ახალი ინიციატივით, უცხოური გრანტის მიღებას მთავრობის თანხმობა დასჭირდება. იკრძალება უცხოური ორგანიზაციების მხარდაჭერით ღონისძიებებიც
ოცნების ახალი ინიციატივები
“ინტერპრესნიუსის” ინფორმაციით, უცხოური გრანტის მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება – თანხმობის გარეშე გაცემული გრანტის მიღება აკრძალული იქნება და პასუხისმგებლობის დაკისრებას გამოიწვევს. შესაბამისი კანონპროექტი არალეგიტიმური პარლამენტის ვებ გვერდზე ჯერ არ გამოქვეყნებულა.
ამასთან, ოცნების ახალი საკანონმდებლო ინიციატივით, პოლიტიკური პარტიები და გაცხადებული საარჩევნო მიზნის მქონე პირები უცხოური ორგანიზაციების მხარდაჭერით ლექციის, სემინარის ან სხვა მსგავსი საჯარო ღონისძიების მოწყობას ვეღარ შეძლებენ.
აღნიშნული ცვლილებებით, საერთაშორისო ორგანიზაციებს პოლიტიკურ პარტიებისთვის ლექციების, სემინარების და სხვა საჯარო ღონისძიებების მოწყობის შესაძლებლობა აღარ ექნებათ.
IPN-ის ცნობით, პროექტის მიხედვით, მთავრობის მიერ გრანტის გაცემის თაობაზე თანხმობის გაცხადებისთვის 10-დღიანი ვადა განისაზღვრება.
მთავრობის გადაწყვეტილების გასაჩივრება მის მოქმედებას არ გააჩერებს. ამავე პროექტით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს. აკრძალული გრანტის მიღება გამოიწვევს გრანტის მიმღების დაჯარიმებას აღნიშნული გრანტის ორმაგი ოდენობით.
კანონპროექტი გამონაკლისებსაც ადგენს: კერძოდ, მთავრობის სავალდებულო თანხმობის წესი არ ვრცელდება საერთაშორისო სპორტული ასოციაციის, ფედერაციის და კომიტეტის მიერ გრანტის გაცემაზე, საქართველოს საზღვრებს გარეთ საშუალო და უმაღლესი განათლების მიღებისთვის და სამეცნიერო მუშაობისთვის გაცემულ ინდივიდუალურ სტიპენდიაზე, ასევე საქართველოში მოქმედი საერთაშორისო ორგანიზაციის მიერ გრანტის მიღებაზე.
კომენტარი
“ქართული ოცნების” წევრი არჩილ გორდულაძე ამბობს, რომ სახელმწიფოს უნდა შეეძლოს უცხოური თანხების ჩარიცხვის კონტროლი.
“ნებისმიერ თავმოყვარე ქვეყანას აქვს არამხოლოდ უფლება, არამედ, ვალდებულება, რომ დაიცვას თავისი ქვეყანა, თავისი ინტერესები, თავისი ხალხი ასეთი უხეში გარე ჩარევებისგან და ჩვენი გუნდის დაინიცირებული საკანონმდებლო ცვლილებებიც ამას გულისხმობს, როდესაც თანხები უცხოეთიდან ჩვენს ქვეყანაში ირიცხება, რა თქმა უნდა, სახელმწიფოს უნდა ჰქონდეს შესაძლებლობა, რომ მოხდეს ამ თანხების ჩარიცხვის კონტროლი და შეფასება, რაში იხარჯება ეს თანხები, რაც, შემდეგ, რა თქმა უნდა, გამჭვირვალობის რეესტრშიც აუცილებლად მოხვდება და აღარ იქნება შესაძლებელი, რომ ყველანაირი წესის, ყველაფრის გვერდის ავლით პირდაპირ თანხები ირიცხებოდეს ჩვენს ქვეყანაში და ათას უბედურებას ხმარდებოდეს.” – განაცხადა გორდულაძემ TV იმედის ეთერში.
