პატრიოტთა ალიანსმა აფხაზეთიდან უკან დაბრუნებული ხატი ბაგრატის ტაძარში გადაიტანა
“პატრიოტთა ალიანსის” ლიდერების მიერ აფხაზეთში, ილორის ტაძრისთვის შეწირული ღვთისმშობლის ხატი, რომლის მიღებაზეც აფხაზურმა მხარემ უარი თქვა და ის 5 სექტემბერს, საოკუპაციო ხაზთან მიიტანა, ირმა ინაშვილმა ბაგრატის ტაძარში გადაიტანა.
„წავედით შერიგებისკენ, ერთი პატარა ნაბიჯი გადავდგით და ხომ ხედავთ, რამდენი დარტყმა მივიღეთ,” – განაცხადა ინაშვილმა.
ილორის ღვთისმშობელი გადმოვაბრძანეთ, ამიერიდან ეს ხატი, რომელიც თავად დევნილობაში აღმოჩნდა, იქნება დევნილთა შემწე ❤… გიხაროდენ! არასდროს დამავიწყდება ეს დღე.
Posted by ირმა ინაშვილი on ორშაბათი, 07 სექტემბერი, 2020
ხატის გადატანის ცერემონიაში “პატრიოტთა ალიანსის” ლიდერებთან ერთად სასულიერო პირებიც მონაწილეობდნენ.
“პატრიოტთა ალიანსის” ლიდერები, ირმა ინაშვილი და გიორგი ლომია გასაიდუმლოებული ვიზიტით აფხაზეთში 18 აგვისტოს ჩავიდნენ.
• “გადმოგვცეს ხატი, ილოცეს და ამით ვიზიტი დასრულდა” – რას აკეთებდა ინაშვილი აფხაზეთში?
• მოსაზრება: ქართული ვოიაჟი აფხაზეთში, რომელსაც, სავარაუდოდ, რუსეთი დაეხმარა
ქართველი პოლიტიკოსების ვიზიტის შესახებ ინფორმაცია თავდაპირველად “მთავარმა არხმა” გაავრცელა. მოგვიანებით ეს ინფორმაცია აფხაზი ვეტერანების ორგანიზაციამ – არუაამაც დაადასტურა. “პატრიოტთა ალიანსის” ლიდერები დეფაქტო პრეზიდენტის, ასლან ბჟანიას მრჩეველს, ლაშა საქანიას შეხვდნენ.
საქანიამ ინაშვილთან და ლომიასთან მოლაპარაკება თავდაპირველად უარყო, მოგვიანებით კი განაცხადა, რომ მათ შეხვდა, მაგრამ არა რაიმე საქმიანი მოლაპარაკებისთვის.
მისი თქმით, ქართველი პოლიტიკოსები აფხაზეთში „ჰუმანიტარული მისიით“ იყვნენ ჩასულები.
ოპოზიციის პროტესტის გამო, მოგვიანებით, საქანიამ თანამდებობაც დატოვა.
“პატრიოტთა ალიანსის” ლიდერები ამ დრომდე უარს ამბობენ განმარტონ, ვისი დახმარებით გადაკვეთეს ე.წ. საზღვარი, რომელსაც ოფიციალურად რუსული სპეცსამსახურები აკონტროლებენ.
