გორში საბავშვო ბაღი გაქურდეს. მარნეულში მაღაზიიდან ფული მოიპარეს. საგარეჯო დაისეტყვა. დაიჯესტი

რა ხდება რეგიონებში

ოკუპირებულ ხურვალეთში მცხოვრები ვალია ვანიშვილი აღდგომას მარტო შეხვდა 

გორში, ხურვალეთში მცხოვრები ვალია ვანიშვილი, რომელიც ამ სოფლის ერთადერთი მცხოვრებია, აღდგომას რუსი ჯარისკაცების პირისპირ, მარტო შეხვდა. რადიო “მოზაიკის” ინფორმაციით, ოკუპანტებმა მის ნათესავებს მასთან ჩასვლის უფლება არ მისცეს.  

“ზერტიდან უნდა მოსულიყვნენ დათას ნათესავები და არ შემოუშვეს. მაღლიდან არ უშვებენ ხოლმე აქ, რუსები არ უშვებენ…. როგორ დავტოვო ეს არემარე და რუსებმა იქეიფონ? რუსმა მითხრა, რომ ესო ჩვენი მიწააოო” შენი მიწა რუსეთშია, ომი რომაა, იქ წადი, აქ რა გინდა, -მეთქი?” – ეუბნება ვალია ვანიშვილი გამოცემას.  

ვრცლად: mozaikanews.ge 

კახეთში 18 წლის ბიჭმა მეზობელი, 71 წლის ქალი მოკლა 

კახეთში, ახმეტაში, 18 წლის ახალგაზრდამ მეზობლად მცხოვრებ ქალს ცეცხლსასროლი იარაღიდან ესროლა. დაჭრილი ქალი საავადმყოფოში გადაიყვანეს, მაგრამ, მისი გადარჩენა ვერ შეძლეს.  გამოცემა “კახეთის ხმა” მეზობლებზე დაყრდნობით წერს, რომ კონფლიქტი ყოფით ნიადაგზე დაიწყო.

 ვრცლად: knews.ge 

“დაგვიბრუნეთ კინოთეატრი” – ქუთაისში კინოთეატრის გახსნისთვის ხელმოწერებს აგროვებენ  

ქუთაისს, უდიდესი კულტურისა და ისტორიის მქონე ქალაქს, სადაც კინოთეატრები ჯერ კიდევ მე-20 საუკუნის დასაწყისში ფუნქციონირებდა, დღეს კინო აღარ აქვს. „კინო საქართველო“, რომელიც ქუთაისელებს თითქმის 20-წლიანი ლოდინის შემდეგ გაუხსნეს, გასული წლის სექტემბრიდან აღარ ფუნქციონირებს.  

იმისათვის, რომ კინოთეატრი ისევ გაიხსნას, ქუთაისში პეტიცია შექმნეს და ხელმოწერების შეგროვება დაიწყეს.  
 
ვრცლად: kutaisipost.ge 

გელათში ფრესკების გადასარჩენად სპეციალისტების ახალი ჯგუფი იმუშავებს 

გელათში, სადაც წყალი ჩავიდა და უნიკალური ფრესკები განადგურდა, სპეციალისტების ჯგუფი ჩამოდის. მხატვრობის კონსერვაციის ჯგუფმა ტაძრის მხატვრობის გრაფიკული სქემა უნდა შეადგინოს. Როგორც გამოცემა “ქუთაისიპოსტი” წერს, გადაიხედება და განახლდება გენერალური/მართვის გეგმაც.  

Გელათი 2019 წელს გადახურეს. დაახლოებით ერთ თვეში, ახალი კრამიტი დაზიანდა და ტაძარში წყალი ჩავიდა.  

