"რუსული კანონებით ცხოვრებას და საქმიანობას არ ვაპირებთ"- ასზე მეტი ორგანიზაციის განცხადება "FARA"-ზე
ორგანიზაციების ერთობლივი განცხადება “FARA”-ზე
“აშშ-ში მოქმედი FARA დამოუკიდებელი არასამთავრობო ორგაზაციებისა და თავისუფალი მედიის საქმიანობას არ უპირისპირდება, ივანიშვილის არალეგიტიმურ ხელისუფლებას კი სამოქალაქო სექტორის წინააღმდეგ მიღებული რუსული კანონის გადაფუთვა სურს” – ასზე მეტი ორგანიზაცია საერთო განცხადებას ავრცელებს „ქართული ოცნების“ მიერ ინიციირებულ, ამერიკაში მოქმედი FARA-ს ქართულ თარგმანთან დაკავშირებით.
- ქართული ფარა vs ამერიკული FARA. რა განსხვავებაა ამ ორ დოკუმენტს შორის
- SJC: FARA-ს გონივრული განმარტებით, მედია და NGO-ები კანონის რეგულირების მიღმა უნდა დარჩნენ
“ივანიშვილის არალეგიტიმური პარლამენტის თითოეული აქტი, რომელიც ხალხის თავისუფლებას ზღუდავს, ანტიქართული და ანტიკონსტიტუციურია. ვერაღსრულებული რუსული კანონის გამკაცრება, რათა მოქალაქეები სისხლისსამართლებრივი დევნით დააშინონ, ასევე ანტიქართული და ანტიკონსტიტუციურია“, – ნათქვამია განცხადებაში.
განცხადების ავტორები ამბობენ, რომ ისინი ჯერ კიდევ 2023 წელს აცხადებდნენ, რომ რუსული კანონის მიღების შემდეგ იგი პერიოდულად გამკაცრდებოდა, შეეხებოდა ყველა მოქალაქეს და მნიშვნელოვნად შეზღუდავდა მათ უფლებებს – ისევე, როგორც ეს რუსეთსა და სხვა ავტორიტარულ რეჟიმებში მოხდა.
მათივე თქმით, ამ კანონის ინიცირება და მიღება ქვეყნის საგარეო კურსის ცვლილებას და საქართველოს კონსტიტუციის ღალატს ნიშნავდა, რაც ივანიშვილის პრემიერ-მინისტრმა 2024 წლის 28 ნოემბრის განცხადებითაც დაადასტურა.
“ივანიშვილის ხელისუფლება ირწმუნება, რომ აშშ-ში 1938 წელს მიღებული “ფარა”-ს პირდაპირ თარგმანს აინიცირებს. აშშ-ში მოქმედი “ფარა” დამოუკიდებელი არასამთავრობო ორგანიმზაციებისა და თავისუფალი მედიის საქმიანობას არ უპირისპირდება, ივანიშვილის არალეგიტიმურ ხელისუფლებას კი სამოქალაქო სექტორის წინააღმდეგ მიღებული რუსული კანონის გადაფუთვა სურს.
ივანიშვილის რეჟიმი ცდილობს თავისუფლების ნებისმიერი გამოვლინების ჩახშობას. 50-ზე მეტი ადამიანის პოლიტიკური ნიშნით დაკავების, დარბევების, რეპრესიების შემდეგ, მათ სურთ დაუცველი დატოვონ ძალადობის მსხვერპლი ბავშვები და ქალები, შეუწყდეთ დაფინანსება მეცნიერებს, ახალგაზრდებს, სოციალურად დაუცველ ოჯახებს, არ ისმოდეს რეგიონების, მუშების, დევნილი და საკუთარი უფლებებისთვის მებრძოლი ადამიანების ხმა“, – ვკითხულობთ განცხადებაში.
ავტორების თქმით, უკვე მესამე წელია, ქართული სამოქალაქო საზოგადოება ივანიშვილს მკაფიოდ ეუბნება, რომ რუსული კანონებით ცხოვრებას და საქმიანობას არ აპირებს.
“რუსული კანონი, მისი არც ერთი ფორმით, არასოდეს იქნება საქართველოს არჩევანი. შესაბამისად, ხელმომწერი ქართული დამოუკიდებელი არასამთავრობო და მედია ორგანიზაციები ვრჩებით საქართველოს კონსტიტუციისა და საკუთარი მისიის ერთგული – ვემსახურებით ქართველ ხალხს”, – ნათქვამია განცხადებაში.
განცხადებას ხელს აწერს ასზე მეტი ორგანიზაცია, მათ შორის, “ჯემნიუსი”.
ორგანიზაციების ერთობლივი განცხადება “FARA”-ზე
