პარლამენტის თავმჯდომარის და სახელისუფლებო პროპაგანდისტული გვერდების მორიგი თავდასხმა JAMnews-ზე
პაპუაშვილი ჯემნიუსის წინააღმდეგ
შალვა პაპუაშვილი კიდევ ერთხელ, ფაქტების დამახინჯებით, თავს დაესხა დამოუკიდებელ მედია-გამოცემას, “ჯემნიუსს”.
პარლამენტის თავმჯდომარე უკვე მერამდენე განცხადებაში იმეორებს სიცრუეს, რომ თითქოს”ჯემნიუსის” თანამშრომელი “ქართული ოცნების” დეპუტატებს “84 ტყვიით დაემუქრა”.
“სამწუხაროდ, დღემდე, გავიდა კვირები და თვეები და ვერ ვნახეთ ვერცერთი ევროპელი ელჩი, რომელიც გაემიჯნებოდა მაგალითად, „ჯემნიუსის“ თანამშრომლის მიერ პარლამენტის წევრებისადმი 84 ტყვიით დამუქრებას. არადა ეს ორგანიზაცია ფინანსდება ევროკავშირის ბიუჯეტიდან და ერთი წუხილი არ გამოუთქვამს არცერთ ევროპელ პოლიტიკოს თუ დიპლომატს”.
“ჯემნიუსმა” არაერთხელ განმარტა, რომ პოსტი, რომელსაც პაპუაშვილი “კეფაში ტყვიის მუქარას” უწოდებს, იყო სტენსილი ვახუშტის ხიდზე და არა “ჯემნიუსის” მიერ გაკეთებული წარწერა. ვიდეო, რომელზეც პაპუაშვილი საუბრობს, არათუ “ჯემნიუსის” თანამშრომლის განცხადება არ ყოფილა, არამედ ჩვენი რედაქციის მიერ არც კი იყო გადაღებული.
საუბარია 28 მაისს, JAMnews-ის ფეისბუკ-გვერდზე სოციალურ ქსელებში გავრცელებული ერთ-ერთი ვიდეოს გაზიარებაზე. ვიდეოში ჩანდა ვახუშტის ხიდზე, საჯარო სივრცეში გაკეთებული წარწერა/სტენსილი: “84 მოღალატე – 84 ტყვია კეფაში”. JAMnews-ის რედაქციამ ტექსტის შინაარსი წაიკითხა როგორც “84 ტყვია ნასროლი არა დეპუტატების მიმართ, არამედ პირიქით – 84 დეპუტატის მიერ ქვეყნისთვის ნასროლი მოღალატეობრივად, უკნიდან (კეფაში/ზურგში)”.
თუმცა, როგორც კი წარწერის შინაარსი განსხვავებულად იქნა აღქმული, ჩვენ, როგორც პასუხისმგებლობიანმა მედიამ, რომელიც ემიჯნება ყოველგვარ ძალადობას და მოწოდებებს ძალადობისკენ, დაუყოვნებლივ მივიღეთ გადაწყვეტილება ვიდეოს ფეისბუკ-გვერდიდან წაშლის შესახებ (საიტზე ვიდეო არც ყოფილა გაზირებული).
JAMnews-ის რედაქციამ ეს ყველაფერი არაერთხელ განმარტა როგორც ვებ-გვერდზე განთავსებულ სპეციალური განცხადებაში, ასევე პროსახელისუფლებო მედიებთანაც გაკეთებულ განმარტებებშიც.
თუმცა, მიუხედავად ამისა, “ქართული ოცნების” პროპაგანდისტული მანქანა აგრძელებს ტყუილის შეგნებულად ტირაჟირებას და თავდასხმას დამოუკიდებელ მედია-ორგანიზაციაზე.
თავდასხმები გრძელდება როგორც ოფიციალური პირების განცხადებების სახით, ისე პროპაგანდისტული ფეისბუკ-გვერდების და ტროლ-ბოტების დახმარებით.
განსაკუთრებით ამ მიმართულებით აქტიურობს სწორედ პარლამენტის თავმჯდომარე, რომელმაც დღესაც ახსენა “ჯემნიუსი” დამახინჯებულ კონტექსტში.
საინტერესოა, რომ პაპუაშვილის განცხადებას წინ უძღოდა ერთ-ერთი ყალბი, პროპაგანდისტული ფეისბუკ-გვერდის მიერ დადებულ, ზუსტად იმავე შინაარსის პოსტი.
“უკვე ორი თვე გადის მას შემდეგ, რაც უცხოური გრანტებით დაფინანსებული „ჯემნიუსის“ ჟურნალისტმა, ირაკლი დათუნაშვილმა კეფაში ტყვიის სროლის მუქარა გაავრცელა. დღემდე არც ერთ დონორს არ დაუგმია ეს მოწოდება. მეტიც, სავარაუდოდ, ის დღემდე უცხოური გრანტიდან იღებს ხელფასს. ძალადობის წაყრუება ძალადობის წახალისებაა,” – წერს აღნიშნული გვერდი, რომლის ლინკსაც ჩვენ შეგნებულად არ ვავრცელებთ. აღნიშნულ გვერდზე ხშირია ჟურნალისტების, აქტივისტების, არასამთავრობო ორგანიზაციების წარმომადგენლების წინააღმდეგ მიმართული ყალბი, სიძულვილით ენით დაწერილი პოსტები.
ამ პროპაგანდისტული ფეისბუკ-გვერდის პოსტს მოჰყვა სწორედ პარლამენტის თავმჯდომარის განცხადება.
მანამდე “ჯემნიუსის” შესახებ განცხადება პაპუაშვილმა რამდენჯერმე გააკეთა. ბოლო იყო 11 ივნისს ფეისბუკზე დადებული პოსტი, სადაც იგი ასევე რამდენიმე ორგანიზაციას და კონკრეტულ ადამიანებს ახსენებდა, როგორც ძალადობის წამქეზებლებს. მათ შორის იყო “ჯემნიუსი” და “ჯემნიუსის” თანამშრომელიც.
ამ პოსტის დადებიდან ზუსტად ერთ საათში საკუთარ სახლთან თავს დაესხნენ სამოქალაქო მოძრაობა “სირცხვილიას” აქტივისტ ზუკა ბერძენიშვილს, რომელიც ასევე იყო ნახსენები პაპუაშვილის განცხადებაში.
მაშინ ჩვენმა ორგანიზაციამ გაავრცელა განცხადება, რომ ზუკა ბერძენიშვილზე თავდასხმა გვაფიქრებინებს, რომ შესაძლოა, საფრთხე ემუქრებოდეს ჩვენს თანამშრომლებსაც და “ჯემნიუსი” სრულ პასუხისმგებლობას ამასთან დაკავშირებით აკისრებს ხელისუფლებას.
