ოკუპირებულ ცხინვალში ე.წ. ლგბტ პროპაგანდის აკრძალვა სურთ
ლგბტ პროპაგანდა სამხრეთ ოსეთში
ე.წ. სამხრეთ ოსეთში სკანდალი აგორდა, რის შემდეგაც ე.წ. ხელისუფლებამ გადაწყვიტა მიეღო კანონი “ლგბტ პროპაგანდის“ აკრძალვის შესახებ.
არიან ლგბტ ადამიანები, მაგრამ კანონი არ არსებობს
ე.წ. შინაგან საქმეთა სამინისტრომ მოუწოდა პარლამენტს შეიმუშაოს და მიიღოს კანონი, რომელიც კრძალავს “ლგბტ პროპაგანდას და არატრადიციული სექსუალური ორიენტაციის დემონსტრირებას“, რუსეთის კანონის მსგავსად. შსს-ს პრესსამსახურში ხაზგასმით აღნიშნეს, რომ მსგავსი მითითება მათ ოკუპირებული სამხრეთ ოსეთის ე.წ. პრეზიდენტმა ალან გაგლოევმა მისცა.
“ამ კანონის საჭიროება განპირობებულია იმით, რომ ზოგიერთი მოქალაქე იყენებს რუსეთში აკრძალულ სოციალურ ქსელს Hornet-ს, რომელიც უზრუნველყოფს წვდომას ლგბტ თემთან დაკავშირებულ გაცნობის აპლიკაციასთან. დეპარტამენტი აწარმოებს გამოძიებას, თუმცა დეტალებს კონფიდენციალურობის გამო არ ასაჯაროებს“, – აცხადებენ სამინისტროში.
ოფიციალური პირების თქმით, “ლგბტ პროპაგანდა ვერ ისჯება კანონმდებლობის არარსებობის გამო.”
„სამხრეთ ოსეთის შინაგან საქმეთა სამინისტრო ასევე აწარმოებს ოპერატიულ საგამოძიებო მოქმედებებს იმ პირების წინააღმდეგ, რომლებიც ავრცელებენ რესპუბლიკის მაცხოვრებლების ფოტოებს ანონიმურ Telegram-ის არხებზე, ამცირებენ მათ ღირსებას და აკავშირებენ მათ ლგბტ პირებთან“, – წერს სამინისტრო.
ცხინვალის საიდუმლო ცხოვრება
შსს-ს რეაქცია, როგორც გაირკვა, მოჰყვა ხმამაღალ სკანდალს, რომელიც ცხინვალის ერთ-ერთ რესტორანში მოხდა. სამართალდამცავები აცხადებენ, რომ მათ ამ პოპულარული დაწესებულების სარდაფში “გეი ორგია” აღკვეთეს.
როგორც ირკვევა ორგიებში მონაწილეობენ ძირითადად ახალგაზრდა ბიჭები, მაგრამ ისინი ამბობენ, რომ ამ თემის წევრებს შორის არიან ადამიანები, რომლებიც იკავებენ თანამდებობებს მთავრობასა და სამართალდამცავ ორგანოებში.
დაკავებულები შსს-მ დაკითხა, თუმცა მათგან მხოლოდ ათმა აღიარა, რომ ისინი ჰომოსექსუალები იყვნენ. დანარჩენები ამტკიცებდნენ, რომ იქ შემთხვევით მოხვდნენ.
ასეა თუ ისე, ყველა მალე გაათავისუფლეს, რადგან არ არსებობდა შესაბამისი კანონი, რომლითაც ისინი პასუხისმგებლობის დაკისრებას შეძლებდნენ. ამიტომ ხელისუფლებამ გადაწყვიტა სასწრაფოდ მიეღო ასეთი კანონი.
უფრო მეტიც, მთელ ამ ამბავს საზოგადოებაში მკვეთრად უარყოფითი რეაქცია მოჰყვა და ე.წ. პრეზიდენტ გაგლოევს სამხრეთ ოსეთიდან “ქვეყნის შემარცხვენლების“ განდევნა მოსთხოვეს.
ჭორების თანახმად, ინტერნეტში ვრცელდება “გეი თემის წევრების” ფოტოების კოლაჟი, მათ შორის პარლამენტის წევრის და ცნობილი ბიზნესმენის. მაგრამ ეს ორი, სამართალდამცავების თქმით, ცილისწამების მსხვერპლი გახდა:
„რაც შეეხება ბიზნესმენს და დეპუტატს, ეს არის მიზანმიმართული ფაბრიკაცია მათი სახელის დისკრედიტაციის მიზნით.”
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
