ოპოზიციური პარტიები და NGO-ები ღარიბაშვილის წინააღმდეგ იმპიჩმენტის პროცედურების და გამოძიების დაწყებას აპირებენ

ოპოზიცია ღარიბაშვილის წინააღმდეგ

ოპოზიციური პარტიები და NGO-ები პრემიერმინისტრ ირაკლი ღარიბაშვილის წინააღმდეგ სამსახურებრივი უფლებამოსილების გადამეტების გამო იმპიჩმენტის პროცედურების და გამოძიების დაწყებას აპირებენ – საქმე ეხება ე.წ. ჩარტერების სკანდალს.

“ლელოს” წევრი, ლევან სამუშია აცხადებს, რომ პარტია პრემიერმინისტრ ირაკლი ღარიბაშვილის წინააღმდეგ იმპიჩმენტის პროცედურებს იწყებს, რადგან მისი თქმით, ღარიბაშვილმა სავარაუდო დანაშაული ჩაიდინა და სამსახურებრივი უფლებამოსილება ბოროტად გამოიყენა.

ამასთან, “ნაციონალური მოძრაობა” პრემიერ ღარიბაშვილის სამართლებრივი პასუხისმგებლობის დაყენებას ითხოვს. ამის შესახებ პარტიის თავმჯდომარემ, ლევან ხაბეიშვილმა ბრიფინგზე განაცხადა.

“სტრატეგია აღმაშენებლის” ლიდერი, გიორგი ვაშაძე ამბობს, რომ პრემიერმინისტრის “ჩარტერების სკანდალი გახრწნილების პიკია.”

ღარიბაშვილის შესაძლო კორუფციულ დანაშაულზე გამოძიებას ყოფილი პრემიერმინისტრის, გიორგი გახარიას პარტია “საქართველოსთვისაც” ითხოვს. მათი თქმით, მომხდარი კიდევ ერთი ნათელი დასტურია, რატომ თქვა უარი ხელისუფლებამ რეალურად დამოუკიდებელი ანტიკორუფციული ბიუროს შექმნაზე. გახარიას პარტია უახლოეს დღეებში პარლამენტში ინიციატივის წარდგენასაც გეგმავს, რომლითაც, როგორც ამბობენ, თანამდებობის პირების იმ ნათესავთა წრე გაფართოვდება, ვისაც თავიანთი ქონების წარმომავლობის დასაბუთება მოუწევთ. 

თავად გიორგი გახარია კი ამბობს, რომ ბიძინა ივანიშვილი საქართველოს ევროპულ მომავალს უწყობს იმპიჩმენტს.

“ოქტომბრის ბოლოს საქართველო ევროკავშირის წევრობის კანდიდატის სტატუსზე შეფასებას ელოდება. ხელისუფლებას პრეზიდენტის იმპიჩმენტი უნდა, ოპოზიცია პრემიერის იმპიჩმენტს ითხოვს. სინამდვილეში, ბიძინა საქართველოს ევროპულ მომავალს უწყობს იმპიჩმენტს. მადლობა ბიძინას “მშვიდობისთვის” – წერს გახარია.

პრემიერის წინააღმდეგ გამოძიების დაწყება და დოკუმენტების გასაჯაროება მოითხოვეს არასამთავრობო ორგანიზაციებმაც.

რა მოხდა

7 სექტემბერს, საქართველოს მთავრობის სტრატეგიული კომუნიკაციების დეპარტამენტის უფროსმა, ნინო გიორგობიანმა გამოაქვეყნა განცხადება და აღნიშნა, რომ პრემიერმინისტრი ირაკლი ღარიბაშვილი აგვისტოში აშშ-ში შვილთან ერთად ჩარტერული რეისით გაემგზავრა – მისი მტკიცებით, ხარჯი ბიუჯეტიდან არ გაწეულა.

მოგვიანებით სტრატკომმა ღარიბაშვილის აშშ-ში ჩასვლასთან დაკავშირებით განცხადება შეცვალა და ახალი განმარტება გააკეთა, სადაც აღნიშნა, რომ ღარიბაშვილი ჩარტერით ევროპაში ჩავიდა, იქიდან ამერიკაში კი რეგულარული რეისით გაფრინდა.

გუშინ კი “TV პირველთან” ინტერვიუში Georgian Airways-ის დამფუძნებელმა, თამაზ გაიაშვილმა დაადასტურა, რომ ქვეყნის პრემიერი გერმანიაში მისმა კომპანიამ, სამთავრობო თვითმფრინავით წაიყვანა – მისივე განმარტებით, თვითმფრინავი პრემიერის გასაფრენად სახელმწიფო დაცვის სამსახურმა შეუკვეთა. როგორც გაიაშვილმა აღნიშნა, მთავრობისთვის თვითმფრინავებს ყოველთვის სახელმწიფო დაცვის სამსახურის ხელმძღვანელი, ანზორ ჩუბინიძე უკვეთავს.

