პირველად რუსეთის ოფიციალურმა წარმომადგენელმა აფხაზეთის ომის ქართველი მონაწილეების მიმართ ეს ტერმინი?

თავის მოსაზრებას კონფლიქტოლოგი პაატა ზაქარეიშვილი გვთავაზობს:
“დე-ფაქტო პრეზიდენტის ინაუგურაციაზე აფხაზეთში სერგეი კირიენკომ გამოიყენა ტერმინი “ნეონაციზმი”, რისთვისაც ტრიბუნა კარგად გამოიყენა. კირიენკომ კარგად იცოდა, რომ ეს სიტყვა გავრცელდებოდა.
მან, ფაქტობრივად, საქართველოს უწოდა “ნეონაცისტური” სახელმწიფო 90-იანი წლებიდან მოყოლებული. ეს რუსეთში აქამდე არ ყოფილა არასდროს”, – ამბობს ზაქარეიშვილი.
კონფლიქტოლოგის აზრით, კირიენკომ სცადა დღეს რუსეთში უკრაინის წინააღმდეგ აქტიურად გამოყენებული ტერმინი “ნეონაცისტები” ქართველი ხალხის ისტორიისთვისაც მოერგო.
“კირიენკომ პრინციპში თქვა, რომ ქართულ სახელმწიფოს “ნეონაციზმის” მეტი არაფერი არ გაუკეთებია საბჭოთა კავშირის დაშლიდან დღემდე. ეს კარგად ჯდება რუსეთის კონცეფციაში უკრაინის წინააღმდეგ და აჩვენებს რას ებრძვის “კეთილშობილი” რუსეთი მსოფლიოში – “ნეონაციზმს”.
“ამას ებრძვის უკრაინაში მოსკოვი რუსი პოლიტიკოსის თქმით, და სწორედ ეს “ნეონაციზმი” იყო საქართველოშიც”, – ფიქრობს ზაქარეიშვილი.
ალან გაგლოევის მიერ ინაუგურაციაზე თავის გამოსვლაში იგივე ტერმინის გამოყენება.
ზაქარეიშვილი ამბობს, რომ “ალან გაგლოევმა ჰარმონიაში მოიყვანა ტერმინ “ნეონაციზმის” გამოყენება ამ ღონისძიების ფარგლებში. გაგლოევი უკრაინაზე საუბრობდა, თუმცა მინიშნება აშკარად იყო საქართველოზე. მას ეს შემთხვევით ადგილზე სპონტანურად არ მოუფიქრებია, დაწერილი ტექსტი წაიკითხა, რაც წინასწარ შეთანხმებული საერთო გეგმის ნაწილი იყო”.
“ჩემი აზრით, ამ კონტექსტში სინქრონულად ჯდება ის ფარსი, რაც ახლა ხდება თბილისში თეა წულუკიანის კომისიასთან დაკავშირებით. ეს კომისია ავლენს საქართველოს პასუხისმგებლობას 2008 წლის ომთან მიმართებაში. ეს ყველაფერი ერთმანეთთან კავშირშია და ეს ტერმინი ინაუგურაციაზე შემთხვევით არ გაჟღერებულა”, ფიქრობს ზაქარეიშვილი.
კონფლიქტოლოგი ვარაუდობს, რომ წულუკიანის კომისიის დასრულების შემდეგ რუსეთი გააკეთებს სერიოზულ განცხადებას, შესაძლოა პუტინის დონეზეც კი, სადაც შეაქებს საქართველოს ხელისუფლებას.
“მოსკოვის პოზიცია იქნება, რომ საქართველო თავისუფლდება “ნეონაცისტური” ბოროტებისგან და რუსეთი უკვე მზად იქნება უკვე “განწმენდილ” საქართველოსთან, რომელიც მოინანიებს თავის ცოდვებს, დაიწყოს საუბარი ახალი ურთიერთობების ჩამოყალიბებაზე. ეს კარგად გათვლილი, წინასწარ დაგეგმილი სტრატეგიაა,” – ასკვნის ზაქარეიშვილი.