ქუთაისი: მძევლები თავისუფლები არიან. ბანკზე თავდამსხმელი აყვანილია

მძევლები საქართველოს ბანკში

ცხრასაათიანი მძევლობის შემდეგ გათავისუფლებულია 12-ვე ადამიანი, რომლებიც ქუთაისში, “საქართველოს ბანკის” ფილიალზე თავდასხმის დროს ნიღბიანმა თავდამსხმელმა მძევლად აიყვანა.

დაკავებულია თავდამსხმელიც. შსს-მ დაადასტურა, რომ სპეცოპერაცია დასრულებულია. თუმცა, სხვა დეტალები ცნობილი არ არის.

ანკესი, რუსული დროშა და ორი მილიონი

ქუთაისში, რუსთაველის ქუჩაზე მდებარე “საქართველოს ბანკის” ფილიალში ნიღბიანი, შეიარაღებული მძარცველი დაახლოებით დილის 11 საათზე შეიჭრა და იქ მყოფი ადამიანები მძევლად აიყვანა.

თავდამსხმელი თავიდან ითხოვდა ორ მილიონ დოლარს. შემდეგ ითხოვდა მილიონნახევარს.

იგი ასევე ითხოვდა, რომ მისთვის ქუთაისის ძველ აეროპორტში ვეტმფრენი დაეხვედრებინათ. გარდა ამისა, გამტაცებელი გაურკვეველი მიზეზით ითხოვდა “სპილინძის” ანკესსა და რუსეთის დროშას.

თავდასხმელი მძევლებს ემუქრებოდა, რომ ტანზე ასაფეთქებელი მოწოყობილობა აქვს მიმაგრებული. ასევე, იგი ამბობდა, რომ ლაზერული ბომბი მიამაგრა ბანკის კარებზე.

მთელი დღის განმავლობაში ბანკის ფილიალის შენობასთან მობილზებულები იყვნენ სამართალდამცავები. დღის მეორე ნახევარში ქუთაისში ჩავიდა შს მინისტრი ვახტანგ გომელაური.

თავდამსხმელს მთელი დღის განმავლობაში ჰქონდა კომუნიკაცია სამართალდამცველებთან. ის ამას მძევლების საშუალებით ახერხებდა. თითქმის ყოველ ნახევარ საათში ერთ-ერთი მძევლის ფეისბუკზე ვრცელდებოდა ლაივ-ვიდეოები ბანკის შენობიდან. ეს ლაივ ჩართვები სწორედ თავდამსხმელის ინიციატივა იყო.

ბანკის შენობაზე თავდასხმის და მძევლების აყვანის ეს პირველი შემთხვევა არ არის საქართველოში.

ერთ-ერთი ყველაზე გახმაურებული ძარცვა ორი წლის წინ, 2020 წლის 21 ოქტომბერს ზუგდიდში მოხდა. მაშინაც თავდამსხმელი, რომელიც 1988 წელს დაბადებული ბადრი ესებუა აღმოჩნდა, “საქართველოს ბანკის” ფილიალში შეიჭრა და 43 მძევალი აიყვანა და მათი გათავისუფლების სანაცვლოდ 500 ათასი დოლარი მოითხოვა.

მოლაპარაკება 8 საათი გრძელდებოდა. თავდამსხმელი მძევლებს ეტაპობრივად ათავისუფლებდა, ღამით კი სამ მძევალსა და ავთანდილ გალდავასთან (სამეგრელო-ზემო სვანეთის პოლიციის დეპარტამენტის მაშინდელი დირექტორი) ერთად ბანკი მანქანით დატოვა. მას შემდეგ ესებუა არავის უნახავს და მის შესახებ არაფერია ცნობილი.