ამასთან, გაიაშვილის მტკიცებით, მისთვის უცნობია იყო თუ არა ღარიბაშვილის ვიზიტი მიუნხენში პირადი თუ სამსახურებრივი ხასიათის, თუმცა ამავე კონტექსტში მას მაგალითად მოჰყავს ქვეყნის მესამე პრეზიდენტის, მიხეილ სააკაშვილის ერთ-ერთი ვიზიტი გერმანიაში, რა დროსაც, გაიაშვილის თქმით, სააკაშვილმა ცხვირის ოპერაცია გაიკეთა.

“ქვეყნის პრემიერია, ვიღაც ქარხნის მუშა კი არ არის”, – განაცხადა გაიაშვილმა ირაკლი ღარიბაშვილზე.

უკვე დღეს, საქართველოს მთავრობის სტრატეგიული კომუნიკაციების დეპარტამენტმა კიდევ ერთი პოსტი გამოაქვეყნა, რომლითაც TV პირველს ღარიბაშვილის მგზავრობის შესახებ გასული სიუჟეტისთვის მიზანმიმართულ დეზინფორმაციაში ადანაშაულებს.

მათი მტკიცებით, რეისი, რომლითაც მთავრობის მეთაური მიუნხენში გაემგზავრა, კომერციული იყო და მგზავრობის თუ ნებისმიერი სხვა ხარჯი სახელმწიფო ბიუჯეტიდან არ გაწეულა.

“თვითმფრინავი, რომლითაც პრემიერმინისტრმა მიუნხენამდე იმგზავრა, იმყოფება სახელმწიფო დაცვის სპეციალური სამსახურის საჯარო სამართლის იურიდიული პირი სახელმწიფო უზრუნველყოფის სააგენტოს ბალანსზე. აღნიშნულ სააგენტოს აქვს სრული უფლება, მიიღოს შემოსავლები როგორც სამთავრობო და საბიუჯეტო სტრუქტურებიდან, ასევე არასამთავრობო, კომერციული და კერძო პირებისგან. მსგავსი კომერციული ტიპის რეისი მანამდეც არაერთხელ შესრულებულა”, – ნათქვამია განცხადებაში.

● ღარიბაშვილი ჩარტერით ევროპაში ჩავიდა, ევროპიდან ამერიკაში – რეგულარულით. მთავრობის შეცვლილი განმარტება
● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?
● “ე.წ. მეორე ფრონტზე დეზინფორმაციის მიზანი საზოგადოების მოწამვლაა” – რა თქვა ბორელმა პრემიერთან შეხვედრაზე

საია: ღარიბაშვილის თვითმფრინავთან დაკავშირებული დოკუმენტაცია უნდა გასაჯაროვდეს

საქართველოს ახალგაზრდა იურისტთა ასოციაციის თავმჯდომარე, ნონა ქურდოვანიძე პრემიერმინისტრ ირაკლი ღარიბაშვილზე TV პირველის მიერ გავრცელებულ ინფორმაციას ეხმაურება. მისი თქმით, ღარიბაშვილის თვითმფრინავთან დაკავშირებული დოკუმენტაცია უნდა გასაჯაროვდეს.

“ძალიან დიდი პრობლემაა. თუ რეისის დაფინანსება სახელმწიფო ბიუჯეტიდან არ მომხდარა, ეს მდგომარეობას ვერ ამსუბუქებს, რადგან კითხვები ჩნდება საიდან აქვს პრემიერს ამხელა შემოსავალი. ამ საკითხებით გამოძიება  უნდა დაინტერესდეს. ქონებრივი დეკლარაცია არ არის ის ფორმა, რომლითაც ასეთ კითხვებზე პასუხებს მიიღებს საზოგადოება. მით უფრო, რომ პრემიერს მისი შევსება 2024 წელს მოუწევს.” – წერს ქურდოვანიძე.

საიას თავმჯდომარის განმარტებით, დაუყოვნებლივ უნდა გასაჯაროვდეს სახელმწიფო უზრუნველყოფის სააგენტოსთან დადებული ხელშეკრულება, რომელიც დაადასტურებს, რომ პრემიერმა ასეთი მომსახურება მართლაც შეიძინა და სადაც მომსახურების ღირებულებაც უნდა იყოს მითითებული

გარდა ამისა, ქურდოვანიძე ხაზს უსვამს, რომ საჯარო უნდა გახდეს საბანკო გადარიცხვის დამადასტურებელი ქვითარი, სადაც გამოჩნდება, ვის მიერ არის ეს სახსრები გადახდილი.

