მოლდოვის პრეზიდენტი კურორტზე სასტუმროს ნომერში დღეში 4 ათას ევროზე მეტს იხდის

მოლდოვის პრეზიდენტი იგორ დოდონი თურქეთში, ხმელთაშუა ზღვის სანაპიროზე ისვენებს მდიდრულ სასტუმროში, სადაც ნომრის ფასი 4 ათასი ევროდან იწყება. ამავდროულად, მისი ხელფასი 700 ევროზე ნაკლებია.

ამის შესახებ იუწყება მოლდოვური გაზეთი ZdG, რომელიც ამ ფაქტს კორუფციის ნიშნად აფასებს.

პრეზიდენტმა Facebook-ში თავის გვერდზე გამოაქვეყნა თვითმფრინავში გადაღებული ფოტო, რომელზეც ის ცოლთან და უცროს ვაჟთან ერთად არის ასახული, და დააზუსტა, რომ ოჯახი დასასვენებლად ხმელთაშუა ზღვის სანაპიროზე, თურქეთის კურორტ ანტალიაში ჩაიყვანა.

მოლდოვური გაზეთი ZdG-სთვის ცნობილი გახდა, რომ ისინი დაბინავდნენ ზღვის სანაპიროზე მდებარე ძვირფას სასტუმროში, სადაც ნომრის ფასი 4 ათასი ევროდან იწყება.

Facebook-ზე გამოქვეყნებულ პოსტში პრეზიდენტი არ ამხელს, თუ რამდენ ხანს გასტანს შვებულება. რამდენიმე ხნის შემდეგ მან ახალი პოსტი გამოაქვეყნა და განაცხადა, რომ ZdG-ს მონაცემები არასწორია, და ამ თემაზე მსჯელობას არ აპირებს, შემდეგ დასძინა, რომ პრეზიდენტის ოჯახს თურქეთში დასვენების შესაძლებლობა ანტალიაში მოლდოვის საპატიო კონსულმა შესთავაზა.

ZdG მაშინვე დაუკავშირდა საპატიო კონსულს, რომელმაც თქვა, რომ ქვეყნის მეთაურის შვებულების შესახებ მისთვის არაფერია ცნობილი და ბოლო თვის განმავლობაში მასთან არც კი უსაუბრია.

პრეზიდენტის თანამდებობაზე, რომელსაც იგორ დოდონი დეკემბრიდან იკავებს, მისი ხელფასი დაახლოებით 636 ევროს შეადგენს.  ეს კი ნიშნავს, რომ ქვეყნის მეთაურად ყოფნის ხუთი თვის განმავლობაში მან 3,500-მდე გამოიმუშავა.

მოლდოვის პრეზიდენტს ძვირფასი კურორტების მიმართ თავისი მიდრეკილება პირველად არ გამოუვლენია, – წერს Zdg. მანამდე ის ნათესავებთან და დაცვასთან ერთად შენიშნულია სოჭში, ირანსა და მოდურ იტალიურ კურორტ ბრეი-ჩერვინიაზე.