ონლაინ-გაყიდვები აიკრძალა
კორონავირუსის პანდემიის შეჩერების მიზნით საქართველოში საყოველთაო კარანტინია. მთავრობის 30 მარტის დადგენილებით, განსაზღვრულია ის საწარმოები და ობიექტები, რომლებსაც გამონაკლისის სახით, საგანგებო მდგომარეობის დროს საქმიანობის უფლება აქვთ. დასაშვებ საქმიანობებს შორის მითითებულია მხოლოდ საკვების მიტანის სერვისი, რის გამოც არაერთ მსხვილ კომპანიას, მათ შორის ტექნიკის და წიგნების მაღაზიებს მუშაობის შეჩერება მოუწია.
2 აპრილის 10:00 საათისთვის, საქართველოში კორონავირუსით ინფიცირების 130 შემთხვევაა დადასტურებული. კარანტინის რეჟიმშია 5437 ადამიანი, ხოლო სტაციონარში მეთვალყურეობის ქვეშ – 260 პირი. კორონავირუსით ინფიცირებულთაგან 23 გამოჯანმრთელდა.
პრობლემები შეექმნათ მოქალაქეებს, რომლებიც ჯანდაცვის სამინისტროს რეკომენდაციებს იცავენ, სახლიდან გარეთ არ გადიან და ონლაინ მუშაობისთვის მაგალითად, ახალი ყურსასმენი, ან ვიდეოთვალი სჭირდებათ. გამოუვალ მდგომარეობაში აღმოჩნდნენ ტექნიკის მაღაზიებიც, რომლებსაც ხელისუფლება სთხოვს, რომ თანამშრომლები შეინარჩუნონ და სამსახურიდან არ გაუშვან.
“თუ გვეუბნებიან, რომ უნდა შევინარჩუნოთ თანამშრომლები, ამისთვის კომპანიამ უნდა იარსებოს, ამიტომ რაიმე სახით რეალიზაცია უნდა გვქონდეს, ონლაინ მაღაზია ამისთვის კარგი საშუალებაა”, – ამბობს „ბეკოს“ გენერალური დირექტორი, მეჰმედ მელექი.
“ბეკომ” 21 მარტს, საგანგებო მდგომარეობის გამოცხადებისთანავე დაკეტა ოფისი და ყველა მაღაზია და დისტანციურ მუშაობაზე გადავიდა, 30 მარტს გამოცემული მთავრობის დადგენილების შემდეგ კი სერვის-ცენტრების და საწყობების დაკეტვა მოუწია.
ტელეკომპანია “იმედთან” ინტერვიუში პრემიერ-მინისტრ გიორგი გახარიას გადაცემის წამყვანმა ჰკითხა, იყო თუ არა შესაძლებელი, რომ ხელმისაწვდომი დარჩენილიყო ონლაინ გაყიდვები და რატომ აიკრძალა ეს საქმიანობა, რაზეც გახარიამ უპასუხა:
“ბევრმა ადამიანმა შემაწუხა ამასთან დაკავშირებით და მომმართა. იყო დასაბუთებული, საკმაოდ სერიოზული არგუმენტები, რომელსაც მივიღებთ, მაგრამ იყო, მაგალითად, “თუ მინდა ტელეფონის ან ნაუშნიკის ყიდვა”… როგორ შეიძლება, როდესაც ამხელა გამოწვევაზე ვსაუბრობთ, ვერ მოვითმინოთ ორი კვირის განმავლობაში მუსიკალური პლეიერის ყიდვა, ეს უბრალოდ, ჩემთვის გაუგებარია. ”
პრემიერ-მინისტრმა აღნიშნა, რომ მომსახურების სფერო ერთ-ერთი ყველაზე დიდი სფეროა, ოფისებში ბევრი თანამშრომელია და მათ ბევრ მომხმარებელთან უწევთ ურთიერთობა და კრიტიკულად მნიშვნელოვანია, რომ კომპანიებმა უსაფრთხოების პირობები დაიცვან.
პრემიერ-მინისტრის განცხადებით, ყველა ის კომპანია, რომელიც უსაფრთხოების წესებს მაქსიმალურად დაიცავს, ონლაინ გაყიდვების უფლებას მიიღებს.
- რას ნიშნავს საგანგებო მდგომარეობა – რისი უფლება გვაქვს და რისი არა
- მარნეული და ბოლნისი დაიკეტა
- მარნეული ეპიდაფეთქების მოლოდინში. რა ხდება დახურულ ქალაქში
- საქართველოში საყოველთაო კარანტინი ცხადდება
კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 23 მარტს კი კორონავირუსის შიდა გავრცელების გამო მარნეული და ბოლნისი დაიკეტა. კორონავირუსის შიდაგავრცელების მაღალი რისკის გამო 31 მარტიდან საქართველოს მთელს ტერიტორიაზე კომენდანტის საათი ამოქმედდა.