ლავროვის შვილი საქართველოშია? პროტესტი ყვარლის ტბასთან რუსული ქორწილის გამო
ლავროვის შვილი საქართველოში
კახეთში, სასტუმრო „ყვარლის ტბის“ მიმდებარე ტერიტორიაზე, სადაც დილიდან მიმდინარეობს საპროტესტო აქცია, პოლიცია აქტივისტებს აკავებს.
შსს-სინფორმაციით, დაკავებულია 16 აქტივისტი.
მათ შორის არიან პოლიტიკური მოძრაობა “დროას” წევრები. ასევე “ნაციონალური მოძრაობა” აცხადებს, რომ დაკავებულია მათი აქტივისტები.
ყვარლის ტბაზე აქციის მიზეზი გახდა ინფორმაცია, რომელიც გუშინ გავრცელდა – დაუდასტურებელი ინფორმაციით, ყვარლის ტბაზე რუსეთის საგარეო საქმეთა მინისტრის, სერგეი ლავროვის ოჯახის წევრები იმყოფებიან, კერძო კი ქალიშვილი, ეკატერინა ვინოკუროვა და მისი ქმარი. გავრცელებული ინფორმაციით, ყვარლის ტბის სასტუმროში ლავროვის სიძის ძმა იხდის ქორწილს.
ინფორმაციამ იმის შესახებ, რომ საქართველოში აგრესორი ქვეყნის მაღალჩინოსნის ოჯახია ჩამოსული, საზოგადოებაში დიდი ვნებათაღელვა გამოიწვია. ლავროვი და მისი ოჯახის წევრები დასავლური სანქციების ქვეშ არიან. გარდა იმისა, რომ ყვარელში დილიდან აქცია იმართება, მომხმარებლებმა უარყოფითი კომენტარები და შეფასებები დატოვეს ასევე სასტუმრო “ყვარლის ტბის” ფეისბუკ-გვერდზე.
არის თუ არა ეკატერინა ლავროვა საქართველოში?
ეს ინფორმაცია ჯერ არც ერთ ოფიციალურ უწყებას არ დაუდასტურებია. ინფორმაციას უარყოფს „ყვარლის ტბის“ ადმინისტრაცია. ისინი აცხადებენ, რომ სასტუმროში რუსეთიდან ჩამოსული სტუმრები არ იმყოფებიან, მათ შორის, არც ლავროვის ოჯახის წევრები.
პირველად ინფორმაცია ლავროვის ოჯახის საქართველოში ყოფნის შესახებ მოძრაობა “დროას” ლიდერმა ელენე ხოშტარიამ და ტელეკომპანია “მთავარმა არხმა” გაავრცელეს. ხოშტარია ამბობს, რომ წყვილმა თბილისში მოაწერა ხელი, წვეულება კი კახეთში დაიგეგმა.
ინფორმაცია ხელმოწერის შესახებ დასტურდება ფოტოებით, რომლებიც ლავროვის შვილის მაზლის, მიკა ვინოკუროვის ფეისბუკზე ვრცელდება.
“მთავარის” ჟურნალისტმა ინფორმაციის გადასამოწმებლად ყვარლის ტბის სასტუმროში დარეკა, ყვავილების მაღაზიის თანამშრომლად გაეცნო და უთხრა, რომ შეკვეთილი იყო თაიგული ეკატერინა ლავროვას სახელზე და ნამდვილად ხომ ცხოვრობდა ამ სახელის და გვარის ადამიანი მათ სასტუმროში. სასტუმროს წარმომადგენელმა გადასამოწმებლად დრო ითხოვა, შემდეგ დაადასტურა, რომ სტუმარი ყვარლის ტბის სასტუმროში იყო გაჩერებული.
თუმცა, მას შემდეგ რაც ეს ინფორმაცია პრესაში გამოჩნდა, სასტუმრომ უარყო ეკატერინა ლავროვას სტუმრობა და სპეციალურ განცხადებაც გამოაქვეყნა, სადაც აღნიშნულია, რომ არც ერთი სტუმარი მათ სასტუმროში ლავროვის გვარით არ ფიქსირდება. სასტუმრო და მისი მიმდებარე ტერიტორია ორი დღით მართლაც დახურულია და იქ შესვლის უფრობას დაცვა არავის აძლევს, თუმცა ყვარლის ტბის ადმინისტრაცია ამბობს, რომ ეს იმიტომ მოხდა, რომ ბევრი სტუმრები ჰყავთ, სასტუმრო გადავსებულია და ასეთ შემთხვევებში სასტუმროს კეტავენ ხოლმე.
