ხელისუფლების სატელიტი ორგანიზაცია გასამართლებით ოპოზიციის ამომრჩეველსაც ემუქრება
ნეიტრალური საქართველოს განცხადება
“ქართული ოცნების” სატელიტი პრორუსული ორგანიზაცია “ერთიანი ნეიტრალური საქართველო” გასამართლებით ახლა უკვე ოპოზიციის ამომრჩეველსაც ემუქრება. ორგანიზაციის გამოქვეყნებულ განცხადებაში ვკითხულობთ, რომ მათ სურთ, ასეთ ამომრჩეველს არჩევნებში მონაწილეობის მიღება აეკრძალოთ. ნეიტრალური საქართველო ოპოზიციურად განწყობილ მოქალაქეებს “სექტას” და “ქვეყნის მტრებს” უწოდებს.
“უსამშობლო აგენტურას, გასული 12 წლის განმავლობაში ორი ფაქტორი ასულდგმულებდა – გარე პატრონები და მათი სექტა, ანუ ამომრჩეველი.
“ახალი პოლიტიკური რეალობიდან გამომდინარე, ქართული ოცნება გვიან, მაგრამ მტკიცედ აცხადებს კოლექტიური ნაც-მოძრაობის გასამართლების დაპირებას. მიგვაჩნია, რომ მიზნის მიღწევა რთული იქნება, ვიდრე ადამიანთა ეს ჯგუფი აგრძელებს მათ მხარდაჭერას და არჩევნებში აძლევს ხმას. დანაშაულში თანამონაწილეობა კი, არა მხოლოდ მორალურად, არამედ სისხლის სამართლის კოდექსით დასჯადი ქმედებაა!
ამჯერად მაინც უნდა მოვახერხოთ პრობლემის და ბოროტების სათავემდე მისვლა და მისი ამოძირკვა. პრობლემის სათავე კი, როგორც აღინიშნა, სწორედ ის თითოეული რიგითი ამომრჩეველია, რომელიც ამ დროის განმავლობაში ასულდგმულებს და სიცოცხლეს უნარჩუნებს საზოგადოების მეტასტაზს, კრებსით ნაციონალურ მოძრაობას.” – ამბობენ ორგანიზაციაში.
მათი გამოთვლით, ასეთი ამომრჩეველი დაახლოებით 300 000-ია.
გამოხმაურება
პრემიერმინისტრ ირაკლი კობახიძის მტკიცებით, “10 ათასობით ადამიანის გასამართლების” იდეის განხილვას ქართული ოცნება არ აპირებს, თუმცა ის კვლავ “კოლექტიური ნაცმოძრაობის გასამართლების აუცილებლობაზე” მიუთითებს.
“რაც შეეხება თვითონ პარტიების გასამართლებას, პირველ რიგში, რა თქმა უნდა, ეს არის აუცილებელი იმისთვის, რომ საქართველოში დასრულდეს ეს ჩაკეტილი წრე, რასაც ჰქვია პოლარიზაცია, რადიკალიზმი. თუ კოლექტიური ნაცმოძრაობა არ გამოცხადდება არაკონსტიტუციურად, რისთვისაც ჩვენ შესაბამის პროცედურებს დავიწყებთ, აუცილებლად, არჩევნების შემდეგ, ისე პოლარიზაციის პრობლემა საქართველოში არასდროს არ მოგვარდება, მუდმივად ეს პოლიტიკური ძალა, ეს პოლიტიკური პარტიების ერთობლიობა იქნება დაბრკოლება ქართული დემოკრატიის განვითარების გზაზე.
რაც შეეხება ამომრჩეველს, მე ვერ განვიხილავ ასეთ საკითხს, რა თქმა უნდა, ჩემთვის წარმოუდგენელია ამომრჩევლის გასამართლება. მიუხედავად იმისა, რომ თითოეულ ამომრჩეველს პასუხისმგებლობა ეკისრება საკუთარი არჩევანის გამო, რა თქმა უნდა, ჩვენი მხრიდან ვერ იქნება განხილული ათი ათასობით ადამიანის გასამართლების საკითხი, ანუ ჩვენ ამაზე ვერც ფიქრს ვერ დავიწყებთ და რა თქმა უნდა, ეს იდეა ჩვენი მხრიდან ვერ იქნება აქტიურად განხილული.
ერთადერთი, ჩვენ მოვუწოდოთ თითოეულ ამომრჩეველს, რომ იმოქმედონ საკუთარი პასუხისმგებლობით”, – ამბობს კობახიძე.
მმართველი პარტია “ქართული ოცნების” პოლიტსაბჭოს განცხადებით, რაც შემდეგ ბიძინა ივანიშვილმაც გაიმეორა, მმართველ გუნდს საკონსტიტუციო უმრავლესობა მათ შორის იმიტომაც სჭირდება, რომ დააინიცირონ სამართლებრივი პროცესი, “რომლის შედეგადაც ერთიანი ნაციონალური მოძრაობა და ყველა მისი სატელიტი თუ მემკვიდრე პარტია არაკონსტიტუციურად გამოცხადდება”.
საქართველოს პრემიერმინისტრმა ირაკლი კობახიძემ ჟურნალისტის კითხვას, რომელი პარტიების აკრძალვას აპირებს მმართველი პარტია ქართული ოცნება, მკაფიო ჩამონათვალით უპასუხა: ენმ, ახალი, გირჩი, დროა, ლელო და გახარია საქართველოსთვის.
