პაპუაშვილის პრეზენტაციაზე დატანილ რუკაზე ოკუპირებული ტერიტორიების კონტურები მკრთალია. რას ამბობს ხელისუფლება
პაპუაშვილის პრეზენტაცია
საქართველოს პარლამენტის თავმჯდომარემ, შალვა პაპუაშვილმა დღევანდელ ბრიფინგზე არჩევნების პრეზენტაცია წარმოადგინა, სადაც ერთ-ერთ სლაიდზე დატანილ რუკაზე საქართველოს მთლიანი ტერიტორიის კონტურები მკრთალად ჩანს, ზოგი რაკურსიდან კი ოკუპირებული აფხაზეთი და ე.წ. სამხრეთ ოსეთი თვალისთვის შეუმჩნეველია.
ასე ჩანდა რუკა „ტვ იმედის” ეთერში:
ასე ჩანს რუკა შალვა პაპუაშვილის პრეზენტაციაზე, რომლის PowerPoint ვერსია „პუბლიკას” „ქართული ოცნების” პრესსამსახურმა მიაწოდა ბრიფინგის დასრულების და მოქალაქეების კრიტიკის შემდეგ:
რას ამბობს ხელისუფლება
საქართველოს პარლამენტის პირველი ვიცე-სპიკერი გია ვოლსკი: “რუკის ვიზუალი მეც დავიწუნე, რადგან ჩემთვის და ბევრი ჩემი მეგობრისთვის მისაღები არ არის, რომ პროპაგანდისტული გამოსვლა როდესაც გაქვს და ეყრდნობი რეალურ ფაქტებს, ამ დროს რუკაზე ნათლად არ ჩანს, რომ საქართველოს ტერიტორია მთლიანად არის მოხაზული.”
საქართველოს პარლამენტის თავმჯდომარე შალვა პაპუაშვილი: “მე დეზინფორმაციის მხილებას ვცდილობ და რა დეზინფორმაცია, ამათ სხვა ფერები ელანდებათ უკვე. ფსევდორელიგიური თვითჰიპნოზირების გარდა, სხვა ეს არაფრით აიხსნება.
როგორც ჩანს, საბოლოოდ იმაზე შევთანხმდებით, რომ უბრალოდ ვიღაცებს ტელევიზორი არ უვარგა და არჩევნების გაყალბებაც ამის გამო მოელანდათ.”
“ქართული ოცნების” აღმასრულებელი მდივანი, მამუკა მდინარაძე: “ტერიტორიების ჩამბარებლების მსახურებმა საარჩევნო რუკაზე ღია ფერით სარგებლობა გადაწყვიტეს.
ამას ვამბობთ სულ, რამდენად მდაბიოები არიან!
პ. ს. ვინც ჯერ არ იცის. საპრეზენტაციო ეკრანზე ღია ფერი კამერებში კარგად არ გამოჩნდა და ეს არის ამათი რუკაო – უსამშობლოებმა წამების განსხვავებით დაიწყეს პოსტების წერა, რითაც იმისი გადაფარვა სცადეს, რაც შალვა პაპუაშვილმა მათ ამ ბრიფინგზე დამართა.
ამავე დროს, პრეზენტაცია ბრიფინგზე დამსწრე ყველა ჟურნალისტს გადაეცა.”
