სიამაშვილები ყოველ წელს, სკოლის დაწყების დღეს, ოჯახურ ფოტოს იღებენ. ნახეთ, რა სწრაფად იზრდებიან ბავშვები
მშობლები ხშირად ვერ ამჩნევენ, როგორ იზრდებიან მათი შვილები. როგორ იცვლებიან ისინი წლიდან წლამდე. გაიხედავთ და თქვენი პატარა გოგონა და ცელქი ბიჭი უკვე დიდები არიან – სკოლას ამთავრებენ, დამოუკიდებელ ცხოვრებას იწყებენ.
ბავშვები მართლაც ელვის სისწრაფით იზრდებიან და იმისთვის, რომ წლიდან წლამდე მიმდინარე ეს ცვლილებები დაეჭირა, მალხაზ სიამაშვილმა ასეთი ტრადიცია დანერგა – ყოველი სასწავლო წლის დაწყების დღეს, დილით, სკოლაში წასვლამდე, ერთსა და იგივე ადგილას – სახლის ჭიშკართან, ის და მისი შვილები ერთობლივ ფოტოს იღებენ.
ფოტოების გადაღება მახომ 2013 წელს დაიწყო, როდესაც მისი უფროსი გოგონა – ლიზი მესამე კლასში იყო, დღეს ის უკვე 15 წლისაა. შუათანა – ნანუკა – პირველ კლასში წავიდა, ხოლო ნაბოლარა – გიგი ორი წლისაც არ იყო.
ეს ტრადიცია უკვე მერვე წელია გრძელდება. თავდაპირველად ფოტოებზე ლიზი და ნანუკაა. მერე, გიგი რომ გაიზარდა, ისიც შეუერთდა დებს.
თუმცა, წელს ტრადიცია დაირღვა – კორონავირუსის პანდემიის გამო ქობულეთში, სადაც სიამაშვილების ოჯახი ცხოვრობს, სკოლები არ დაწყებულა, შესაბამისად, არც სასწავლო წლის პირველი დღე ყოფილა და არც ტრადიციული ფოტო.
სექტემბრის დღეებს ისინი შავი ზღვის ნაპირას, კაპროვანში ატარებენ, სადაც პატარა საოჯახო ბიზნესი აქვთ.
ჩაყევით და ნახეთ, როგორ გარბის დრო და როგორ იცვლებოდნენ წლიდან წლამდე მამა და ბავშვები. (თუ კომპიუტერთან ხართ, რომელიმე ფოტოს დააჭირეთ და სლაიდერი ჩაირთვება).
