მარტა კოსი: საქართველო აშკარა მაგალითია, რომ ევროკავშირის გზაზე უკუსვლაც შეიძლება მოხდეს
მარტა კოსი საქართველოზე
გაფართოების საკითხებში ევროკავშირის კომისარმა, მარტა კოსმა ევროპარლამენტის საგარეო საქმეთა კომიტეტში სიტყვით გამოსვლისას საქართველოზე ისაუბრა. მისი თქმით, იმის ფონზე, როცა ქვეყნის მოსახლეობის უდიდეს ნაწილს პროევროპული პოზიცია უჭირავს, “ქართული ოცნება” ნაბიჯებით, როგორიცაა რუსული და მაუწყებლობის შესახებ კანონების მიღება, საპირისპირო მიმართულებით მიდის.
რა თქვა მარტა კოსმა
“საქართველო აშკარა მაგალითია, რომ ევროკავშირის გზაზე უკუსვლაც შეიძლება მოხდეს, რომ როდესაც ქვეყნისთვის კანდიდატის სტატუსის მიცემას დავიწყებთ, ეს ავტომატურად არ ნიშნავს, რომ ევროკავშირისკენ წინსვლა მოხდება.
მაშინ, როცა ათასობით ადამიანი ევროკავშირის დროშებით გამოდის, ხელისუფლება საპირისპირო მიმართულებით მიდის, საქართველოს უცხოური აგენტების რეგისტრაციის აქტი წარმოადგენს ქვეყნის დემოკრატიისთვის სერიოზულ უკუსვლას, ისევე როგორც ბოლო კანონები მაუწყებლობისა და გრანტის შესახებ, ეს საფრთხეს უქმნის საქართველოს დემოკრატიულ საფუძვლებს.
ჩვენს ერთობლივ განცხადებაში, რომელიც წინა კვირას გამოქვეყნდა, უმაღლესმა წარმომადგენელმა [კაია] კალასმა და მე მოვუწოდეთ საქართველოს ხელისუფლებას, მოუსმინოს თავისი მოქალაქეების აშკარა მოთხოვნებს დემოკრატიისა და ევროპული მომავლის შესახებ, და გაათავისუფლოს ყველა უსამართლოდ დაკავებული ჟურნალისტი, აქტივისტი, აქციის მონაწილე და პოლიტიკური ლიდერი.
ისევ და ისევ, პასუხისმგებლობა მხოლოდ საქართველოს ხელისუფლებას აკისრია. საქართველოს ევროკავშირის გზაზე დაბრუნება ჩვენ მხოლოდ იმ შემთხვევაში უნდა განვიხილოთ, თუკი ხელისუფლება დამაჯერებელ ნაბიჯებს გადადგამს, რათა კურსი იცვალოს დემოკრატიულმა უკუსვლამ და ამ პერიოდში ჩვენ ნამდვილად უნდა დავეხმაროთ სამოქალაქო საზოგადოების ორგანიზაციებსა და ქართველ ხალხს.”
31 მაისს საგარეო და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა და გაფართოების საკითხებში ევროკავშირის კომისარმა, მარტა კოსმა ოცნების “FARA”-ს კანონის შესახებ ერთობლივი განცხადება გაავრცელეს და აღნიშნეს, რომ კანონი საქართველოს დემოკრატიისთვის სერიოზულ უკუსვლას წარმოადგენს და მისი მიღება “ქართული ოცნების” კიდევ ერთი აგრესიული ქმედებაა განსხვავებული აზრის ჩასახშობად.
ესტონეთის საგარეო საქმეთა მინისტრმა მარგუს ცაჰკნამ სოციალურ ქსელში ევროკომისიის განცხადება გააზიარა და დაწერა:
“FARA, რომელიც დღეს შედის ძალაში, “ოცნების“ მიერ დემოკრატიის ჩასახშობად კიდევ ერთი სასტიკი ნაბიჯია. კანონი არღვევს დემოკრატიის ძირითად პრინციპებს, კრიტიკოსებს, სამოქალაქო საზოგადოებასა და მედიას აჩუმებს და საქართველო ევროკავშირისკენ მიმავალი გზიდან გადაჰყავს“.