„გვსურს გამოვეხმაუროთ დეზინფორმაციას, რომელიც მედიაში ვრცელდება! ვაცხადებთ, რომ ლავროვის შვილის სტუმრობა ყვარლის ტბაზე არ შეესაბამება სიმართლეს, არც ლავროვის გვარით გვიფიქსირდება სტუმარი და არც აქამდე დაფიქსირებულა. სამწუხაროდ, მედიის საშუალებით ვრცელდება ინფორმაცია, რომელიც არ შეესამება სიმართლეს!“ – აცხადებს სასტუმროს ადმინისტრაცია.
ცნობისათვის, ეკატერინა ლავროვა ოფიციალურად ქმრის გვარზეა – ვიკიპედიაში კი, ის მოხსენიებულია როგორც ელატერინა ვინოკუროვა.
„დროას“ ლიდერის ელენე ხოშტარიას ინფორმაციით, ქორწილი აქვს ლავროვის შვილის მაზლს. მისი ინფორმაციით, სტუმრების უმრავლესობა ვლადიკავკაზით, ლარსის გავლით ჩამოვიდა.
“ისინი გზადაგზა ვიდეოებს იღებდნენ და სოციალურ ქსელში ავრცელებდნენ,” – ამბობს ხოშტარია.
რაც შეეხება უშუალოდ ლავროვის შვილს, თუ რა გზით ჩამოვიდა ის საქართველოში, ხოშტარიასთვის უცნობია. თუმცა, ის დარწმუნებულია, რომ საქართველოს ხელისუფლებასთან შეუთანხმებლად ეს არ მოხდებოდა:
“აუცილებლად იქნებოდა შეთანხმებული საქართველოს უსაფრთხოებასთან, შეუძლებელია, რომ სხვაგვარად შემოსულიყო“, – ამბობს ელენე ხოშტარია.
მისივე ინფორმაციით, რუსი სტუმრები კახეთში კიდევ ერთ სასტუმროში, „ახაშნის ღვინის კურორტში“ არიან დაბინავებული, თუმცა ეს სასტუმრო ასევე უარყოფს გავრცელებულ ინფორმაციას.
საქართველოს ხელისუფლების რეაქცია
ხელისუფლების წარმომადგენელმა, მმართველი პარტიის თავმჯდომარემ, ირაკლი კობახიძემ “ქსენოფობია” უწოდა საზოგადოების ნაწილის რეაქციას ლავრობის ოჯახის წევრების სტუმრობასთან დაკავშირებით.
“ვაკეთებდით პროგნოზს, რომ ტურისტული სეზონის მოახლოებასთან ერთად აუცილებლად დაიწყებოდა ქსენოფობიური კამპანიის ახალი ტალღა, რაც ახდა,” – აღნიშნა კობახიძემ.
„ქსენოფობია არ ზის ქართული საზოგადოების ბუნებაში. ეს არის ლიბერალურ ფაშისტური კამპანიის ერთ-ერთი განშტოება და მე ყველას მოვუწოდებ, თავი შეიკავონ ასეთი ტიპის კამპანიებისგან. ქსენოფობიის ადგილი საქართველოში არ არის”.
მან თქვა, რომ ადგილი აქვს ორმაგ სტანდარტს ოპოზიციის მხრიდან:
“თქვენ გახსოვთ მათი დამოკიდებულება 2008 წლის შემდეგ, როდესაც მიხალკოვის შვილის ქორწილი შედგა საქართველოში, მაშინ პირადად ესტუმრა მას მაშინდელი პრეზიდენტი მიხეილ სააკაშვილი. გვახსოვს ასევე დღევანდელი ლიბერალ-ფაშისტების აღელვებული პოსტები. დღეს იგივე ადამიანები გამოდიან ქსენოფობიური კამპანიით. ეს არის ორმაგი სტანდარტი, რაც მიანიშნებს იმაზე, რომ ამ ყველაფერს აქვს მხოლოდ და მხოლოდ პოლიტიკური მიზანი. ეს მიზანი არის ესკალაცია, პროვოკაციების მოწყობა და მთავარი პროვოკატორები არიან დღეს სცენაზე: ხოშტარია, მელია და ა.შ.”
“საინტერესოა, რა კავშირები აქვს ასეთი ელენე ხოშტარიას, რომ პირველი იგებს რუსი ვიზიტორების საქართველოში ჩამოსვლასთან დაკავშირებით.” – განაცხადა ასევე კობახიძემ.