ვრცლად: kutaisipost.ge 

ვარძიის იმ უბნებს, სადაც ქვათაცვენის საფრთხეა, ბადეებით გაამაგრებენ 

 
ვარძიის კლდეში ნაკვეთ კომპლექსზე იმ უბნებს, საიდანაც ქვების ჩამოვარდნის საფრთხე არსებობს, დამცავი ბადეებით გაამაგრებენ. Საუბარია 800 კვ. მ არეალზე. გამოცემა Sk News-ის ინფორმაციით, კულტურული მემკვიდრეობის დაცვის სააგენტომ დამცავი ბადეების მოსაწყობად ტენდერი 306 070 ლარზე გამოაცხადა.  

ვრცლად: sknews.ge 

ნინოწინდის ქუჩებში ორმოები მომრავლდა 

ნინოწმინდაში, ცენტრალურ ქუჩებზე, ორმოები მომრავლდა. მძღოლები ჩივიან, რომ დანგრეული გზა მოძრაობას აფერხებს და ავარიულ სიტუაციებს ქმნის. ვითარება კიდევ უფრო რთულდება წვიმის დროს.  

რადიო “ნორის” ინფორმაციით, ამ გზის შესაკეთებლად, წელს, ადგილობრივი ბიუჯეტიდან 300 ათასი ლარია გამოყოფილი. ტენდერი, სამუშაოების შემსრულებლის შესარჩევად, 5 აპრილს გამოცხადდა.  

ვრცლად: nor.ge 

გორში საბავშვო ბაღი გაქურდეს 

გორში, კომბინატის დასახლებაში, საბავშვო ბაღი გაქურდეს. როგორც ბაღის ხელმძღვანელმა qartli.ge-ს განუცხადა, ქურდი შენობაში სავარაუდოდ ფანჯრიდან შევიდა. გამოცემის ინფორმაციით, ბაღიდან წაიღეს კომპიუტერი, ტელევიზორი და მუსიკალური ცენტრი.  

“დილით როდესაც მოვედი სამსახურში, დარაჯმა მითხრა, რომ ფანჯარა იყო ღია. ჩვენი ფანჯრები მეტალოპლასტმასიისა და როგორც ვვარაუდობთ, ფეხი დაარტყეს და ისე გააღეს”, – ამბობს ბაღის დირექტორი გამოცემასთან. 

ვრცლად: qartli.ge 

მარნეულში, სოფელ ყიზილაჯილოში მაღაზიიდან ფული და სიგარეტი მოიპარეს 

მარნეულის მუნიციპალიტეტის სოფელ ყიზილაჯლოში, 12 აპრილს, გამთენიისას სასურსათო მაღაზია გაქურდეს. წაღებულია სიგარეტი და ფული. შემთხვევის ადგილზე მყოფი სასურსათო მაღაზიის მფლობელი ალიმ იმანოვი რადიო მარნეულთან საუბარში ამბობს, რომ ქურდობის ფაქტი სათვალთვალო კამერებმაც დააფიქსირა. 
 
„ქურდობა დაახლოებით დილის 4-5 საათებში მოხდა. სიგარეტი და ფულია წაღებული. დაახლოებით 3 000 ლარი. ჯერ დაზუსტებულად მიჭირს თქმა ზუსტად რა თანხაზეა და სიგარეტის რაოდენობაზეა საუბარი”, – ამბობს მაღაზიის მეპატრონე. 

ვრცლად: marneulifm.ge 

საგარეჯოში ხუთი სოფელი დაისეტყვა, ადგილობრივებს ვენახი გაუნადგურდათ 

ძლიერმა სეტყვამ და ქარმა საგარეჯოს მუნიციპალიტეტი დააზარალა. გამოცემა “სპექტრის” ინფორმაციით, ჯამში ხუთი სოფლის ნაკვეთები და ვენახები დაისეტყვა. დაზიანდა შიდა საუბნო გზები და რამდენიმე საცხოვრებელი სახლი. 

ამავე გამოცემის ცნობით, რა ოდენობის ზარალი მიადგა რეგიონს, ჯერ უცნობია.  

ვრცლად: speqtri.ge 

რა ხდება რეგიონებში