არასამთავრობოები პროკურატურას: დაიწყეთ გამოძიება, სიუჟეტში შესაძლო დანაშაულის ნიშნებია გადმოცემული

ექვსი არასამთავრობო ორგანიზაცია მოუწოდებს საქართველოს გენერალურ პროკურატურას, პრემიერმინისტრის აშშ-ში ვიზიტთან დაკავშირებით ტელეკომპანია “პირველის” ეთერში “გადმოცემული შესაძლო დანაშაულის ნიშნების შემცველი  ინფორმაციის საფუძველზე დაუყოვნებლივ დაიწყოს გამოძიება”. 

“არსებითია, შემთხვევაზე მაღალი საზოგადოებრივი ინტერესის დაკმაყოფილების მიზნით, სახელმწიფო დაცვის სპეციალური სამსახურის საჯარო სამართლის იურიდიულმა პირმა, სახელმწიფო უზრუნველყოფის სააგენტომ გაასაჯაროოს რეისთან დაკავშირებული ინფორმაცია, მათ შორის, ხელშეკრულება მხარეების მითითებით, ასევე, ხარჯთაღრიცხვასა და ანგარიშსწორებასთან დაკავშირებული დოკუმენტები.” – ნათქვამია განცხადებაში

არასამთავრობო ორგანიზაციებს მიაჩნიათ, რომ “TV პირველის” სიუჟეტში გავრცელებული ინფორმაცია რამდენიმე მიმართულებით უნდა გახდეს სახელმწიფო ინსტიტუტების შესწავლის საგანი:

• საქართველოს პრემიერმინისტრი ირაკლი ღარიბაშვილის ყოველთვიური ხელფასის და  2022 წლის ქონებრივი მდგომარეობის დეკლარაციის გათვალისწინებით, მის შემოსავლებსა და  სახელმწიფო უზრუნველყოფის სააგენტოს ბალანსზე არსებული თვითმფრინავით კომერციული ვიზიტების განხორციელებისთვის საჭირო ხარჯებს შორის შესაძლო დისპროპორციის გამო, საინტერესოა, თუ რა არის პრემიერის ფინანსური წყარო. 
• საქართველოში კლეპტოკრატიის მზარდი ტენდენციების გათვალისწინებით, მნიშვნელოვანია სახელმწიფო უწყებებმა ეფექტიანი რეაგირება მოახდინონ ამ და სხვა ფაქტებზე, ვინაიდან, ეს  არ არის პირველი შემთხვევა, როცა პრემიერმინისტრისა და მისი ოჯახის წევრების ირგვლივ გავრცელებული ინფორმაცია იწვევს ღარიბაშვილის თანამდებობის ან მასთან დაკავშირებული შესაძლებლობის ბოროტად, ქონებრივი ან სხვა სიკეთის მიღების მიზნით გამოყენების ეჭვებს. 

“კლეპტოკრატიის შედეგად, ადამიანების კონკრეტული ჯგუფის გამდიდრება ბიუჯეტის ხარჯზე და შემდეგ აღნიშნული სიმდიდრის გამოყენება ძალაუფლების შენარჩუნებისთვის, ძირს უთხრის ქვეყანაში დემოკრატიულ ინსტიტუტებს.” – ვკითხულობთ NGO-ების განცხადებაში.

ხელმომწერი ორგანიზაციები: 
საქართველოს ახალგაზრდა იურისტთა ასოციაცია;
საფარი; 
სამართლიანი არჩევნებისა და დემოკრატიის საერთაშორისო საზოგადოება; 
საერთაშორისო გამჭვირვალობა საქართველო; 
ღია საზოგადოების ფონდი; 
დემოკრატიის მცველები.

მთავრობის ადმინისტრაციის უფროსი: პრემიერს კერძო ვიზიტისას არასდროს უმგზავრია ბიუჯეტის ხარჯზე

მთავრობის ადმინისტრაციის უფროსი რევაზ ჯაველიძე ირაკლი ღარიბაშვილის აშშ-ში შვილთან ერთად ვიზიტზე ამბობს, რომ პრემიერს კერძო ვიზიტისას არასდროს უმგზავრია ბიუჯეტის ხარჯზე და “არც აპირებს.”

“მინდა ცალსახა განცხადება გავაკეთო, რომ საქართველოს პრემიერმინისტრი კერძო ვიზიტის დროს არასოდეს არ უმგზავრია, არც ამ კონკრეტულ შემთხვევაში უმგზავრია და არც მომავალში არ აპირებს, იმგზავროს ბიუჯეტის ხარჯზე.

მას საქართველოს კანონი არ დაურღვევია, სამთავრობო ბორტის გამოყენების უფლება მას აქვს, ისევე როგორც სახელმწიფო დაცვის უფლება და ის კამპანია, რომელიც დღეს მიმდინარეობს, არის უბრალოდ ცილისმწამებლური, არის ცრუ, არის ტყუილი.

ეს იყო საქართველოს პრემიერმინისტრის კერძო ვიზიტი და ის არის პასუხისმგებელი იმ ხარჯებზე, რაც დაკავშირებულია ამ ვიზიტთან.” – ამბობს ჯაველიძე
______