სახელმწიფო დაცვის სამსახურის უფროსის, ანზორ ჩუბინიძის თქმით, ირაკლი ღარიბაშვილის მიუნხენში ჩარტერის ფული მისმა მამამ, ტარიელ ღარიბაშვილმა გადაიხადა. მისივე განმარტებით, “ჯორჯიან ეარვეისს” 34 ათასი ევრო გადაუხადეს, თუმცა, თანხა შესაძლოა დაკორექტირდეს.
“მინდა, საზოგადოებას დავუდასტურო, რომ სახელმწიფო დაცვის სპეციალური სამსახურის საჯარო სამართლის იურიდიული პირის უზრუნველყოფის სააგენტოს ანგარიშზე გაკეთებულია შენატანი, რომელიც უზრუნველყოფს თბილისი-მიუნხენი-თბილისის რეისთან დაკავშირებულ ხარჯებს. შენატანი გაკეთებულია კერძო პიროვნების მიერ და ეს თანხა არის 34 ათასი ევროს ეკვივალენტი ლარში.
თანხა წინსწრებით გადახდილია და შესაბამისად, სავარაუდოა, შესაძლებელია იგი მცირედით დაკორექტირდეს მას შემდეგ, რაც ავიაკომპანია ჯორჯიან ეარვეისი წარმოგვიდგენს დეტალურ ხარჯთაღრიცხვას. წარმოდგენისთვის სჭირდება ხოლმე დაახლოებით რეისის შესრულებიდან თვე-ნახევარი. წარმოდგენისთანავე ჩვენ მოვახდენთ ანგარიშსწორებას. გადახდილი თანხა სრულად უზრუნველყოფს მიმდინარე ხარჯს და არის გარკვეული ფასნამატიც.
რაც შეეხება საბიუჯეტო გადასახადებს, საზოგადოებას მინდა, დავუდასტურო, რომ საწყის ეტაპზე, დავალების მიცემის მომენტში, ნათლად იყო მითითებული, რომ ანგარიშსწორება მოხდებოდა არასაბიუჯეტო სასხსრებიდან. საზოგადოებას დღეს ვუდასტურებ, რომ ანგარიშსწორება განხორციელდა კერძო პიროვნების მიერ და ეს პიროვნება ტარიელ ღარიბაშვილია”, – აღნიშნა ჩუბინიძემ. მის კომენტარს საზოგადოებრივი მაუწყებელი ავრცელებს.
ოპოზიციონერი დეპუტატის, ხატია დეკანოიძის თქმით, ეს ბიუჯეტიდან გადახდილი თანხაა ან ღარიბაშვილის უკანონო შემოსავლები. მისივე განმარტებით, წარმოუდგენელია პრემიერმინისტრს მშობელმა უქირაოს ჩარტერი და დასვას მიუნხენში:
“ეს არის უკანონობა, ეს არის კორუფცია, ეს არის ინფორმაციის დამალვა და ეს არის ყველაზე უფრო უტიფარი ქმედება ამ ღარიბ-ღატაკ ქვეყანაში, “როდესაც ადამიანები ემიგრაციაში მიდიან და მერე უდაბნოში იხოცებიან.”
ოპოზიციური პარტიები და NGO-ები პრემიერმინისტრ ირაკლი ღარიბაშვილის წინააღმდეგ სამსახურებრივი უფლებამოსილების გადამეტების გამო იმპიჩმენტის პროცედურების და გამოძიების დაწყებას აპირებენ – საქმე ეხება ე.წ. ჩარტერების სკანდალს.
7 სექტემბერს, საქართველოს მთავრობის სტრატეგიული კომუნიკაციების დეპარტამენტის უფროსმა, ნინო გიორგობიანმა გამოაქვეყნა განცხადება და აღნიშნა, რომ პრემიერმინისტრი ირაკლი ღარიბაშვილი აგვისტოში აშშ-ში შვილთან ერთად ჩარტერული რეისით გაემგზავრა – მისი მტკიცებით, ხარჯი ბიუჯეტიდან არ გაწეულა.
მოგვიანებით სტრატკომმა ღარიბაშვილის აშშ-ში ჩასვლასთან დაკავშირებით განცხადება შეცვალა და ახალი განმარტება გააკეთა, სადაც აღნიშნა, რომ ღარიბაშვილი ჩარტერით ევროპაში ჩავიდა, იქიდან ამერიკაში კი რეგულარული რეისით გაფრინდა.
“TV პირველთან” ინტერვიუში Georgian Airways-ის დამფუძნებელმა, თამაზ გაიაშვილმა დაადასტურა, რომ ქვეყნის პრემიერი გერმანიაში მისმა კომპანიამ, სამთავრობო თვითმფრინავით წაიყვანა – მისივე განმარტებით, თვითმფრინავი პრემიერის გასაფრენად სახელმწიფო დაცვის სამსახურმა შეუკვეთა. როგორც გაიაშვილმა აღნიშნა, მთავრობისთვის თვითმფრინავებს ყოველთვის სახელმწიფო დაცვის სამსახურის ხელმძღვანელი, ანზორ ჩუბინიძე უკვეთავს.
უკვე მესამე დღეს, საქართველოს მთავრობის სტრატეგიული კომუნიკაციების დეპარტამენტმა კიდევ ერთი პოსტი გამოაქვეყნა, რომლითაც TV პირველს ღარიბაშვილის მგზავრობის შესახებ გასული სიუჟეტისთვის მიზანმიმართულ დეზინფორმაციაში ადანაშაულებს.
მათი მტკიცებით, რეისი, რომლითაც მთავრობის მეთაური მიუნხენში გაემგზავრა, კომერციული იყო და მგზავრობის თუ ნებისმიერი სხვა ხარჯი სახელმწიფო ბიუჯეტიდან არ გაწეულა.
