რეგიონის ამბები

27.03.2023

ქუთაისში დაიბადა გოლიათი ბავშვი. მარნეულში იზეიმეს ნოვრუზ ბაირამი. მდინარე ტანაში კალმახს ამრავლებენ. რეგიონული ამბების დაიჯესტი

რა ხდება საქართველოს რეგიონებში

„საირმის“ მუშებმა პროტესტი შეწყვიტეს. როგორ დასრულდა 36 დღიანი გაფიცვა

გაფიცვის შემდეგ, რომელიც ერთ თვეზე მეტხანს გაგრძელდა, „საირმე მინერალ ვოთერსის“ თანამშრომლებმა პროტესტი შეწყვიტეს. ქარხანაში დასაქმებულები ხელფასის მატებისა და შრომის პირობების გაუმჯობესების მოთხოვნით, 13 თებერვალს გაიფიცნენ. ისინი ხელმძღვანელობასთან შეხვედრას ითხოვდნენ.

საბოლოოდ, ხელმძღვანელობა იძულებული გახდა გაფიცულების მოთხოვნებს დამორჩილებოდა. შედეგად, გაიზრდება დასაქმებულების ხელფასი, ანაზღაურდება ღამის ცვლაში, ზეგანაკვეთური და უქმე დღეებში მუშაობა.

ვრცლად: kutaisipost.ge

სურამში ხალხი სასმელ წყალს უკვე საპროტესტო აქციებით ითხოვს

საპროტესტო აქცია დაბა სურამში. ფოტო: რადიო მოზაიკა.

რა ხდება საქართველოს რეგიონებში — საპროტესტო აქცია დაბა სურამში. ფოტო: რადიო მოზაიკა.

„წლებია ვითხოვთ წყალი და გზა გაგვიკეთონ. ახალგაზრდები გარბიან უკვე სოფლიდან, რადგან აქ არანაირი პირობა არ არის“, – შიდა ქართლში, დაბა სურამში მცხოვრებლებმა სასმელი წყლის მოთხოვნით საპროტესტო აქცია გამართეს.

როგორც ადგილობრივები ჰყვებიან „რადიო მოზაიკასთან“ წლებია მერიაში ითხოვენ ამ პრობლემის მოგვარებას, მაგრამ უშედეგოდ.

ვრცლად: mozaikanews.ge

როგორ ცხოვრობს ხალხი შიდა ქარს სოფლებში, ნახეთ “ჯემნიუსის” დოკუმენტურ ფილმში – სოფელი ხოვლე

ქარელში ორ მილიონამდე ლარს დახარჯავენ სკვერის მოსაწყობად

შიდა ქართლში, ქარელში, მერიამ გადაწყვიტა, რომ ერთი სკვერის გაკეთებაში ბიუჯეტიდან ორ მილიონამდე ლარი დახარჯოს.

მერიაში ამბობენ, რომ ეს პროექტის სავარაუდო ღირებულებაა და თანხის ოდენობა მაშინ დაზუსტდება, როდესაც მზა პროექტს მიიღებენ.

ვრცლად: mozaikanews.ge

სამცხე-ჯავახეთში დააჯარიმეს ოთხი ჩინოვნიკი დეკლარაციის ცუდად შევსების გამო

საჯარო სამსახურის ბიურომ, ქონებრივი დეკლარაციის დარღვევებით შევსების გამო, ოთხი საჯარო მოხელე დააჯარიმა. მათ შორის, რეგიონის გუბერნატორის მოადგილე, ახალქალაქის პოლიციის უფროსი და ახალქალაქისა და ბორჯომის საკრებულოს წევრები.

ყველაზე მეტი ჯარიმა, 710 ლარი, გუბერნატორის მოადგილეს, ზურა ხაჩიძეს დაუწერეს. მას დეკლარაციაში ყველაზე მეტი დარღვევა ჰქონდა.

ვრცლად: sknews.ge

ნინოწმინდაში ქუჩაში ვაჭრობა აკრძალეს

ნინოწმინდაში ქალაქის ცენტრალურ ქუჩებში ვაჭრობა აკრძალეს. ვაჭრობა აიკრძალა სკოლების, სახელმწიფო შენობების, ისტორიული, კულტურული და რელიგიური ობიექტების მიმდებარედაც.

ქუჩაში ვაჭრობით ნინოწმინდაში ბევრი ოჯახი ირჩენდა თავს. ახალი ბაზარი, სადაც მათ გადასვლას სთავაზობენ, ჯერ ისევ არ მუშაობს. თან, ეს ბაზარი ისეთ ადგილზეა, რომ იქ მყიდველი იშვიათად ხვდება. ამიტომ, ამ აკრძალვას მოვაჭრეების დიდი უკმაყოფილება მოჰყვა.

ვრცლად: nor.ge

თელავში მუნიციპალური ავტობუსები ფასიანი გახდება

15 აპრილიდან თელავში შიდა ტრანსპორტით გადაადგილება ფასიანი გახდება. ტარიფად 70 თეთრია განსაზღვრული. საჯარო და კერძო სკოლების მოსწავლეებს მგზავრობაში ფულს ისევ არ გადაახდევინებენ. კიდევ ვინ იმგზავრებს უფასოდ, ვრცლად წაიკითხავთ გამოცემა „სპექტრის“ მასალაში.

ვრცლად: speqtri.ge

შიდა ქართლის მდინარე ტანაში „წითელ ნუსხაში“ შეტანილ ნაკადულის კალმახს ამრავლებენ

შიდა ქართლში, მდინარე ტანაში გაუშვეს „წითელ ნუსხაში“ შეტანილი ნაკადულის კალმახის ასი ათასი ქვრითი. მიზანი ტანაში ამ პოპულაციის აღდგენა და გამრავლებაა.

ტანა შემთხვევით არ შერჩეულა. 2022 წელს შიდა ქართლში დაარსდა ტანასა და თეძამის დაცული ტერიტორიები და ეს ადგილი გამოირჩევა ფლორისა და ფაუნის მრავალფეროვნებით. მათ შორის, „წითელ ნუსხაში“ შეტანილი სახეობების სიმრავლით

ვრცლად: qartli.ge

ლაგოდეხელმა ახალგაზრდებმა ქალაქის ხეები გააციფრულეს

კახეთში, ლაგოდეხში მცხოვრებმა ახალგაზრდებმა შექმნეს ციფრული რუკა, რომელზეც ქალაქში არსებული ყველა ხე დაიტანეს. ამ რუკას ურბანული ხეების რუკა ჰქვია. ურბანული ხე არის ყველა ის ხე, რომელიც კონკრეტული ქალაქის ტერიტორიაზეა და ეს ხეები მნიშვნელოვნად ამცირებს ეკოლოგიურ საფრთხეებს.

Google Map-ის სპეციალურად შექმნილ გვერდზე ამ დროისთვის უკვე 30 ხის ისტორიაა დატანილი. ეს არის მათი წარმომავლობა, ისტორია, სახეობის დამახასიათებელი დეტალები. ახალგაზრდებს კიდევ 100 ხის შესწავლა აქვთ დაგეგმილი.

ვრცლად: knews.ge