მასობრივი პროტესტი მობილიზაციის წინააღმდეგ დაღესტანში
გაზიარება
გაზიარება
მასობრივი პროტესტი მობილიზაციის წინააღმდეგ დაღესტანში
დაღესტანში რუსეთის პრეზიდენტის მიერ გამოცხადებული მობილიზაციის წინააღმდეგ საპროტესტო აქციები მწვავდება. 25 სექტემბერს, მახაჩკალის ცენტრში, უკვე ასობით ქალი აპროტესტებდა პუტინის მობილიზაციას – გადაკეტილია გზები, პერმანენტული ხასიათი აქვს პოლიციასთან შეტაკებებსაც.
„ჩვენ თავს არავინ დაგვსხმია, სწორედ რუსეთი დაესხა თავს უკრაინას! არა ომს! ჩვენი შვილები სასუქები არ არიან!” – ისმოდა მიტინგზე.
უკრაინაში დაღუპული სამხედროების მხრივ, რეგიონებს შორის ლიდერი სწორედ დაღესტანია. მედიაზონას ცნობით, ბოლო მონაცემებით, ამ ომს ჩრდილოეთ კავკასიის ამ რესპუბლიკიდან სულ მცირე 306 ადამიანი ემსხვერპლა.
„ქალები ამბობენ, რომ ისინი მობილიზაციის წინააღმდეგნი არიან, არ სურთ თავიანთი შვილების დასაკლავად გარეკვა. ჩვენ ვამბობთ, რომ ჩვენ წინააღმდეგი ვართ ამ ომის, რომ ჩვენ არავინ დაგვსხმია თავს, რომ არ გვინდა ბრძოლა უკრაინის წინააღმდეგ“, – განუცხადა მედიაზონას საპროტესტო აქციის მონაწილე ქალმა მადინამ.
„პოლიციამ ხალხის მასიდან გაგვათრია, ტროტუარზე დაგვაგდო. ისინი ბიჭებთან კიდევ უფრო მკაცრები იყვნენ – ელექტროშოკებით დაამუშავეს. მეშინია, რომ ისინი შესაძლოა ციხეში მოხვდნენ პოლიციელებზე თავდასხმისთვის. ჰოდა, ქალებიც, ცდილობდნენ მათ დაბრუნებას.“ – დასძენს მადინა.
სოფელ ხასავიურთში ხალხი მობილიზაციის წინააღმდეგ 22 სექტემბერს სპონტანურად გამოვიდა. დაღესტნის ტელეგრამის არხი ირწმუნება, რომ სოფლიდან გამოიძახეს 110 ადამიანი, “მათ შორის ბიჭები, რომლებიც ცოტა ხნის წინ ჩამოვიდნენ ჯარიდან”.
25 სექტემბერს პოლიციამ მომიტინგეების დასაშლელად და დასაშინებლად ჰაერში ავტომატიდან გაისროლა.
როგორც Кавказский узел იუწყება, მახაჩკალაში, ომის საწინააღმდეგო აქციაზე, დღის მეორე ნახევარში პოლიციელების დიდი რაოდენობა მივიდა. ისინი წიწაკის სპრეის იყენებენ.
დაღესტნის ხელმძღვანელმა სერგეი მელიკოვმა აღიარა, რომ მობილიზაციის დროს სამსახურში გამოიძახეს ადამიანები, რომლებიც არ ექვემდებარებოდნენ გაწვევას, მაგრამ, მისი თქმით, “შეცდომები მალევე გამოსწორდა.”
