მარია ზახაროვა: მოსკოვი მზადაა, თბილისს აფხაზეთთან და სამხრეთ ოსეთთან, როგორც სახელმწიფოებთან, დიალოგში დაეხმაროს
მარია ზახაროვა აფხაზეთზე და სამხრეთ ოსეთზე
რუსეთის საგარეო საქმეთა სამინისტროს პრესსპიკერმა მარია ზახაროვამ ბრიფინგზე განაცხადა, რომ მოსკოვი მზადაა, თბილისს აფხაზეთთან და სამხრეთ ოსეთთან, “როგორც სახელმწიფოებთან”, დიალოგში დაეხმაროს.
მან ასევე განმარტა, რომ საქართველოს ხელისუფლების ბოლოდროინდელი ინიციატივა მოუხადოს ბოდიში სამხრეთ ოსეთის ხალხს 2008 წლის აგვისტოში “სააკაშვილის რეჟიმის მიერ გაჩაღებული ომისთვის, გარკვეულ იმედებს იძლევა”.
ზახაროვამ აღნიშნა, სოხუმი და ცხინვალიც მზად არიან “გადაფურცლონ ტრაგიკული ფურცელი საქართველოსთან ურთიერთობის ისტორიაში.”
რა თქვა ზახაროვამ
“საქართველოს, აფხაზეთსა და სამხრეთ ოსეთს შორის პოსტკონფლიქტური დარეგულირების საკითხები ამიერკავკასიაში უსაფრთხოებისა და სტაბილურობის შესახებ ჟენევის საერთაშორისო დისკუსიების ეგიდით განიხილება.
ჩვენი საერთო პრიორიტეტები ჩვენს აფხაზ და სამხრეთ ოს მოკავშირეებთან უცვლელი რჩება. ეს არის თბილისის მხრიდან ცხინვალისა და სოხუმის წინააღმდეგ ძალის გამოუყენებლობის იურიდიულად სავალდებულო გარანტიების ხელშეკრულება, ასევე ამ რესპუბლიკებთან სახელმწიფო საზღვრების დელიმიტაციის პროცესის დაწყება. რეგიონში განვითარებული გეოპოლიტიკური რეალობის მიმართ მხარეების მიდგომებში დარჩენილი ფუნდამენტური განსხვავებების გათვალისწინებით ამ საკითხებში პროგრესზე საუბარი ჯერჯერობით შეუძლებელია.
ჩვენ გვესმის, რომ არც საქართველოში, არც აფხაზეთში და არც სამხრეთ ოსეთში არავის არაფერი დაავიწყდება. მაგრამ ერთია მეხსიერების არდავიწყება და შენახვა, მეორეა წინსვლა ურთიერთობების ნორმალიზებისთვის და იმ წინააღმდეგობების დასაძლევად, რომლებიც მძევლად სააკაშვილმა აიყვანა.” – განაცხადა ზახაროვამ.
შეგახსენებთ, რომ “ქართული ოცნების” დამფუძნებელმა და საპატიო თავმჯდომარემ, ბიძინა ივანიშვილმა გორში სიტყვით გამოსვლისას აგვისტოს ომსა და ტერიტორიულ მთლიანობაზე ისაუბრა, ამ კონტექსტში კი ქვეყნის არაფორმალურმა მმართველმა 2008 წლის ომში კვლავ არა რუსეთი, არამედ ყოფილი ხელისუფლება დაადანაშაულა და ნაციონალური მოძრაობისთვის “ნიურნბერგის პროცესი” დააანონსა. მან ასევე განაცხადა, რომ საქართველოს სამხრეთ ოსეთს “ბოდიში უნდა მოუხადოს.”
რუსეთის საგარეო საქმეთა მინისტრის, სერგეი ლავროვის თქმით, მოსკოვი მზად არის, მხარეების დაინტერესების შემთხვევაში საქართველო “მეზობლებთან” – “აფხაზეთისა და სამხრეთ ოსეთის ქვეყნებთან” შეარიგოს.
ამასთან, ჟენევის დისკუსიების მორიგი რაუნდის წინ, აფხაზეთის ე.წ. საგარეო საქმეთა მინისტრმა სერგეი შამბამ განაცხადა, რომ საქართველოს მხრიდან ბოდიშის მოხდა ხელს შეუწყობს ქართულ-აფხაზური კონფლიქტის დარეგულირებას.
სოხუმში ჟენევის დისკუსიების თანათავმჯდომარეებთან შეხვედრისას შამბამ აღნიშნა მმართველი პარტია “ქართული ოცნების“ დამფუძნებლის, ბიძინა ივანიშვილის ბოლო განცხადება, რომ საქართველოს მთავრობა აპირებს ოსებს ბოდიში მოუხადოს 2008 წლის ომის გამო. შამბას თქმით, თუ თბილისმა იგივე გააკეთა აფხაზების მიმართ და ბოდიში მოიხადა 1992-93 წლების აფხაზეთის ომის დაწყებისთვის, ეს შეიძლება იყოს პირველი ნაბიჯი შერიგებისკენ.
