პარლამენტი იღებს კანონს, რომელიც ჯარიმების გამკაცრებას ითვალისწინებს. აქტივისტები აპროტესტებენ
საქართველოს პარლამენტში ინიცირებულია კანონპროექტი, რომელიც ითვალისწინებს წვრილმან ხულიგნობაზე, ასევე პოლიციელის კანონიერი მოთხოვნის დაუმორჩილებლობაზე პასუხისმგებლობის ზომების გამკაცრებას. კანონპრპოექტის განხილვა დაჩქარებული წესით მიმდინარეობს.
წარმოდგენილი პროექტით:
• მძიმდება წვრილმანი ხულიგნობის ჩადენის შემთხვევაში ჯარიმის მინიმალური ზღვარი (განმეორებითი ჩადენისას) 500-დან 1500 ლარამდე, ხოლო მაქსიმალური ზღვარი 1000
ლარიდან 2000 ლარამდე იზრდება;
• სამსახურეობრივი მოვალეობის შესრულების დროს პოლიციელის კანონიერი მოთხოვნისადმი დაუმორჩილებლობისათვის პასუხისმგებლობა მკაცრდება – ჯარიმის მინიმალური ზღვარი 1000 დან 2000 ლარამდე, ხოლო მაქსიმალური ზღვარი (განმეორებითი ჩადენისას) 4000-დან 4500 ლარამდე იზრდება.
სამოქალაქო აქტივისტები ამ ინიციატივას სპეციალური განცხადებით ეხმაურებიან და ამბობენ, რომ აქტივისტებისთვის „გამაოგნებელია კრიზისის დაძლევის და პოლარიზაციის დასრულების მოტივით პარლამენტში შესული ოპოზიციის სრული დუმილი“.
მათი თქმით, ამ ნაბიჯით პარლამენტში შესულმა ოპოზიციამ პროტესტი არ გამოხატა ადამიანის ფუნდამენტური კონსტიტუციური უფლებების შეზღუდვის შესახებ.
“აღმაშფოთებელია იმ პოლიტიკოსების დუმილი, რომელთა გვერდითაც თითოეული ჩვენგანი 2 წლის განმავლობაში იბრძოდა. ჩვენ არ მოგვისმენია მათი არც ერთი კრიტიკული განცხადება. ამ ნაბიჯით პარლამენტში შესულმა ოპოზიციამ არა მხოლოდ უარი თქვა ჩვენი, სამოქალაქო აქტივისტების უფლებების დაცვაზე, არამედ პროტესტი არ გამოხატა ადამიანის ფუნდამენტური კონსტიტუციური უფლებების – სიტყვის, გამოხატვისა და შეკრების უფლების კიდევ უფრო შეზღუდვის შესახებ, რაც საპარლამენტო ოპოზიციის მხრიდან კიდევ უფრო გამაოგნებელი ნაბიჯია”, – ნათქვამია განცხადებაში.
სამოქალაქო სივრცის შეზღუდვისკენ გადადგმულ ნაბიჯად აფასებს ამ კანონპროექტს “საერთაშორისო გამჭვირვალობა – საქართველო”.
“ქვეყანაში მიმდინარე პოლიტიკური და სოციალური კრიზისის ფონზე, მაშინ როდესაც საზოგადოების პროტესტი მზარდია, ხოლო ქვეყნის ეკონომიკური მდგომარეობა უკიდურესად მძიმე, აღნიშნული ცვლილებები მძიმე ტვირთად დააწვება მოსახლეობას და სამოქალაქო სივრცის შეზღუდვისკენ გადადგმულ ნაბიჯად შეიძლება შეფასდეს”, – წერია მათ განცხადებაში.
ისინი მოუწოდებენ საქართველოს პარლამენტს, არ დაუჭიროს მხარი ამ ინიციატივას და მძიმე ეკონომიკური ფონის გათვალისწინებით, არ გაზარდოს ჯარიმების ოდენობა.
___________________________________
● საქართველო Human Rights Watch-ის 2020 წლის ანგარიშში
● გავრილოვი, პროპორციული, რკინის ღობე – რით დაგვამახსოვრდება მეცხრე მოწვევის პარლამენტი
● 20 ივნისი. გზამკვლევი მათთვის, ვისაც დეტალები კარგად არ ახსოვს