საქართველოს პრეზიდენტის, სალომე ზურაბიშვილის განცხადებით, პარტნიორი ქვეყნების ელჩებმა გამოხატეს მზაობა იმისთვის, რომ საზღვარგარეთ დამატებით საარჩევნო უბნების გახსნა გაადვილდეს. ზურაბიშვილის ინფორმაციით, თავად საგარეო საქმეთა სამინისტროს მხრიდან “ადგილზე მყოფ ელჩებთან არანაირი საუბარი არ ყოფილა, რათა საკითხმა წინ წაიწიოს და გზები გამოინახოს“.
ზურაბიშვილის თქმითვე, თავის მხრივ, დიასპორაც გამოხატავს მზაობას, მათ სარგებლობაში არსებული ფართების საარჩევნო გამოყენების თაობაზე. პრეზიდენტის განმარტებით, საზღვარგარეთ დამატებითი რაოდენობის საარჩევნო უბნების გახსნა სრულიად შესაძლებელია. და ამის მაგალითად მოლდოვა დაასახელა.
საზღვარგარეთ საარჩევნო უბნების გახსნის საკითხზე პრეზიდენტი ცესკოს თავმჯდომარის მოვალეობის შემსრულებელს, გიორგი კალანდარიშვილს და არასამთავრობო ორგანიზაციების წარმომადგენლებს შეხვდა.
სალომე ზურაბიშვილი:“მოლდოვამ არჩევნები ჩაატარა და არჩევნებისთვის 150 საარჩევნო უბანი გახსნა. ჩვენ ყოველთვის ბევრი პრეტენზია გვაქვს და თუ მოლდოვას შეუძლია, ალბათ ჩვენც შეგვიძლია! რატომ ვამბობთ, რომ ამის რესურსი არ გაგვაჩნია?! ცესკოსგან მოვისმინე, რომ რესურსი, რა რესურსიც იქნება საჭირო, რათა დამატებითი უბნები გაიხსნას, გაგვაჩნია და თუ საგარეოსგან პირობას მივიღებთ, შეგვიძლია დავიწყოთ მუშაობა უბნების გახსნაზე.
ამიტომ ვამბობ, რომ დაწყებულია ერთგვარი პინგპონგი! დიასპორის მხრიდან არსებობს მზადყოფნა, საარჩევნოდ დათმონ სივრცეები, რაც სხვადასხვა ქალაქში არსებობს – ეს სივრცეები არის ეკლესია, საკვირაო სკოლები და სხვა ფართები, რასაც დიასპორული ორგანიზაციები იყენებენ ან იმუშაონ იმისთვის, რომ ქალაქში, სადაც ცხოვრობენ, ასეთი სივრცეები მოვიპოვოთ.
არსებობს მოლდოვის მაგალითი, როცა პარტნიორი ქვეყნები გვთავაზობენ სივრცეებს, ფართებს საარჩევნო პერიოდისთვის. ასე რომ, გამოსავალი ბევრია! მთავარია ადგილი არ ჰქონდეს არავითარ დისკრიმინაციას იმ მოქალაქეთა მიმართ, ვინც საზღვარგარეთ ცხოვრობს.
გასაგებია, რომ ყველგან, სადაც 50 ადამიანი ცხოვრობს, ეს შესაძლებელი არ იქნება, მაგრამ ნაბიჯი რომ უნდა გადაიდგას, რათა რამდენიმე ქვეყანაში, ქალაქში, სადაც ყველაზე დიდი დიასპორაა, იქ საარჩევნო უბნები უნდა გაიხსნას!
პროცესი უნდა დაიწყოს! ყველამ უნდა დავუწყოთ მუშაობა იმისთვის, რომ დიასპორას მივცეთ საარჩევნო უფლება და მათ მიმართ დისკრიმინაცია და შეურაცხმყოფელი გზავნილები არ გამოვიყენოთ. საკმარისი არ არის ჩვენი დიასპორით მაშინ ვამაყობდეთ, როცა ჩვენი ფეხბურთელები ევროპული ქვეყნებიდან ჩამოდიან და ასეთ დიდი სიამოვნებას და გვანიჭებენ – საჭიროა იმ ადამიანებს, ვინც იქ წვალობს, მოღვაწეობს, ის საშუალება მივცეთ, რაც ყოველ მოქალაქეს ეკუთვნის.“
პრემიერი: სალომე ზურაბიშვილს მორალური უფლება არ აქვს, ხვდებოდეს კალანდარიშვილს და საერთოდ, საუბრობდეს არჩევნებზე
ყველა კარგად ხედავს, რომ სალომე ზურაბიშვილის ერთადერთი მიზანია საბოტაჟი, ერთადერთი მიზანია, რომ არჩევნებს რაღაცნაირად შეექმნას საფრთხე, პრობლემა. რა თქმა უნდა, ამას ვერ მიაღწევს, – ასე გამოეხმაურა საქართველოს პრემიერმინისტრი ირაკლი კობახიძე პრეზიდენტის მიერ დღეს ორგანიზებულ შეხვედრას, რომელიც არჩევნებში დიასპორის მაქსიმალური ჩართულობის საკითხის განხილვას ეძღვნება.
ამასთან, როგორც პრემიერმა აღნიშნა, სალომე ზურაბიშვილს არ აქვს მორალური უფლება, რომ შეხვდეს ცესკო-ს თავმჯდომარეს გიორგი კალანდარიშვილს და არც იმის მორალური უფლება აქვს, რომ არჩევნებზე ისაუბროს.
კითხვაზე, კვლავ იქნება თუ არა გიორგი კალანდარიშვილი „ქართული ოცნების“ რჩეული ცესკოს თავმჯდომარის პოზიციაზე, პრემიერმა აღნიშნა, რომ ჯერ კონკურსი უნდა გამოცხადდეს და პარლამენტის თავმჯდომარემ და პარლამენტმა უნდა მიიღონ გადაწყვეტილება.
“მე არ ვიცი, პრეზიდენტი კალანდარიშვილის კანდიდატურას იწონებს თუ არა. ფაქტია, რომ დღეს ხვდება სწორედ კალანდარიშვილს, მიუხედავად იმისა, რომ თავის დროზე არ წარადგინა ის პარლამენტში. გამოდის, რომ სალომე ზურაბიშვილი აღიარებს ცესკოს თავმჯდომარის ლეგიტიმაციას, რომელსაც უარი უთხრა წარდგენაზე კომისიის გადაწყვეტილების მიუხედავად.
რა თქმა უნდა, არავითარი საფუძველი მისი კრიტიკისთვის არ არსებობს – კალანდარიშვილმა და ცესკოს სხვა წევრებმა ჩაატარეს 2021 წლის საერთო ეროვნული არჩევნები უმაღლეს დონეზე, ნული კრიტიკა იყო, შეგახსენებთ. ამის შემდეგ იყო არაერთი შუალედური არჩევნები, რომლებიც ჩატარდა, ასევე, უმაღლეს დონეზე, შესაბამისად, ოპოზიციას და სალომე ზურაბიშვილს არავითარი კრიტიკის საფუძველი არ აქვთ.
რაც შეეხება ჩვენს პოზიციას, ვერაფერს გეტყვით, გამომდინარე იქიდან, რომ ჯერ უნდა ჩატარდეს კონკურსი, შემდეგ პარლამენტის თავმჯდომარემ უნდა მიიღოს გადაწყვეტილება და შემდეგ უკვე პარლამენტმა. დაველოდოთ მათ გადაწყვეტილებებს.“ – განაცხადა კობახიძემ.
